ވޯޓުލުމުގެ ޤާނޫނީ ޒިންމާ އަދާކުރުމަށް ރައީސުލްޖުމްހޫރިއްޔާ އިލްތިމާސްކުރައްވައިފި
ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން މައި ދެ އިންތިޚާބު އެއްކޮށްލުމާ ގުޅޭގޮތުން ނަގާ ޚިޔާލު ހޯދުމުގެ ވޯޓުގައި މިއަދު ބައިވެރިވެވަޑައިގަތުމަށްފަހު، ކޮންމެ ރައްޔިތަކު ވެސް އެ މީހަކަށް ލިބިފައިވާ ވޯޓުލުމުގެ ޙައްޤުގެ ބޭނުން ހިފުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.
ވޯޓުލެއްވުމަށް ފަހު، ވޯޓުލާ މަރުކަޒުން ނުކުމެވަޑައިގެން ނޫސްވެރިންނާ ބައްދަލުކުރައްވައި އެމަނިކުފާނު ފާހަގަކުރެއްވި ގޮތުގައި، އިންތިޚާބުތަކުގައި ވޯޓުލުމަކީ ކޮންމެ ފަރުދަކަށްމެ ޤާނޫނުއަސާސީން ކަށަވަރުކޮށްދީފައިވާ ވަރަށް މުހިންމު ޙައްޤެކެވެ. އެހެންކަމުން، މި ޤާނޫނީ ޒިންމާ ފުރިހަމައަށް އަދާކުރުމަކީ ކޮންމެހެން ކުރަންޖެހޭނެ ކަމެއްކަމަށް ރައީސް ވިދާޅުވިއެވެ.
މުޅި ރާއްޖޭގައި މިއަދު ހެނދުނު 8:00 އިން ފެށިގެން ހަވީރު 4:00 ގެ ނިޔަލަށް ވޯޓުލުމުގެ ކަންކަން ކުރިއަށްދާނެއެވެ. އިލެކްޝަންސް ކޮމިޝަނުން މަޢުލޫމާތު ދެއްވާ ގޮތުގައި، ވޯޓުލުމަށްޓަކައި 588 މަރުކަޒެއް ވަނީ ޤާއިމުކޮށްފައެވެ. އަދި އިންތިޚާބުގައި ވޯޓުލުމަށް އަންނަ ކޮންމެ މީހަކަށް ވެސް ތިން ކަރުދާސްކޮޅު ދޫކުރުމަށް ހަމަޖެހިފައިވާއިރު، ކޮންމެ ކަރުދާހެއް ވެސް ވައްޓާލަންޖެހޭނީ އެއަށް ޚާއްޞަކުރެވިފައިވާ ފޮށްޓަށެވެ. މަރުކަޒުތަކުގައި ވޯޓުލުން ވީހާވެސް އޮމާންކޮށް ގެންދިއުމަށްޓަކައި ފުރިހަމަ އިންތިޒާމުތަކެއް ހަމަޖައްސާފައިވާކަން އެ ކޮމިޝަނުން ކަށަވަރުކޮށްދެއެވެ.
