ކައިލީ ގެ ދަރިފުޅު އަޅައިގެން ހުރި ދަބަސް ކުޑަޔަސް، އަގު ވަރަށް ބޮޑު!
ސެލެބްރިޓީން ނުވަތަ މަޝްހޫރު މީހުންނާއި އެމީހުންގެ ދަރިން ގެންގުޅޭ ކުދިކުދި ސާމާނު ވެސް އެހާމެ އަގުބޮޑުކަމީ އާވާހަކައެއް ނޫނެވެ. ނަމަވެސް ބައެއް ފަހަރު އެތަކެތީގެ އަގު އެނގުމުން އަހަރެމެން ކަހަލަ އާދައިގެ ދިރިއުޅުމެއް އުޅޭ މީހުންނަށް ލިބެނީ ކުއްލި ސިހުމެކެވެ.
އެގޮތުން މިފަހަރު ވެސް މިވަނީ އެކަހަލަ ސިހުމެއް ލިބިފައެވެ. މަޝްހޫރު މޮޑެލް ކައިލީ ޖެނަރ ގެ ދަރިފުޅު ސްޓޯމީ ވެބްސްޓަރ، ކޮނޑުގައި އަޅައިގެން ހުރި ފިޔާތޮށި ކުލައިގެ ކުޑަ ދަބަހުގެ އަގު އެނގުމުން ގިނަ ބައެއްގެ ދެ ލޯ ދިޔައީ ބޮޑުވެގެންނެވެ.
ވަރަށް ފަހުން ގޭގައި ކިޔަވައި ދޭން ފެށި ސްޓޯމީގެ ފޮޓޯއެއް ކައިލީ އާއްމުކޮށްފައި ވާއިރު، އޭގެން ފެންނަނީ ސްޓޯމީ ވަރަށް ރީތިކޮށް ހިނިތުންވެލާފައި ހުއްޓައެވެ. ނަމަވެސް ގިނަ މީހުންގެ ސަމާލުކަން ހުއްޓުނީ، އެކުޑަ ކުއްޖާ ކޮނޑުގައި އަޅައިގެން ހުރި ދަބަހަށެވެ.
ރިޕޯޓުތަކުން ބުނާ ގޮތުގައި ސްޓޯމީ އަޅައިގެން ހުރީ "ހާރމްސް ޓޯރިލިއަން ކްލިމެންސް ކެލީ އަޑޯ" ބެކްޕެކެކެވެ. ދެކުނުގެ ޤައުމުތަކުގައި މިދަބަހުގެ އަގަކީ 12،000 އެމެރިކާ ޑޮލަރެވެ. އެއީ ދިވެހި ރުފިޔާއިންނަމަ 185،000 ރުފިޔާއެވެ.
މިއީ އާދައިގެ ދިރިއުޅުމެއްގައި އުޅެން ލޯބިކުރާ މީހަކަށް ހަމަޖެހިލައިގެން އެތައް އަހަރަކު އުޅެވޭނެހާ ފައިސާއެވެ. ނަމަވެސް ބެންކު އެކައުންޓުގައި މިހާރު ވެސް 900 މިލިއަނެއްހާ ޑޮލަރު ހުރި ކައިލީ އަށް، މިހާ އަގުބޮޑު ދަބަހެއްގަނެ ފައިސާ އިސްރާފު ކުރުމަކީ އެވަރު ކަމަކަށް ނުވެއެވެ.
އަގުބޮޑީ ސްޓޯމީ އަޅައިގެން ހުރި ދަބަސް އެކަންޏެއް ނޫނެވެ. އޭނާގެ ކަންފަތުގައި ލައްވާފައި ހުރީ ވެސް ޖަވާހިރެވެ. އަދި ރިޕޯޓުތަކުން ބުނާ ގޮތުގައި އެންމެ ކުޑައިރުން ފެށިގެން އެކުއްޖާ ގެންގުޅެނީ އެންމެ އަގުބޮޑެތި ސާމާނު ހޯދައިދީގެންނެވެ.
