ކޮވިޑް-19 ދިރާސާ: ފުލް ލޮކްޑައުންގެ ހާލަތުގައި ވެސް 4 މީހުން މަރުވެދާނެ!

ޮކޮވިޑް-19 ފެތުރުން ކޮންޓްރޯލް ކުރުމަށް އަޅާ އެންމެ ހަރުކަށި ފިޔަވަޅެއްގެ ގޮތުން މުޅި ރާއްޖެ ފުލް ލޮކްޑައުންއަކަށް ދިޔަ ނަމަވެސް ހަތަރު މީހުން އެ ބަލި ޖެހިގެން މަރުވެދާނެ ކަމަށް ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ކުރި ދިރާސާއިން ދައްކައިފިއެވެ.

Ads by MWSC

އެޗްޕީއޭއިން ކުރި ދިރާސާ ދައްކާގޮތުން ކޮމިއުނިޓީ ސްޕްރެޑް، ނުވަތަ އާންމުންގެ ތެރޭގައި ބަލި ފެތުރިއްޖެ ހާލަތެއްގައި 293 ދުވަހަށް ރާއްޖެ ލޮކްޑައުން ކުރި ނަމަވެސް 173 މީހަކަށް ކޮވިޑް-19 ޖެހޭނެއެވެ. އޭގެ ތެރެއިން މަރުވާނީ ހަތަރު މީހުން ކަމަށް އެ ދިރާސާގައި ބުނެފައިވެއެވެ.

ނަމަވެސް ކޮވިޑް-19 އިން ރައްކާތެރިވާން އެކަށީގެންވާ ފިޔަވަޅުތަކެއް ނާޅައި، މުޖުތަމައުގެ ތެރެއިން މި ބައްޔަށް ފައްސިވި އެންމެ މީހަކު ފެންނަ ހިސާބުން ވެސް މުޅި ރާއްޖޭގައި 98،500 މީހުނަށް ބަލި ޖެހިދާނެ ކަމަށް ލަފާކުރެވޭ ކަމަށް އެ ދިރާސާގައި ބުނެއެވެ.

އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގް ރޭ ވިދާޅުވީ މާލެ ސަރަހައްދުން ޕޮޒިޓިވް ކޭސްއެއް ފެނިއްޖެ ނަމަ، ގާތްގަނޑަކަށް 46،000 މީހުންނަށް ބަލި ފެތުރިދާނެ ކަމަށް ލަފާކުރެވޭ ކަމަށެވެ. މި އަދަދުތައް އަންދާޒާކޮށްފައި ވަނީ، މި ބައްޔާ ގުޅިގެން ދުނިޔޭގެ އެކި ގައުމުތަކުގައި ހަދާފައިވާ މޮޑެލްތަކަށް ބަލައިގެން ރާއްޖޭގައި ކަން ހިނގައިދާނެ ގޮތް ދިރާސާކޮށްގެންނެވެ.

ރާއްޖޭގައި ބަލި ފެތުރޭނެ މިންވަރު ލަފާކޮށްފައި ވަނީ، އޭނާ ވިދާޅުވި ގޮތުގައި، ދިވެހިންނާއި ބިދޭސީން އަދި ރާއްޖެ އަންނަ ޓޫރިސްޓުން ވެސް ހިމެނޭ ގޮތުން މި އަހަރުގެ ޖުމްލަ އާބާދީގެ މައްޗަށެވެ.