ހިދުމަތުގައި 10 އަހަރު: ޑރ. ނަޒްލާގެ އިހްސާސްތައް ބަންޑުން ކޮށްލައިފި
ކޮވިޑް-19ގެ ބަލިމަޑުކަމުގެ ތެރެއިން ރާއްޖެއިން އަަޅުމުންދާ ފިޔަވަޅުތައް ހިއްސާކުރުމަށާއި އެންމެ ފަހުގެ މައުލޫމާތު ދިނުމަށް ބާއްވަމުން އަންނަ ނޫސްވެރިންގެ ބައްދަލުވުންތަކުގައި މިހާރު އެންމެ ގިނައިން ފެންނާނެ އެއް މޫނަކަށް ވާނީ ހެލްތު ޕްރޮޓެކްޝަން އެޖެންސީ(އެޗްޕީއޭ)ގެ މެޑިކަލް އޮފިސަރު ޑރ. ނަޒްލާ ރަފީގެވެ. ޑރ. ނަޒްލާ އެ ދާއިރާއިން މަސައްކަތްކުރަން ފެށިތާ 10 އަހަރު ފާއިތުވީއިރު، އޭނާ މިވަނީ އެ 10 އަހަރުގެ އިހްސާސްތައް ބަންޑުން ކޮށްލާފައެވެ.
ފޭސްބުކްގައި އިއްޔެ ކުރެއްވި ޕޯސްޓެއްގައި ޑރ. ނަޒްލާ ވިދާޅުވީ ޕަބްލިކް ހެލްތުގައި މަސައްކަތް ކުރަން ފެށިތާ 10 އަހަރުވީ ކަމަށާއި ޕަބްލިކް ހެލްތާ ގުޅުނީ އެޗް1އެން1 ނުވަތަ ސްވައިން ފްލޫ ފެތުރެން ފެށި ދުވަސްވަރު ކަމަށެވެ.
ނަޒްލާ ވިދާޅުވީ ވޭތުވެ ދިޔަ 10 އަހަރަކީ އުނދަގޫ ނަމަވެސް ގިނަ ކަންތައްތަކެއް ހާސިލްވި 10 އަހަރު ކަމަށެވެ. އޭގެ ތެރޭގައި އެކި ސެކްޓާތަކާއި އެކި އެޖެންސީތަކުގެ މީހުންނާއެކު މަސައްކަތް ކުރުމުގެ ފުރުސަތު ލިބުނު ކަމަށް އޭނާ ވިދާޅުވިއެވެ.
"ވަރަށް ބުރަ. ބައެއް ބަންދު ދުވަސްތަކުގައި އަޅުގަނޑުމެން އާއިލާތަކަށް މައުލޫމާތު ދޭން ނިކުންނަން ޖެހޭ. ދަރިންކޮޅު ނިދަން ބާއްވާފައި ބައެއް ރޭ ރޭ ޓީވީ ޕްރޮގްރާމުތަކަށް އަރަން ޖެހޭ. އަޅުގަނޑުގެ އާއިލާ މީހުންނަށް އާދައަކަށް ވެފައި ވަނީ ރޯދަ މަހު ހެދިކާ ހަދާ ވަގުތު ވެސް އަޅުގަނޑު ފޯނުގައި އިނުން. އަޅުގަނޑުމެން މިތިބީ އާދަވެފައި އެކި ބަލިމަޑުކަމާހުރެ ގިނަ ވަގުތު މަސައްކަތް ކުރަން." ޑރ. ނަޒްލާ ވިދާޅުވިއެވެ.
ނަޒްލާ ވިދާޅުވީ މާބަނޑު ދުވަސްވަރުގެ ފަހު މަސް ވެސް ހޭދަކުރީ މަސައްކަތުގައި ކަމަށާއި އެ ދުވަސް ވަރަކީ އެމްއާރް(މީސަލްސް އެންޑް ރުބެއްލާ) ކެމްޕެއިން ދުވަސްވަރު ކަމަށެވެ.
