އެކަނިވެރި މައިންނާއި ބަފައިންގެ އިނާޔަތް 12,000ރ އާ ހަމައަށް ދޭ ގޮތަށް ބަދަލުކޮށްފި
އެކަނިވެރި މައިންނާއި ބަފައިންނަށް ކޮންމެ މަހަކު ދޭ އިނާޔަތް 15,000 ރުފިޔާއާ ހަމައަށް އިއްޔެ ބޮޑުކުރުމަށް ފަހު މިއަދު އެ އަދަދު 12,000 ރުފިޔާއާ ހަމައަށް ދޭ ގޮތަށް ބަދަލުކޮށްފިއެވެ.
އެންސްޕާގެ އެ ގަވާއިދު އިއްޔެ ބަދަލުކޮށް ގެޒެޓްކުރި ގަވާއިދުގައިވާ ގޮތުން ހަތަރު ދަރިންނާ ހަމައަށް ކޮންމެ ދަރިއަކަށް 3,000 ރުފިޔާ ދޭނެއެވެ. ދެން އިތުރުވާ ކޮންމެ ދަރިއަކަށް 1,000 ރުފިޔާއެވެ. އެންމެ ބޮޑު އަދަދަކަށް 15,000 ރުފިޔާ އެވެ. ބޮޑު އަދަދު ލިބޭނީ ހަތް ދަރިން ނުވަތަ އެއަށް ވުރެ ގިނަ ދަރިން ތިބި ނަމަ އެވެ.
އެއް ދުވަސް ވެސް ނުވަނީސް މިއަދު ގެޒެޓްކުރި ގަވާއިދުގައި ވަނީ ފުރަތަމަ ހަތަރު ދަރިންނާ ހަމައަށް ކޮންމެ ދަރިއަކަށް 3,000 ރުފިޔާއެވެ. ދެން އޮތް ބައި އުނިކޮށް ބަދަލުކޮށްފައި ވަނީ އެންމެ ބޮޑު އަދަދަކަށް 12,000 ރުފިޔާ ކަމަށެވެ.
މިހާރު އުސޫލު ބަދަލުކޮށްފައި ވަނީ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒު ވައުދުވެފައިވާ ގޮތަށެވެ.
