ބިދޭސީންގެ ކިރުފެލާ ގެރިއަކަށް ދިވެހިރާއްޖެ
ބިދޭސީން ރާއްޖެއަށް އަތްގަދަ ކުރުން ހުއްޓުވޭ ސަރުކާރެއް އައިކަމަކަށް ނުވިއެވެ. ދެންކުރާނީ ކީއްހޭ ކިޔާލަ ކިޔާލާ ބަލަހައްޓައިގެން ތިބީއެވެ. ބޮޑުވަރިހަމައިގައި ހިހޫތަނުން ކާލައިގެން އެންމެންހެން ތިބީއެވެ. ނަތީޖާއެއްގެ ގޮތުން، ޞިއްޙީގޮތުން ނުބައި އެތައް އާދަޔަކާއި، އިޖުތިމާއީ އެތައް ބަލިމަޑުކަމަކާއި، ބޯހިޔާވަހިކަމުގެ އެތައް ދައްޗަކާއި، އިޤްތިޞާދީ އެތައް ގިލަންވެރިކަމެއް ބިދޭސީންގެ ފުށުން ރާއްޖެއަށް ވަނީ ޖެހިފައެވެ. އާނއެކެވެ. ބަލަބަލައި ތިއްބާ ބިދޭސީންގެ ކިރުފެލާ ގެރިއަކަށް މި ދިވެހިރާއްޖެ ހަދާލައިފިއެވެ.
އަށްޑިހައިގެ އަހަރުތަކުގެ ކުރީކޮޅުން ފެށިގެން ބޯކޮށާތަންތަނާއި ފަހާތަންތަނުގައި ބިދޭސީން ތިބޭތީ ދެކެމެވެ. ދެން ފެންނަން ފެށީ ސައިހޮޓާތަކުންނެވެ. އޭރުވެސް ފޯރާމީހުންގެ ގޭގޭގައި މަދުމަދުން ނޯކަރުންގެ ގޮތުގައި ބިދޭސީން ގެންގުޅެއެވެ. ބޮޑެތި ފިހާރަތަކުގައިވެސް މަދުމަދުން ބިދޭސީން ގެންގުޅުނެވެ. އެހެނެއްކަމަކު، އިމާރާތްކުރުމުގެ މަސައްކަތަށް ބިދޭސީން ގެނައުމުގެ ފުރުސަތު ހުޅުވާލުމާއެކު އެތެރެވާން ހުރި ދޮރުގެ މަކުޑި ނެއްޓި ތަންމިނަށް ހުޅުވިގެން ދިޔައެވެ.
ރާއްޖެއަށް އެކި ނަންނަމުގައި ބިދޭސީން އެތެރެ ކުރުމަކީ ހެޔޮވަރުގެ ރަނގަޅު ވިޔާފާރިއަކަށް ބަދަލުވެއްޖެއެވެ. ނިޒާމުގެތެރެއިން ބަޔަކު ފައިސާ ހޯދަން ހުޅުވާދެވުނު ދޮރަކަށް ބިދޭސީން އެތެރެ ކުރުމުގެ ހުއްދަ ދިނުންވެގެން ދިޔައެވެ. ދެނަކާ ދެނެއްނެތެވެ. އެޖެންސީ ހަދައިގެން ބައިބައިގަޑަށް ބިދޭސީން އެތެރެ ކުރުވާން ފެށިއެވެ. އެމީހުންގެ ޕާސްޕޯޓުތައް އެޖެންސީގައެވެ. ބިދޭސީ މީހާ ވީނުވީތަނެއް އެޖެންސީއަކަށް ނޭނގެއެވެ. ހުއްދަދޭ ފަރާތާއި އެޖެންސީ ގުޅި ލާމެހިގެން އިންސާނީ ވަގުފާރި ފުޅާ ދާއިރާއެއްގައި ފެށި މޫ ލީއެވެ. ގެންގުޅުނު ބިދޭސީން ، އުޅޭ ބިދޭސީންނަށްވެ ނިމިއްޖެއެވެ.
ގެންގުޅުނު ބިދޭސީން އުޅޭ ބިދޭސީންނަށް ބަދަލުވުމާއެކު ކޯޅިކޯޅިއަށް އަމިއްލަ މަސައްކަތު ގުރޫޕުތައް ހަދައިގެން ހެޔޮ އަގުގައި މަސައްކަތްތައް ނަގައިގެން މާލެތެރޭގައި ފައިސާ ހޯދަން ފެތުރިގަތެވެ. ހޮޓާތަކާއި ފިހާރަތައް ކުއްޔަށް ނަގައިގެން ހިންގަންފެށިއެވެ. ކޮންމެވެސް ދިވެއްސެއްގެ ނަމުގައެވެ. އެމީހާ ހިހޫތަނުން ކާލައިގެން ދިން އެއްޗެއް ހިފައިގެން ހުންނަނީކަން އެވެރިން ވަރަށް ރަގަޅަށް ދަނެ ވެހޭތާ ފެން ނަގާން ފެށިއެވެ.