"ދަރިފުޅު ވިހެއީ ވެސް އެކަމެއްގެ ތެރޭގައި. ވިހެއުމަށްފަހު މަދު އިރުކޮޅެއްގެ ތެރޭގައި ފޯނު ކޯލުތަކަށް ޖަވާބު ދިނިން. ވެކްސިން ޓީމުގެ ބައެއް މީހުންނަކަށް ނޭނގެ އަޅުގަނޑު ވިހޭ ކަމެއް. އޭގެ ފަހުން އައީ ފްލޫ އައުޓް ބްރޭކް. އޭރު މީހަކު އަޅުގަނޑުގެ ގެޔަށް އައި ހަނދާން ވޭ ލިޔުމެއްގައި އަޅުގަނޑުގެ ކޮމެންޓެއް ބޭނުން ވެގެން. އަދި ފޯނު މެދުވެރިކޮށް ނޫސް ބްރީފިންނެއް ޑްރާފްޓު ކުރީ ވެސް އެއް ރޭ ދަރުފުޅަށް ގާތުން ކިރު ދެމުން. އެ ދެކަން ވެސް ހިނގީ ދަރިފުޅުގެ ފުރަތަމަ މަހު." ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ މިދުވަސަވަރު ޕަބްލިކް ހެލްތުގެ އަޑު ގިނައިން އިނުވުނު ނަމަވެސް އަބަދުވެސް އުޅެނީ އެއް މަސައްކަތެއްގައި ކަމަށެވެ. ދަރިފުޅަށް ވެކްސިން ދޭން އަންނަ އިރު މާބޮޑަށް އެކަމާ ވިސްނަން ނުޖެހި އެކަން ކުރެވޭ ކަމަށާއި ނަމަވެސް އެ ވެކްސިން ވެސް ރައްޔިތުންނާ ހަމައަށް ފޯރުކޮށްދޭން ގިނަ މަސައްކަތްތަކެއް ކުރަން ޖެހޭ ކަމަށް އޭނާ ވިދާޅުވިއެވެ.
"މާލޭގައި އެންމެ ފަހުން ހިނގި ބޮޑު އަލިފާނުގެ ހާދިސާގައި ވެސް އަޅުގަނޑުމެން އުޅުނީ މަސައްކަތުގައި، މާލެ ފެނަށް ޖެހުނު އިރު، އޮފިސްތައް ބަންދުކޮށް ސްކޫލްތައް ބަންދު ކޮށް ބައެއް މީހުން މާލެ ދޫކޮށް ދިޔަ އިރުވެސް އަޅުގަނޑުމެން އުޅުނީ މަސައްކަތުގައި." ޑރ. ނަޒްލާ ވިދާޅުވިއެވެ.
ނަޒްލާ ވިދާޅުވީ މިއީ ޝަކުވާ ކުރުން ނޫން ކަމަށާއި އެންމެން ވެސް ކުރާ މަސައްކަތް ދެކެ ލޯބިވާ ކަމަށެވެ. އަދާކުރަނީ ވަޒީފާ އަކަށް ވުރެ ބޮޑަށް މައްސޫލިއްޔަތެއް ކަމަށެވެ. މަސައްކަތުގައި ގިނަ ވަގުތު ހޭދަކުރުމަށް ސިއްހީ މަސައްކަތްތެރިންގެ އާއިލާތަކުން ބޮޑު ގުރުބާނީ އެއްވަނީ ހުރިހާ އާއިލާއަކަށް ވެސް އެހީވުމަށް ކަމަށް ޑރ ވިދާޅުވިއެވެ.
އޭނާ ވިދާޅުވީ މިހާރު ކުރިމަތިވެގެން މިއުޅޭ ހާލަތުގައި ގިނަ މީހުންނަށް ޕަބްލިކް ހެލްތުގެ މުހިންމުކަމާއި ބާރުވެރިކަން ފެނިއްޖެ ކަމަށެވެ. އެހެންކަމުން މިކަން ގިނަ ބަޔަކު ފާހަގަކޮށް އަގު ވަޒަން ކުރާނެ ކަމަށް އުންމީދު ކުރާ ކަމަށް ޑރ. ވިދާޅުވިއެވެ.
"މުހިންމު މަގާމުތަކުގައި ތިބޭ މީހުންނަށް ޕަބްލިކް ހެލްތަށް ދެން ޖެހޭ މުހިންމުކަން އެނގޭނެ ކަމަށް އުންމީދު ކުރަން. އަޅުގަނޑު މި މަސައްކަތް ކުރާތާ 10 އަހަރުވީއިރު، އެތައް ބަޔަކު މިއަށްވުރެ ގިނަ ދުވަހު މި މަސައްކަތުގައި އެއްވެސް ސަމާލުކަމަކައި ޕްރޮމޯޝަނެއް ނުލިބި އެބަ މަސައްކަތް ކުރޭ" ޑރ. ނަޒްލާ ވިދާޅުވިއެވެ.
Ads by STO
