ކޮލެޖުތަކާއި ޔުނިވާސިޓީތައް ހުޅުވުމާ ގުޅޭ ގޮތުން މަޝްވަރާކުރަނީ
ކޮވިޑް-19އާ ގުޅިގެން ބަންދުކުރި ކޮލެޖްތަކާއި ޔުނިވާސިޓީތައް ހުޅުވުމާއި ގުޅޭގޮތުން މަޝްވަރާ ކުރަމުގެ މަސައްކަތް ފަށާފައިވާ ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެ އެވެ.
ރާއްޖޭގައި ހިންގާ ޔުނިވާސިޓީތަކާއި ކޮލެޖުތަކާއި އަދި ތަމްރީނުދޭ ހުރިހާ މަރުކަޒުތައް ބަންދުކުރުމަށް އެޗްޕީއޭއިން އަންގާފައިވަނީ މިދިޔަ މާރޗް މަހުގެ 14 ވަނަ ދުވަހުއެވެ.
ހޯމަ ދުވަހުގެ ރޭ ރާއްޖެ ޓީވީ ގެ "ފަލަ ސުރުހީ" ޕްރޮގުރާމުގައި ވާހަކަ ދައްކަވަމުން މިނިސްޓަރު އިބްރާހިމް ހަސަން ވިދާޅުވީ ކޮލެޖްތަކާއި ޔުނިވާސިޓީތައް ހުޅުވުމާއި ގުޅޭގޮތުން ޓެކްނިކަލް އެޑްވައިޒަރީ ގްރޫޕާއެކު އަންގާރަ ދުވަހު މަޝްވަރާކުރައްވާނެ ކަމަށެވެ. އަދި އެ ބައްދަލުވުމަށް ވަޑައިގެންނެވުމުގެ ކުރިން ސަރުކާރާއި އަދި ޕްރައިވެޓް ކޮލެޖްތަކާއެކު ފޯނުން މަޝްވަރާކުރައްވާ އެބޭފުޅުންގެ ޚިޔާލު ހޯއްދަވާނެ ކަމަށް މިނިސްޓަރު ވިދާޅުވިއެވެ.
އިބްރާހިމް ހަސަން ވިދާޅުވީ ކޮލެޖް ތަކާއި ޔުނިވާސިޓީތައް ބަންދު ކުރުމަކީ މިނިސްޓްރީގެ ނިންމުމެއް ނޫން ކަމަށާއި އެއީ ކޮވިޑް-19 ފެތުރުން ކޮންޓްރޯލް ކުރުމަށްޓަކައި ޑައިރެކްޓަރު ޖެނެރަލް އޮފް ޕަބްލިކް ހެލްތުން ނިންމަވާފައިވާ ނިންމެވުމެއް ކަމަށެވެ.
އަދި އެފިޔަވަޅު އަޅުއްވާފައިވަނީ ރައްޔިތުންގެ ސަލާމަތާއި ރައްކާތެރިކަމަށް ޓަކައި ކަމަށް އެނާ ފާހަގަ ކުރެއްވިއެވެ. އަންގާރަ ދުވަހު ބާއްވާ މަޝްވަރާތަކަށް ފަހު ކޮލެޖް ޔުނިވަރސިޓީތައް ހުޅުވާނީތޯ ނުވަތަ ނޫންތޯ ގޮތެއް ނިންމާނީ އެޗްޕީއޭއިން ކަމަށް ޑރ އިބްރާހިމް ޙަސަން ވިދާޅުވިއެވެ.
