މާލޭގައި ނަފްސާނީ ބަލިތަކަށް ޚާއްސަ ހޮސްޕިޓަލެއް ބިނާކުރަނީ
ރާއްޖޭގައި ނަފްސާނީ ބަލިތައް ތަހައްމަލުކުރާ ފަރާތްތައް އިތުރުވަމުންދާތީ، އެކަމަށް އަވަސް ހައްލެއް ހޯދައިދިނުމުގެ ގޮތުން ދައުލަތުގެ ބަޖެޓުން ޚަރަދުކޮށްގެން މާލޭގައި ނަފްސާނީ ބަލިތަކަށް ޚާއްސަ ހޮސްޕިޓަލެއް ބިނާކުރުމަށް ސަރުކާރުން ނިންމަވައިފިކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރައްވައިފިއެވެ.
ސިލްސިލާކޮށް ކުރިއަށްގެންދަވާ ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ރައީސް ހާމަކުރެއްވި ގޮތުގައި، މި ނިންމެވުން ނިންމެވީ ބޭރުގެ އެހީގައި މިފަދަ ހޮސްޕިޓަލެއް އެޅުމަށް ކުރިން ރޭވިފައި އޮތް ނަމަވެސް، އެ ލޯނުގެ އިޖުރާޢަތްތައް ދިގުލައިގޮސް މަސައްކަތް ލަސްވަމުންދާތީއެވެ. ނަފްސާނީ ދުޅަހެޔޮކަމަކީ މިވަގުތު ދިވެހި މުޖުތަމަޢުއަށް ނުހަނު ބޮޑަށް ބޭނުންޖެހިފައިވާ މައްސަލައަކަށްވުމުން، ލޯނު ހަމަޖެހެންދެން މަޑުނުކޮށް ސީދާ ދައުލަތުގެ ބަޖެޓުން މި މަޝްރޫޢު ފެށުމަށް ސަރުކާރުން ކަނޑައެޅުއްވީކަމަށް އެމަނިކުފާނު ފާހަގަކުރެއްވިއެވެ.
މީގެ ކުރިން ބޭރުގެ ލޯނު އެހީގެ ދަށުން ނަފްސާނީ ހޮސްޕިޓަލެއް ތަރައްޤީކުރުމަށް ހަމަޖެހިފައި އޮތީ ލ. ގަމުގައެވެ. މާލޭގައި އައު ހޮސްޕިޓަލެއް އެޅުމަށް ސަރުކާރުން މިހާރު ނިންމެވި ނަމަވެސް، ގަމުގައި ހިންގުމަށް ރާވާފައިވާ މަޝްރޫޢު ބާޠިލުނުކުރައްވާނެކަމުގެ ޔަޤީންކަން ރައީސް ދެއްވިއެވެ. އެގޮތުން، ލޯނު ހަމަޖެހުނުހާ އަވަހަކަށް ގަމުގެ މަޝްރޫޢުވެސް ކުރިއަށްދާނެކަމަށް ވިދާޅުވިއެވެ.
ގަމުގައި ބިނާކުރުމަށް ފަރުމާކޮށްފައިވާ މަރުކަޒަކީ 14،000 އަކަފޫޓުގެ ބިމެއްގައި ގާތްގަނޑަކަށް 18 މިލިއަން އެމެރިކާ ޑޮލަރު ޚަރަދުކޮށްގެން ތަރައްޤީކުރާ ތަނެކެވެ. ރައީސް މުޢިއްޒު ހާމަކުރެއްވި ގޮތުގައި މާލޭގައި ސަރުކާރުގެ ޚަރަދުގައި އަޅާ ހޮސްޕިޓަލަށް ވެސް ހަމަ އެ މިންވަރުގެ ބޮޑު ބިމެއް މިހާރު ވަނީ ހަމަޖައްސަވާފައެވެ.
ދައުލަތުގެ ހެލްތު އިންޝުއަރެންސް ސްކީމް، އާސަންދަ މެދުވެރިކޮށް ނަފްސާނީ ފަރުވާއަށް ބޮޑު ތަރުހީބެއް ލިބެމުންދާކަން ތަފާސްހިސާބުތަކުން ދައްކައެވެ. މިއަހަރުގެ ޖަނަވަރީ މަހުގެ ފުރަތަމަ ދުވަހުން ފެށިގެން އެޕްރީލް މަހުގެ 23 ވަނަ ދުވަހުގެ ނިޔަލަށް، ސައިކޮލޮޖިކަލް ތެރަޕީ އަދި ސައިކިއެޓްރިކް ކޮންސަލްޓޭޝަންގެ ޚިދުމަތް 10،954 އަށްވުރެ ގިނަ މީހުން ހޯދާފައިވެއެވެ. މީގެ އިތުރުން، އަތޮޅުތެރޭގެ އެކި ސަރަޙައްދުތަކުގައިވެސް ނަފްސާނީ ފަރުވާގެ ޚިދުމަތްތައް ފުޅާކުރުމުގެ މަސައްކަތް ކުރަމުންދާކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.
