ފައްތާޙު ނިޔާވުމާ ގުޅިގެން ޢާއިލާއަށް ރައީސްގެ ތައުޒިޔާ
މަޝްހޫރު ދިވެހި ފިލްމު ޑައިރެކްޓަރު ޢަބްދުލް ފައްތާހު ނިޔާވުމާ ގުޅިގެން، އޭނާގެ ޢާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ދަންނަވައިފިއެވެ.
ރައީސް އެކްސްގައި ހިއްސާކުރެއްވި ޕޯސްޓެއްގައި އެ މަނިކުފާނު ވަނީ މުނިފޫހިފިލުވުމުގެ ދާއިރާއިން، ފިލްމު ޑައިރެކްޓު ކުރުމުގެ ރޮނގުން ޤައުމީ ޚިދުމަތުގެ އިނާމު ހާސިލްކުރައްވައިފައިވާ ފަންނުވެރިއެއްކަމުގައިވާ ފައްތާޙް ނިޔާވުމުގެ ހިތާމައިގައި އެ ޢާއިލާއަށް ތައުޒިޔާ ދަންނަވައިފައެވެ. އަދި މަރްޙޫމަށް ސުވަރުގޭގެ ދާއިމީ ނިޢުމަތް ދެއްވާ، މާތްﷲގެ ރުއްސެވުމާއި ފުއްސެވުމުގައި ލެހެއްޓެވުން އެދި އެމަނިކުފާނު ވަނީ ދުޢާ ދަންނަވައިފައެވެ.
ފައްތާޙު ނިޔާވިއިރު ޢުމުރުން 54 އަހަރެވެ. އޭނާ ނިޔާވީ، އިއްޔެ ކުއްލިއަކަށް ހާޓް އެޓޭކް ޖެހި، ފަރުވާއަށް ދިއްދޫއަށް ދަތުރު ކުރަމުން ދަނިކޮށް ކަނޑުމަތީގައެވެ.
ފައްތާޙަށް ވަނީ 2004ވަނަ އަހަރު އާންމު ޚިދުމަތުގެ ހިތްވަރު ދިނުމުގެ ޤައުމީ އިނާމު ލިބިފައެވެ. އަދި 2007ވަނަ އަހަރު މިއަދު ކްރިސްޓަލް އެވޯޑުގެ ބެސްޓް އެޑިޓިން އަދި ބެސްޓް ޑަައިރެކްޓަރުގެ އެވޯޑު ވެސް ވަނީ ލިބިފައެވެ. މީގެ އިތުރުން އޭނާއަށް ވަނީ 4 ވަނަ ޤައުމީ ފިލްމު އެވޯޑުގައި ބެސްޓް ސްކްރީން ޕްލޭ, ބެސްޓް އާޓް ޑިރެކްޝަން އަދި ބެސްޓް މޭކަޕް ވެސް ލިބިފައެވެ.
Ads by STO
