އެސައިމެންޓް ހަދަން ޖެހިގެން ބޯގޮވާފައި ތިބީ ކޮންބަޔަކު؟
ކޮލެޖްތަކާއި ޔުނިވަރސިޓީތަކުގައި ކިޔަވަމުންދާ މީހުންގެ އެންމެ ބޮޑު ޝަކުވާއަކީ އެސައިމެންޓް ހަދަން ޖެހުމެވެ. ސުކޫލުގައި ކިޔެވި ދުވަސްވަރުގައި ގޭގައި ނިންމަން ދޭ އާދައިގެން ކުދި މަސައްކަތްތައް ނިންމާލުމަށް ފަހު މަޖާ ކުރި ދުވަސް މިވަނީ ނިމިފައެވެ. ސުކޫލުގައި ކިޔަވާ ނިންމުމަށްފަހު ކޮލެޖަކުން ނުވަތަ ޔުނިވަރސިޓީއަކުން ކިޔަވަން ފެށުމުން ދެން އަބަދު ބޮލުގައި އޮންނާނީ ކޮންމެވެސް އެސައިމެންޓެއް ނިންމުމުގެ ޒިންމާ އެޅިފައެވެ.
ކޮލެޖްތަކާއި ޔުނިވަރސިޓީތަކުގައި މިހާރު ގިނައިން ކިޔަވަން އުޅޭނީ ވަޒީފާ ތަކުގައި ވެސް އުޅެމުން ކިޔަވާ ކުދިންނެވެ. ހެނދުނު ހޭލައިގެން ވަޒީފާއަށް ދިޔުމަށްފަހު އަސުރު ހާއިރު އޮފީސް ނިންމާފައި ދެން ހަވީރު ދުވެގަންނާނީ ކޮލެޖަށް ނުވަތަ ޔުނިވަރސިޓީއަށެވެ. ދުވާލު ހަތަރު ދަމު އޮފީހުގައި ބުރަކޮށް އުޅެފައި ދެން ކޮލެޖަށް ގޮސް އިންނާނީ ގިނަ ވަގުތު ނިދިފައެވެ. ކްލާހުގައި ޓީޗަރު ކިޔައިދޭ އެއްޗެހި ދާނީ ބޯ މަތިންނެވެ.
އެއް މޮޑިޔުލް ނިންމާލާ، އެސައިމެންޓް ހަދަން ހަވާލު ކުރާއިރު ގިނަ ކުދިންނަށް ކްލާސްތަކުގައި ކިޔަވައިދިނީ ކޮން ފިލާވަޅުތަކެއް ކަމެއްވެސް ނޭނގޭނެއެވެ. އެސައިމެންޓް ހަދަން ދިނުމުން، އެ ހަވާލުކުރަން ހަފްތާއަކަށް ވީމައި ނޫނީ ގިނަ މީހުން އެސައިމެންޓް ހަދަން ޖެހޭ ސުވާލު ބަލައި ވެސް ނުލާނެއެވެ. ސުވާލު ހުޅުވާ ބަލައިލުމުން ވާނުވާ ވެސް ނޭނގޭނެއެވެ. އެވަރުންވެސް އެސައިމެންޓް ހަދަން ތެޅިގަންނާނީ ހަވާލުކުރަން އެއް ދުވަހަށް ވީމައެވެ.
އެސައިމެންޓަކީ ކޮލެޖްތަކުގައި ކިޔަވާ ކުދިންގެ ބޮލަަށް އުނދަގޫ ކުރާކަމެކެވެ. ގިނަ ކުދިން އެންމެ ފަހު ވަގުތު އެސައިމެންޓް ނުހެދިގެން، އަގަށް އެކަން ކުރާ މީހުންނަށް ބޮޑު އަގު ދީގެން އެސައިމެންޓް ހަދައެވެ. އެންމެ ފަހު ވަގުތު އެސައިމެންޓް ނުހެދިގެން ބޯ ގޮވައިން އުޅުމަށްވުރެ، ކުރީ ބައިގައި މީހެއްގެ އެހީތެރިކަމާއިއެކު އެސައިމެންޓް އަމިއްލައަށް ނިންމުމަކީ މާ ބުއްދިވެރި ކަމެކެވެ. އޭރުން އެސައިމެންޓް ނުނިންމިގެން ބޯގޮވައިން އުޅޭކަން ނުޖެހޭނެއެވެ. އަދި އެ ސައިންމެންޓް ހެދުމުން އެނގެން ޖެހޭ އެއްޗެހި ވެސް އެނގިގެން ދާނެއެވެ.
