މިހާތަނަށް ބެލި ބެލުމަށް މިއީ ކޮމިއުނިޓީ ސްޕްރެޑެއް: ޑރ. އަލީ ލަތީފް
ފަހުގެ ޓްރެވަލް ހިސްޓްރީ އެއް ނެތް މީހަކު މިއަދު ކޯވިޑް 19 އަށް ޕޮޒިޓިވްވުމުން ، ބެލި ބެލުމުން ބޮޑަށް ގަބޫލުކުރެވެނީ އެއީ ކޮމިޔުނިޓީ ސްޕްރެޑެއް ކަމަށް ޑރ އަލީ ލަތީފް ވިދާޅުވެއްޖެއެވެ.
ކޯވިޑް 19 އާއި ގުޅިގެން ރާއްޖޭގެ އެންމެ ފަހުގެ ހާލަތު ހިއްސާ ކުރުމަށް މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ އަލީ ލަތީފް ވިދާޅުވީ، މިހާތަނަށް ބެލިބެލުމަށް ކޮމިޔުނިޓީ ޓްރާންސްމިޝަންއެއް ކަމަށް ބެލެވޭ ކަމަށެވެ. އަދި، ކޭސްއެއް ފެނުމަކީ ވަރަށް ބިރުވެރިކަމެއް ކަން ފާހަގަކުރައްވަމުން ޑރ އަލީ ލަތީފް ވިދާޅުވީ، ކޯވިޑް 19 އަކީ އަރިދަފުސް ރޯގާއެއް ނަމަވެސް އެ ޖެހިގެން މަރުވާ މީހުންގެ އަދަދު ވަރަށް ގިނަ ކަމަށެވެ.
ޑރ އަލީ ލަތީފް އިތުރަށް ވިދާޅުވީ، ބައެއް ފަރާތްތަކުން ކޯވިޑް 19 އާއި މެދު ސީރިއަސްއެއް ނުވާ ކަމަށާއި، މީހުން އެއްވެ އުޅޭތަން ފެންނަ ކަމަށެވެ. މީގެ އިތުރުން، މި ބަލިން ފަރުވާ ހޯދެވޭނީ ގޭގައި މަޑުކޮށްގެން ކަމަށާއި، މި ބައްޔަށް ފަރުވާ ދިނުމަށް ގިނަ ބަޔަކު ތަމްރީންކުރުމުގެ އިތުރަށް ހޮސްޕިޓަލްގެ އެނދުތައް ވަނީ ތައްޔާރު ކުރެވިފައި ކަން ޑރ.ޢަލީ ލަތީފް ފާހަގަކުރެއްވިއެވެ.
މާލެއިން ކޯވިޑް 19 އަށް ޕޮޒިޓިވް ވެފައިވާ މީހެއް ފެނުމާއި ގުޅިގެން، ހެލްތް ފޮރޮޓެކްޝަން އެޖެންސީ އިން ވަނީ، 24 ގަަޑިއިރަށް ގްރޭޓަރ މާލެ ސަރަހައްދު ލޮކްޑައުން ކޮށްފައެވެ.
