މި ހާލަތުގައި އަހަރެއްހާ ދުވަހު ގޭގައި ތިބެންޖެހިދާނެ: ޑރ. އަލީ ލަތީފް
ކޮވިޑް-19ގެ ހާލަތު ރާއްޖޭގައި ގޯސް ވެއްޖެ ނަމަ އަހަރެއްހާ ދުވަސް ވަންދެން ގޭގައި ތިބެންޖެހުމަކީ އެކަށީގެންވާ ކަމެއްކަމަށް އައިޖީއެމްއެޗްގެ ޑޮކްޓަރު، ޑރ. އަލީ ލަތީފު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ލަތީފް ވިދާޅުވީ ލޮކްޑައުން ކުރުމުން ކޮންޓެކްޓް ޓްރޭސިންގް ހެދުމަށް ފަސޭހަވާ ކަމަށާއި އުނދަގޫތަކެއް ކުރިމަތިވިޔަސް މިކަމަށް އެއްބާރުލުން ދެއްވުމަށް އެދޭ ކަމަށެވެ.
ލަތީފް ވިދާޅުވީ އެއްވެސް ވަރަކަށް ގެއިން ބޭރަށް ނުނިކުތުމަށާއި ޚާއްސަކޮށް އުމުރުން ދުވަސްވީ މީހުންނާއި، މާބަނޑު މީހުންނާއި ކުޑަކުދިން ގެެތަކުން ނުނިކުތުމަށް ވަނީ އެދިވަޑައިގެންފައެވެ. އެހެންނަމަވެސް، މިއީ ޒުވާނުންނަށް މިބަލި ޖެހުން ކުޑަވާ ސަަބަބެއްކަމަށް ދެކިގެން ނުވާނެ ކަމަށްވެސް އޭނާ ވިދާޅުވިއެވެ.
މިއީ އާދައިގެ ރޯގާއެއް ކަމަށް ދެކިގެން ނުވާނެ ކަމަށާއި ބަލީގެ އަލާމާތެއް ނެތަސް އެމީހެއް ގައިން އެހެން މީހެއްގެ ގަޔަށް ބަލި އަރާފާނެ ކަމަށް ޑރ. އަލީ ލަތީފް ވިދާޅުވިއެވެ.
ޑރ ވިދާޅުވީ ކޮވިޑް-19 ގެ ނުރައްކާތެރިކަން ބުނެދޭން ވަރަށް ގިނަ މަސައްކަތް ކަމާބެހޭ އިދާރާތަކުން ކޮށްފައިވާ ކަމަށާ ނަމަވެސް މިހާތަނަށް ވެސް ދެކެން ބޭނުންވާ މަންޒަރު މުޖްތަމައުގެ ތެރެއިން ނުފެންނަ ކަމަށެވެ. ބިރެއްނެތި އަދިވެސް ބައެއް މީހުން މަގުތަކަށް ނިކުންނަމުންދާ ކަމަށާ މާލެ 24 ގަޑިއިރުގެ ލޮކް ޑައުންއަކަށް ގެންދަން ޖެހުނީ ވެސް އެފަދަ ސަަބަބުތަކާއި ގުޅިގެން ކަމަށް ވެސް ވިދާޅުވި އެވެ.
މާލެއިން މީހަކު ކޮވިޑް-19 އަށް ފައްސިވުމާ ގުޅިގެން އޭނާއާ ޑައިރެކްޓް ކޮންޓެކްޓެއްވި ހުރިހާ މީހުން މިހާރު ވަނީ ދެނެގަނެފައެވެ. ކޮވިޑް-19 އަށް ޕޮޒިޓިވްވެފައިވަނީ ދިވެހި އަންހެނެކެވެ. އޭނާ މިހާރު ވަނީ އައިސޮލޭޝަން ފެސިލިޓީއަކަށް ގެންގޮސްފަ އެވެ. އޭނާ ދިރިއުޅޭ ގޭގެ ސަރަހައްދު ވެސް ވަނީ ބަންދުކޮށްފަ އެވެ.