ބިންވެރިން ހޯދައިގެން ކައިވެނިކޮށް ބިންމޯގޭޖުކޮށްގެން ނެގެން އޮތްހާ ފައިދާއެއް ނަގަނީއެވެ. ދުވަހު ކުއްޔަށްދޭ ބޮޑެތި ގެސްޓުހައުސްތަކާއި ކެފޭ، ހޮޓާ، ރެސްޓޯރެންޓް ތަކުގެ މާލުވެރިންނަށް އެމީހުންވެ ނިމިއްޖެއެވެ. ކުނިއުކާލުމުން ފެށިގެން ހަށިވިއްކުމާއި މަސްތުވާތަކެތީގެ ވިޔާފާރިއަށް ދަންދެން ބިދޭސީން އެބަކުރެއެވެ. އެންމެފަހުން ބޭރުފައިސާ މާރުކުރުމާއި ބަދަލުކުރުމާއި ސޫތަށް ދަރަނި ދިނުމުގެ ވިޔާފާރިވެސް ފުޅާދާއިރާއެއްގައި ކުރަމުން އައިސް ހުއްދަލިބިގެން މަނީޗޭންޖަރުންގެ ގޮތުގައިވެސް ބިދޭސީން އެތިބީއެވެ. މިކަންކަމުގައި އެންމެކުރީގައި ތިބީ ބަންގާޅިންނެވެ.
ބިދޭސީންގެ ހަން ފެތުރުން އޮތީ ހަމައެކަނި މާލެއަކުނޫނެވެ. ރާއްޖޭގެ ހުރިހާރަށެއްގައި މިބަލިމަޑުކަން އިންތިހާއަށް އެބައޮތެވެ. މަސްދޯނި ފަހަރާ ދަނޑުތަކުގައި ވެސް ރަސްކަންކުރަނީ ބިދޭސީންނެވެ. ދެނަހުރި މީހަކު ހުރިކަމަކަށްނުވެއެވެ. ޖަވާބުދާރީކުރުވާނެ ފަރާތެއް ނެތެވެ. ޒިންމާ ނަގާނެފަރާތެއް ނެތެވެ. ގެންގުޅޭ ބަޔަކުނެތި، އުޅޭބަޔަކަށް ބިދޭސީން ވެނިމިއްޖެއެވެ.
ދެން ކުރާނީ ކީއްހޭ ބުނެ ފުއްދާލައި ލޯމަރާލައިގެން ތިބެވެން އޮތްކަމަކަށް މިކަމެއްނުވެއެވެ. ވަގަށް އެތެރެ ކޮށްގެންނާއި ގަވައިދުން އެތެރެވެ ވަގަށް އުޅޭ ބިދޭސީން ގަވައިދަށް ފައްތާލަދޭން އުޅޭ ވާހަކަޔަށް ދިޔަމީހުން ގަލޮޅުދަނޑު ފުރާލުމުން ކަމެއްވެގެން އުޅޭހެން ބަޔަކަށް ހީވިއެވެ. ގަވާޢިދަށް ފައްތައިގެން އެހުރިހާ މީހުން ރާއްޖޭގައި ބައިތިއްބަން ޖެހެނީ ކީއްވެގެން ހެއްޔެވެ. ރާއްޖޭގައި މަސައްކަތްކުރާނެ މީހުން ނެތިދާނެތީހެއްޔެވެ. ނޫނެކެވެ. ދިވެހިން މަސައްކަތްކުރާނެއެވެ. ވެމްކޯ ކުނި ނައްތާލުމުގައި ދިވެހިން ނިކުމެ މާލެސަރަހައްދުގައި އެކުރާ މަސައްކަތުން އެކަން އޮތީއެހެން ނޫންކަން ކިތަންމެހާވެސް ރަގަޅަށް އެނގެއެވެ.
ގަވާޢިދުން އައިސް ވަގުވެފައި ތިބިމީހުން ގައިމު ފޮނުވާލެވެން ޖެހޭނެތާއެވެ. އެމީހުން ސަރުކާރަށް ދެއްކި ޑިޕޮސިޓް ފައިސާ އެކަމަށް ޚަރަދުކުރަން ހުންނާނެތާއެވެ. އަނެއްކާ އެފައިސާ ނެތީ ބާއެވެ. އެފައިސާ ބަޔަކު ކައިހުސްކުރީ ހެއްޔެވެ. އެހެންވީޔާ އެފައިސާ ކޭބަޔަކު އުޅޭނެތާއެވެ. އެމީހުން ހޯދާ އެފައިސާ ދައުލަތަށް ހޯދަން ނޫޅެނީ ހެއްޔެވެ. ނޫނީ އެކަން ކުރަން ނުކެރެނީ ހެއްޔެވެ. ކެރެންޏާ އެކަން ކޮށްގެން ދައުލަތަށް އެފައިސާ ހޯދޭނެތާއެވެ. އެހެންކަމުން ވަގުވެފައިތިބި ބިދޭސީން ބޭރުކުރުން ލަސްކުރަން ޖެހޭ ސަބަބެއް ނެތެވެ. ގައިދުރުކަމަށްޓަކައި އެތައް ސަތޭކަ ބިދޭސީންނަށް ދައުލަތުން އެތައް މިލިޔަން ރުފިޔާ ހޭދަކުރުމަށް ވުރެ ފޮނުވާލުން ދައުލަތުގެ ހައްޓައްވެސް ލުއިވެފައި ދާއިމީ ހައްލަކަށްވާނެއެވެ.
