"ކޮވިޑް19 އެންމެ ބާރަށް ފެތުރިގެންދާނީ ރަމަޟާންމަހުގެ ފަހުދިހައިގައި ކަމަށް ބުނުމަކީ އަޅުކަމުގެ ރޫޙް އިތުރުވެދާނެތީ ކަންބޮޑުވުން ފާޅު ކުރުން ނޫން ބާވައެވެ."
ކޮވިޑް19 ރާއްޖޭގައި އެންމެ ބާރަށް ފެތުރިގަންނަ ދުވަސްވަރު އަންނަން ބާކީ އޮތީ ވިއްސަކަށް ދުވަސްކަމަށް ހެލްތު ޕްރޮޓެކްޝަން އެޖެންސީ،އެޗްޕީއޭގެ ދިރާސާއެއްގައި ބުނެފައިވާ ކަމުގައި ރައްޔިތުންގެ މަޖިލީހުގެ ރައީސް ،ރައީސް މުޙައްމަދު ނަޝީދު ވިދާޅުވެފައިވާތީ އެކަމާއި ޖަމްޢިއްޔަތުއްސަލަފްގެ ރައީސް ޝައިޚް ޢަބުދުﷲ ބިން މުޙައްމަދު ސުވާލެއް އުފައްދަވަފިއެވެ.
މިކަމާއި ގުޅިގެން ކުރެއްވި ޓްވީޓެއްގައި ޝައިޚް ޢަބުދުﷲ ވިދާޅުވީ ކޮވިޑް19 ރާއްޖޭގައި އެންމެ ބާރަށް ފެތުރިގަންނާނީ ރަމަޟާންމަހުގެ ފަހު ދިހަޔާ ހިސާބުން ކަމުގައި ބުނުމަކީ މީސްތަކުން ﷲއާ ކުއްތަންވުމަށް އެންމެ ފަހި އަދި ދަހި މޫސުމުގައި އަޅުކަމުގެ ފޯރިއާ ރޫޙް އިތުރުވެދާނެ ކަމުގެ ބިރާއި ކަންބޮޑުވުން ފާޅު ކުރުން ނޫންބާވައެވެ.
މީގެ އިތުރުން ރާއްޖޭގައި ޞިއްޙީ ނުރައްކަލުގެ ޙާލަތު އިޢުލާންކޮށް ކަމާބެހޭ ފަރާތްތަކުން ފިޔަވަޅުތައް އަޅުއްވަމުން ރައްޔިތުންނަށް ސަރުކާރުން ހާމަކުރައްވަމުންދާ އިރުޝާދަށް ބަލާނަމަ ކުރިއަށް އޮތް ވިއްސަކަށް ދުވަހުން ފެށިގެން ކޮވިޑް19 ފެތުރުން ބޮޑުވާން ޖެހޭނެ ސަބަބެއް ފެންނާކަށް ނެތްކަމަށް ވެސް ޢަބުދުﷲ ވިދާޅުވެފައިވެއެވެ. އަދި ތާރީޚީގޮތުން ބަލާއިރު މެއިމަހުގައި ވަބާތައް ފިލައިގެން ގޮސްފައިވާކަން ފެންނަށް އެބައޮތް ކަމަށާއި ވަކިވަކި ސަނަދުތައް ބަލިކަށި ނަމަވެސް އެކަމަށް ބާރު ލިބިދާނެ ޙަދީޘްފުޅު ވެސް ރިވާކުރެވިފައި އެބަހުރި ކަމަށް ޝައިޚް ޢަބުދުﷲ ވިދާޅުވެފައިވެއެވެ.
"ތާރީޚީ ފަތްފުށްތަކުން ކުރިޔަށް އޮތްމަހު (މެއި މަހު) ވަބާތައް ފިލައިގެން ގޮސްފައިވާ ތަންވެސް ފެންނަށް އެބަހުއްޓެވެ. އަދި ވަކިވަކި ސަނަދު ބަލިކައްޓަސް ، އެކަމަށް ބާރު ލިބިދާނޭ ބައެއް ޙަދީޘްފުޅު ވެސް ރިވާކުރެވިފައި އެބަހުއްޓެވެ. ވަބާގެ ޙަޤީޤަތް ދެނެވޮޑިގެންވާނީ ﷲ އެވެ.'' ޝައިޚް ޢަބުދުﷲ ޓްވީޓް ކުރައްވާފައިވެއެވެ.
ރައްޔިތުންގެ މަޖިލީހުގައި ހިމެނޭ ސިޔާސީ ޕާޓީތަކުގެ އިސް ބޭފުޅުންނާއެކު އިއްޔެ މަޖިލީހުގައި ބޭއްވި ބައްދަލުވުމުގައި ރައީސް ނަޝީދު ވަނީ ކޮވިޑް19އަށް ފަރުވާ ކުރުމަށް ބޭނުންވާ ވަޞީލަތްތަކާއި ކޮވިޑް19 ރާއްޖެއިން ޖެހޭނެ މީހުންކަމަށް ލަފާ ކުރެވޭ ޢަދަދާއި ގުޅޭ ގޮތުން ވެސް ވާހަކަފުޅު ދައްކަވާފައެވެ. މިވާހަކަފުޅުތައް ރައީސް ނަޝީދު ވިދާޅުވީ އެޗްޕީއޭގެ އަންދާސީ ރިޕޯޓް އެމަނިކުފާނާއި ހިއްސާކުރުމުތޯ ރޭ ބޭއްވި އެޗްޕީއޭގެ ޕްރެސް ކޮންފަރެންސްގައި ނޫސްވެރިން ވަނީ ސުވާލުކޮށްފައެވެ.
މިސުވާލުގެ ޖަވާބުގައި ކޮވިޑް19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވީ އެ ރިޕޯޓް އެއްވެސް ބޭފުޅަކަށް ހިއްސާ ކޮށްފައި ނުވާނެ ކަމަށާއި އެ ރިޕޯޓް ހިއްސާކޮށްފައިވަނީ ކޮވިޑް19 ޓާސްކްފޯހާއި ކަމަށެވެ. އަދި ނޫސްވެރިން އެކަމާއި ގުޅިގެން ކުރެއްވި ސުވާލު ''އެބޭފުޅަކާއި ކުރެއްވުމަށް''ވެސް މަބުރޫކް ވިދާޅުވިއެވެ.
Ads by STO
