އިންޑިއާއިން ރާއްޖެއައި 5 މީހަކު އައިޖީއެމްއެޗުގައި ކަަރަންޓީންކޮށްފި
އިންޑިއާއިން ރާއްޖެއައި ފަސް މީހަކު އައިޖީއެމްއެޗުގެ ވަކި ސަރަޙައްދެއްގައި ކަރަންޓީން ކޮށްފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނ މަބްރޫކް އަޒީޒް ވިދާޅުވީ މި ފަސް މީހުންނަކީ ކިޑްނީ ބައްޔަށް ފަރުވާ ހޯދަމުންދާ މީހުންކަމަށެވެ. އަދި މީގެ ތެރެއިން ތިން މީހުންނަކީ ކޮންމެ ދުވަހަކުވެސް ޑައިލަސިސް ހަދަންޖެހޭ ބައެކެވެ. މަބްރޫކް މި 5 މީހުންގެ އިތުރުން އެމީހުންނާއެކު ދަތުރުކުރި ކުޑަ ދެކުއްޖަކާއި އެކުދިންގެ ދެ ބެލެނިވެރިންވެސް އައިޖީއެމްއެޗުގައި ކަރަންޓީން ކޮށްފައިވާކަމަށެވެ.
ކޯވިޑް-19ގެ ހާލަތާއި ގުޅިގެން އިންޑިއާ ފުރަބަންދުކޮށްފައިވާތީ އެ ޤައުމުގައި ތިބި ދިވެހިންގެ ތެރެއިން ރާއްޖެއަށް ނާދެވިފައިތިބި 159 ދިވެއްސަކު ދިވެހި ސަރުކާރުން ވަނީ ރާއްޖެ ގެނެސްފައެވެ. އިންޑިޔާގެ ބެންގަލޫރާއި، ކޮޗިން އިން މިއަދު މާލެ ގެނެސްފައިވަނީ އެ ޤައުމަށް އާސަންދައިގެ ދަށުން ބޭސްފަރުވާއަށް ގޮސް ތިބި ދިވެހިންނެވެ.
މި އެންމެންވެސް ވަނީ 14 ދުވަހަށް ކަރަންޓީން ކޮށްފައެވެ. މި މީހުންގެ ކަރަންޓީނުން ދޫކޮށްލާނީ 14 ދުވަހަށްފަހު ހަދާ ޓެސްޓުން ނަތީޖާ ނެގެޓިވް ވުމުންނެވެ. ސަރުކާރުން މިހާތަނަށް ބޭރުގެ ހަތަރު ޤައުމެއްގައި ތިބި ބައެއް ދިވެހިން ވަނީ ރާއްޖެ ގެނެސްފައެވެ. މިވަގުތު ކަރަންޓީން ފެސިލީޓި ތަކުގައި 962 މީހުން އެބަތިބިކަމަށް ނޭޝަނަލް އެމަރޖެންސި އޮޕަރޭޝަން ސެންޓަރުން ވިދާޅުވެއެވެ.
