ދައުލަތަށް 45 އަހަރަށްވުރެ ދިގު މުއްދަތެއްގައި ޚިދުމަތްކުރެއްވި އިބްރާހީމް ރަޝާދު އަވަހާރަވުމާ ގުޅިގެން ރައީސް ތަޢުޒިޔާ ފޮނުއްވައިފި

ދިވެހި ދައުލަތުގެ ތަފާތު އެކި އިސް މަގާމުތަކުގައި 45 އަހަރަށްވުރެ ދިގު މުއްދަތެއްގައި ޚިދުމަތްކުރެއްވި، މައްޗަންގޮޅީ އަލިތަރި، އިބްރާހީމް ރަޝާދު އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ މަރުޙޫމްގެ އާއިލާއަށް ތަޢުޒިޔާ ފޮނުއްވައިފިއެވެ.

މީސްމީޑިއާ މަންސަ 'އެކްސް' މެދުވެރިކުރައްވައި ރައީސުލްޖުމްހޫރިއްޔާ މިރޭ ޢާންމުކުރެއްވި ބަޔާނެއްގައި، އިބްރާހީމް ރަޝާދަކީ ދައުލަތުގެ ކަންކަން ހިންގުމުގައި ނަމޫނާ، ތެދުވެރި އަދި މުރާލި ޝަޚުޞިއްޔަތެއްކަން ވަނީ ފާހަގަކުރައްވާފައެވެ. އަދި އެ މަނިކުފާނު އަވަހާރަވުމަކީ މުޅި ޤައުމަށް ވެސް ލިބިގެންދިޔަ ފޫނުބެއްދޭވަރުގެ ބޮޑު ގެއްލުމެއް ކަމަށާއި، އެއީ ތަޖުރިބާކާރު، އަގުހުރި ޚިދުމަތްތެރިއެއް ކަމަށް ރައީސް ސިފަކުރެއްވިއެވެ. މީގެ އިތުރުން، ޒަމާނީ ޓެކްނޮލޮޖީގެ ކުރިއެރުންތައް ނެތް ޒަމާނެއްގައި ވެސް ސަރުކާރުގެ ޚިދުމަތްތައް ރައްޔިތުންނަށް ފަސޭހަކޮށްދެއްވުމަށް އޭނާ ކުރެއްވި ބުރަ މަސައްކަތްޕުޅުތަކަށް ރައީސް ވަނީ ތަޢުރީފުކުރައްވާފައެވެ.

ސަރުކާރުގެ ތެރޭގައި އުޞޫލުތައް ހިފެހެއްޓެވުމާއި އަމާނާތްތެރިކަން އިސްކުރެއްވުމުގެ ސަބަބުން އާންމުންނާއި އިސްވެރިންގެ ފުރިހަމަ އިތުބާރު ހޯއްދަވާފައިވާ އިބްރާހީމް ރަޝާދަކީ ދިވެހި ދައުލަތަށް ގިނަ ދުވަހު ޚިދުމަތް ކުރެއްވި ޢިއްޒަތްތެރިޔާގެ ލަޤަބްވެސް އަރުވާފައިވާ ބޭފުޅެކެވެ. ފަންސާސް އަހަރާ ގާތްކުރާ މުއްދަތެއްގައި އޭނާ އަދާކުރެއްވި މުހިންމު ޒިންމާތަކުގެ ތެރޭގައި ފާދިއްޕޮޅު އަދި ކޮޅުމަޑުލުގެ އަތޮޅުވެރިކަން ހިމެނެއެވެ. ހަމައެއާ އެކު، ކޮމިޝަނަރ އޮފް އިލެކްޝަންސްގެ މަގާމުގައި ހަ އަހަރަށްވުރެ ގިނަ ދުވަހު ހޭދަކުރެއްވުމުގެ އިތުރުން، މިނިސްޓަރ އޮފް ސްޓޭޓް ކަމާއި ޕްރިންސިޕަލް ކަލެކްޓަރ އޮފް ކަސްޓަމްސްގެ ހައިސިއްޔަތުން ވެސް ފާހަގަކޮށްލެވޭ ޚިދުމަތްތަކެއް ވަނީ ކޮށްދެއްވާފައެވެ.

ލާސްކަންފުޅާ އުޅުއްވުމަށް ފަހު އުމުރުފުޅުން 78 އަހަރުފުޅުގައި މިއަދު ހަވީރުގެ ވަގުތެއްގައި އެ މަނިކުފާނު މި ފާނާވެދަނިވި ދުނިޔެއާ އަލްވަދާޢު ކިޔުއްވިއިރު، ފަހަތްޕުޅުގައި އަނބިކަނބަލަކާއި ތިން އަންހެން ބޭފުޅުން ދުނިޔޭގައި އެބަތިއްބެވިއެވެ.