ރޭ ފައްސިވީ، 3 ވަނައަށް ފައްސިވި މީހާގެ ފިރިމީހާ އަދި ދަރިފުޅު
މިރޭ މާލެއިން ކޮވިޑް-19 އަށް ފައްސިވި ދެ މީހުންނަކީ، 3 ވަނައަށް މާލެއިން މިބައްޔަށް ފައްސިވި މީހާގެ ފިރިމީހާއާއި އެދެމީހުންގެ 16 އަހަރުގެ ދަރިފުޅުކަމަށް މަޢުލޫމާތު ލިބިއެވެ.
"ދެން" އަށް މަޢުލޫމާތު ލިބިފައިވާ ގޮތުގައި މިބައްޔަށް މިރޭ ފައްސިވި ފިރިހެން މީހާއަކީ އެއަރޕޯޓްގައި ރެޕެއްގެ ގޮތުގައި މަސައްކަތް ކުރަމުން އަންނަ މީހެކެވެ.. އޭނާގެ އަންހެނުން ކޮވިޑް-19 އަށް ފައްސިވެފައި ވާކަން އެނގުނީ، މާލެއިން އެންމެ ފުރަތަމަ ކޮވިޑް-19 އަށް މީހަކު ފައްސިވުމާއި ގުޅިގެން އިދާރާތަކުން ކޮންޓެކްޓް ޓްރޭސިންގެ މަސައްކަތްކޮށް ޓެސްޓުތައް ހެދުމުންނެވެ. އެންމެ ފުރަތަމަ މާލެ އިން ކޮވިޑް-19 އަށް ފައްސިވީ މީހާ އަކީ މި އަންހެން މީހާ އާއި އާއިލީ ގޮތުން ގުޅުން އޮންނަ މީހެކެވެ.
އެޗްޕީއޭ އިން ވިދާޅުވީ، މިރޭ ފައްސިވި ދެމީހުންވެސް މިހާރު ތިބީ ކަރަންޓީނު ފެސިލިޓީގައި ކަމަށާއި، އެމީހުން އައިސޮލޭޝަން ފެސިލިޓީއަށް ގެންދިއުމުގެ މަސައްކަތް މިހާރު ކުރަމުންދާ ކަމަށެވެ.
މި ވައިރަސް އަށް މާލެއިން ދެވަނައަށް ފައްސި ވެފައި ވަނީ، އެންމެ ފުރަތަމަ މާލެއިން ވައިރަސް ޖެހުނު އަންހެން މީހާގެ އުމުރުން 1 އަހަރާއި 10 މަހުގެ ތުއްތު ދަރިފުޅެވެ. އެހެންކަމުން މިހާތަނަށް މާލެއިން މި ވައިރަސް ޖެހުނު ފަސް މީހުންނަކީ ވެސް އެއް އާއިލާއެއްގެ ފަސް މީހުންނެވެ.
މިއަދު އެންއީއޯސީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވައިރަހާގުޅޭ ސަރުކާރުގެ ތަރުޖަމާނު މަބުރޫކު އަޒީޒް ވިދާޅުވި ގޮތުގައި، މާލެއިން އެންމެ ފުރަތަމަ ޕޮޒިޓިވްވި އަންހެންމީހާ އާއި އޭނާގެ ތުއްތު ދަރިފުޅާ ސީދާ ގޮތުން ބައްދަލުވި ޖުމްލަ މީހުންގެ އަދަދު މިހާތަނަށް 207 އަށް އަރާފައިވާ ކަމަށެވެ. އޭގެ ތެރޭގައި ހައި ރިސްކު ކޮންޓެކްޓްސްގެ ގޮތުގައި 75 މީހުން، މީޑިއަމް ރިސްކުގެ 43 އަދި ލޯ ރިސްކުގެ ގޮތުގައި 89 މީހަކު މިހާތަނަށް ދެނެގަނެވިފައިވާ ކަމަށް މަބުރޫކު ވިދާޅުވި އެވެ.
