ރައީސް ނަޝީދު ހިމެނޭހެން ތިން މެމްބަރަކު އައިސޮލޭޝަންގައި!
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހިމެނިވަޑައިގަންނަވާ ގޮތަށް ތިން މެމްބަރަކު އައިސޮލޭޝަންގައި ތިއްބެވި ކަމަށް މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެ އެވެ.
އީވާ މިހެން ވިދާޅުވީ، މިއަދު އޮތް ރައްޔިތުންގެ މަޖިލީހުގެ ތިން ވަނަ ދައުރުގެ ފުރަތަމަ ޖަލްސާގައެވެ. މަޖިލީހުގެ ތިންވަނަ ދައުރުގެ މަސައްކަތް މިއަދު ފަށާފައިވާއިރު، މިއަދުގެ ޖަލްސާގައި ރިޔާސަތުގައި އިންނެވީ މަޖިލީހުގެ ނައިބު ރައީސާ އީވާ އަބްދުﷲއެވެ.
މިއަދުގެ ޖަލްސާ ފައްޓަވައި ދެއްވަމުން އީވާ ވިދާޅުވީ އައިސޮލޭޝަންގައި ތިން މެމްބަރަކު ތިއްބެވި އިރު ލޮކްޑައުންގައި އެއް މެމްބަރަކު ހުންނެވި ކަމަަށެވެ. އައިސޮލޭޝަނުގައި ދެން ތިއްބެވި ދެ މެމްބަރުންގެ ނަން އީވާ ހާމަކޮށްފައެއް ނުވެއެވެ.
ރައީސް ނަޝީދު އައިސޮލޭޝަންގައި ހުންނެވީ އެމަނިކުފާނު އިނގިރޭސިވިލާތުން އެނބުރި ވަޑައިގެންނެވުމާ ގުޅިގެންނެވެ. އެމަނިކުފާނު ނުރަސްމީ ދަތުރުފުޅެއްގައި އިނގިރޭސިވިލާތަށް ވަޑައިގެންނެވުމަށްފަހު އެނބުރި ވަޑައިގެންނެވީ މިދިޔަ މަހުގެ 22 ވަނަ ދުވަހު އެވެ.
