ނޯތު ކޮރެއާގެ ޖަލަކުން ގައިދީންނަށް ބޯން ދިނީ މަރުވެފައިތިބި މީހުންގެ އަޅި އަޅާފައި ހުރި ފެން
ނޯތު ކޮރެއާގެ ޖަލެއްގައި، ގައިދީންތަކަކަށް، މަރުވެފައިތިބި މީހުންގެ އަޅި އަޅާފައިހުރި ފެން ބޯން ދީފިއެވެ.
ރިޕޯޓުތަކުން ބުނެފައިވާ ގޮތުގައި އެގައިދީންނަށް އަދަބެއްގެ ބޯން ދީފައިވަނީ، މަރުވެފައިތިބި އެހެން ގައިދީންތަކެއްގެ އަޅި އެއްކޮށްފައި ހުރި ފެނެވެ.
އެމީހުންނަށް ކޯރަކުން މިބާވަތުގެ ފެން ބޯން މަޖުބޫރު ކުރުވީ، އެހެން ޤައުމެއްގެ ޑްރާމާއެއް ޓީވީން ބެލުމުން ކަމަށް ވެސް ރިޕޯޓުތަކުން ބުނެފައިވެއެވެ.
މިވާހަކަތައް މީޑިއާތަކަށް ކިޔައިދީ، "ޗޮންގޯރީ ކޮންސެންޓްރޭޝަން ކޭމްޕް" ނަމަކަށް ކިޔާ އެޖަލުގެ ހަގީގަތް ހާމަ ކޮށްފައިވަނީ އެޖަލުން ސަލާމަތްވި ގައިދީއެކެވެ.
އޭނާ ބުނި ގޮތުގައި ނޯތު ކޮރެއާގެ އެޖަލަށް މީހުންލާފައި ވަނީ ސައުތު ކޮރެއާގެ ޓީވީ ޗެނަލެއް ބެލުމުން ނުވަތަ ކްރިސްޓިއަން ދީން ޤަބޫލު ކުރާނަމައެވެ.
"މަރުވެފައި ތިބި ގައިދީންގެ ހަށިތައް، ކޮންމެ ހަފްތާއެއްގެ ހޯމަ ދުވަހަކު އަންދާލަނީ. އެކަމަށް ޚާއްސަ ކޮށްފައި ހުންނަ ގެ ގަނޑެއް ފާޑު ތަނެއް ހުރޭ. ފުނި ޖަހާފައި ހަށިތައް ބެހެއްޓުމަށްފަހު އަންދާލަނީ. މުޅި ތަނުގައި އޮންނާނީ ލޭ، މުޅި ތަނުން ދުވާނީ މިނިމަސް އަނދާ ވަސް. ހަށިތައް އަނދާ ހުލިވުމުން އެއަޅިތައް ނަގާފައި އެއްބައި ބޭނުން ކުރަނީ ގަސް ހައްދަން. އަނެއްބައި ކޯރަށް އަޅާލަނީ. ގައިދީންނަށް ފެން ބޯން ޖެހެނީ އެކޯރުން. އަދި ފެން ވަރަން ޖެހެނީ ވެސް އެކޯރުގެ ފެނުން" އެމީހާ ކިޔައިދީފައިވެއެވެ.
އެޖަލުގެ ލާއިންސާނީ އަމަލު އެހިސާބަކުން ނުނިމެއެވެ. ވާރޭވެހޭ ދުވަހެއްގައި ހަށިތައް އަންދާ ނުލެވިއްޖެނަމަ އެހަށިތައް ބުރިބުރި ކޮށްލާފައި އުކާލަނީއެވެ.
