އެމްޑީޕީއަކީ ގައުމު ހަލާކުކޮށްލި ފަނާކުރަނިވި ފިކުރެއް ކަމަށް ވިދާޅުވެ ރައީސްގެ ހޫނު ރައްދެއް
އިދިކޮޅު މައި ޕާޓީ ކަމަށްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ސިޔާސީ ފިކުރަކީ ގައުމު ހަލާކުކޮށްލާ ފަދަ ފަނާކުރަނިވި ފިކުރެއްކަމަށް ސިފަކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑަށް އެ ޕާޓީއަށް ފާޑުވިދާޅުވެއްޖެއެވެ.
ދ. މީދޫގައި ކައުންސިލް އިންތިޚާބު ޕީއެންސީގެ ކެންޑިޑޭޓު ކާމިޔާބު ކުރުމާ ގުޅިގެން ބޭއްވި ހާއްސަ ރަސްމިއްޔާތުގައި ގައުމުގެ މިހާރުގެ ހާލަތާއި ކުރީގެ ސަރުކާރުގެ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުން ރައީސް ވަނީ، އެމްޑީޕީގެ ވެރިކަމުގައި ދައުލަތުގެ ނިޒާމުތައް ހިންގާފައިވާ ގޮތުން ގައުމަށް ބޮޑެތި ގެއްލުންތަކެއް ލިބިފައިވާކަން ފާހަގަކުރައްވާފައެވެ. އަދި އެ ޕާޓީގެ ވިސްނުމަކީ ތަރައްގީއަށް އޮތް ބޮޑު ހުރަހެއް ކަމަށާއި، އޭގެ ސަބަބުން ގައުމުގެ އެންމެހާ ކަންކަން ފަނާވެގެން ގޮސްފައިވާ ކަމަށް އެމަނިކުފާނު ތުހުމަތުކުރެއްވިއެވެ.
ސިޔާސީ މަސްރަހު މިހާރު އޮތް ގޮތަށް ބަލާއިރު، ސަރުކާރާއި އިދިކޮޅު ފަރާތްތަކާ ދެމެދު އަންނަނީ ބަހުގެ ހޫނު ހަމަލާތަކެއް ބަދަލުކުރެވެމުންނެވެ. އެގޮތުން އެމްޑީޕީގެ އިސް ލީޑަރުންނާއި، ސިޔާސީ އެކި ފަރާތްތަކުން ވެސް ސަރުކާރުގެ ނިންމުންތަކާ މެދު ހިތްހަމަނުޖެހުން ފާޅުކޮށް، ތަފާތު އެކި ޕްލެޓްފޯމުތަކުގައި ފާޑުކިޔުންތައް އަމާޒުކުރަމުންދާކަން ފާހަގަކުރެވެއެވެ. ނަމަވެސް ސަރުކާރުން ބުނަމުންދަނީ މިހާރު މަސައްކަތްކުރަމުން އަންނަނީ ކުރީގެ ސަރުކާރުން ހަލާކުކޮށްލާފައިވާ ކަންކަން އާރާސްތުކޮށް، ގައުމުގެ މިސްރާބު ހަމަމަގަށް އެޅުވުމަށް ކަމަށެވެ.
