އާންމުންގެ ތެރޭގައި ކޮވިޑް ފެތުރިއްޖެނަމަ މާލެއިން 46،000 މީހުންނަށް ބަލި ޖެހޭނެ
އާންމުންގެ ތެރޭގައި ކޮވިޑް ފެތުރިއްޖެނަމަ މާލެއިން 46،000 މީހުންނަށް ބަލި ޖެހޭނެ ކަމަށް ލަފާ ކޮށްފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އެޖެންސީ(އެޗްޕީއޭ)ގެ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ މުޖުތަމައުގެ ތެރޭގައި ބަލި ފެތުރިއްޖެނަމަ ބަލި ޖެހޭނެ ނިސްބަތާއި ގުޅޭ ލަފާކުރުންތަކެއް މިހާރު ހެދިފައިވާ ކަމަށެވެ.
އެގޮތުން މުޖުތަމަތުގެ ތެރޭގައި ބަލި ފެތުރިއްޖެނަމަ މާލެ ސަރަހައްދުން އެކަނި 46،627 މީހަކަށް ބަލި ޖެހޭނެ ކަމަށް ލަފާކުރެވޭ ކަމަށާއި އަދި އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ބެލެވޭއިރު ޖުމްލަ 98،501 މީހުންނަށް ކޮވިޑް-19 ޖެހެނޭކަމަށް ބެލެވޭ ކަމަށެވެ.
އަދި އެއްވެސް ފިޔަވަޅެއް ނާޅައިފި ނަމަ ގާތްގަނޑަކަށް ދުވާލެއްގެ މައްޗަށް ގިނަ އަދަދެއްގެ މީހުންނަށް ބަލި ޖެހި، ހަލުވިކަމާއެކު ބަލި ފެތުރޭނެ ކަމަށާއި އަދި 47 ދުވަސް ތެރޭގައި ޕީކްއަށް ދާނެ ކަމަށް ބެލެވޭ ކަމަށް ވެސް ނަޒްލާ ވިދާޅުވިއެވެ.
މީގެއިތުރުން ރައްކާތެރިކަމުގެ ފިޔަވަޅު އަޅައި އެއަށް އަމަލުކޮށްފިނަމަ ބަލި ޖެހޭ މިންވަރު މަދު ކުރެވޭނެ ކަމަށާއި، އެންމެ ޕީކްގައިވެސް އޭރުން ބަލި ޖެހޭނީ 2000 އެއްހާ މީހުންނަށް ކަމަށް ނަޒްލާ ވިދާޅުވިއެވެ. ނަމަވެސް މިއީ ކުޑަ އަދަދެއް ނޫންކަން ނަޒްލާ ފާހަގަކުރެއްވިއެވެ.
