މަސްމާރުކޭޓު ތަރައްގީކުރުމަށް ސިޓީ ކައުންސިލުން ދަތިކުރި ނަމަވެސް އެ މައްސަލަ ހައްލުކުރާނެ: ރައީސް

ޒަމާނީ ފެންވަރަށް މާލޭގެ މަސްމާރުކޭޓު ތަރައްގީކުރުމަށް ސަރުކާރުން ފަށާފައިވާ ބޮޑު މަޝްރޫއު ކުރިއަށް ގެންދިއުމަށް ބޭނުންވާ ބިން މާލޭ ސިޓީ ކައުންސިލުން ހަވާލުނުކޮށް ހުރަސްއަޅަމުން ދިޔަ ނަމަވެސް، އެކަމަށް އަވަސް ހައްލެއް ހޯއްދަވައި އަމަލީ މަސައްކަތް ފައްޓަވާނެކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނުކުރައްވައިފިއެވެ.

މިކަން އެމަނިކުފާނު ހިއްސާކުރެއްވީ ސަރުކާރުން އާންމުންނާ ހަމައަށް ގެނެސްދޭ "ދަ ޕަލްސް" ޕޮޑްކާސްޓުގެ ދެވަނަ އެޕިސޯޑުގައި ބައިވެރިވެވަޑައިގެންނެވުމުގެ ތެރެއިންނެވެ. ރައީސް ފާހަގަކުރެއްވި ގޮތުގައި، މި އިމާރާތް ބިނާކުރުމަށް ބޭނުންވާ މާލީ އެހީތެރިކަން ބޭންކް އޮފް މޯލްޑިވްސް މެދުވެރިކޮށް މިހާރު ވަނީ ކަށަވަރުކުރެވިފައެވެ. އަދި މަސައްކަތް ހަވާލުކުރާނެ ކުންފުންޏެއް ކަނޑައަޅައި، ސަރުކާރުގެ ފަރާތުން ފުރިހަމަކުރަންޖެހޭ ހުރިހާ އިދާރީ މަރުހަލާތަކެއް ނިންމާފައިވާތާ މިހާރު ހަތަރު މަހަށްވުރެ ގިނަ ދުވަސް ވަނީ ވެފައެވެ.

އެހެންނަމަވެސް، މައިދާނުގައި މަސައްކަތް ނުފެށި އޮތީ ހަމައެކަނި ސިޓީ ކައުންސިލުގެ ފަރާތުން އެ ބިން ސަރުކާރާ ހަވާލުކުރުމަށް ފަސްޖެހެމުންދާތީކަން އެމަނިކުފާނު ތަފްސީލުކޮށްދެއްވިއެވެ. ތަފާތު އެކި ސަބަބުތަކާއި ބަހަނާތައް ދައްކައިގެން ކައުންސިލުން މިކަމަށް އެއްބާރުލުން ނުދިން ކަމުގައި ވިޔަސް، ރައްޔިތުންނަށް ވެފައިވާ ވައުދުތައް ފުއްދުމުގައި ފަހަތަށް ޖެހިވަޑައިނުގަންނަވާނެކަމަށާއި، މި މައްސަލައިގެ ތެރެއިން މަގުކޮށައިގެން ޕްރޮޖެކްޓް ކުރިއަށް ގެންދަވާނެކަމުގެ ޔަގީންކަން ރައީސް ދެއްވިއެވެ.

ސަރުކާރުގެ އެންމެ ބޮޑު އެއް އަމާޒަކީ އަންނަ އަހަރު ފާހަގަކުރާ މަސްވެރިންގެ ދުވަހާ ހަމައަށް އާ މާރުކޭޓުގެ މަސައްކަތް އެއްކޮށް ނިންމާލުމެވެ. ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން މައުލޫމާތު ދެއްވާ ގޮތުގައި، ބިން ހޯދުމަށް އެދި މިހާތަނަށް ހަތަރު ފަހަރެއްގެ މަތިން ސިޓީ ކައުންސިލަށް ލިޔުމުން އަންގާފައިވީ ނަމަވެސް، އެއްވެސް އިޖާބައެއް ލިބިފައެއް ނުވެއެވެ.

"މާލޭ ވެޓް މާކެޓް ކޮމްޕްލެކްސް" ގެ ނަމުގައި ހިންގާ މި ބޮޑު މަޝްރޫއު ޓްރަސްޓެންގް މޯލްޑިވްސްއާ ހަވާލުކޮށްފައިވަނީ ނިމިދިޔަ މާޗު މަހުގެ 15ވަނަ ދުވަހުއެވެ. ކޮންޓްރެކްޓަރ ފައިނޭންސް އުސޫލުން 117 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫއު ނިމޭއިރު، އެތަނުގައި 85،000 އަކަފޫޓުގެ ބޮޑު ޖާގައެއް އެކުލެވޭ ހަ ބުރީގެ ޒަމާނީ އިމާރާތެއް ގާއިމުކުރެވޭނެއެވެ. މިއީ ދެ އަހަރު ދުވަހުގެ ތެރޭގައި އެއްކޮށް ނިންމުމަށް ކަނޑައެޅިފައިވާ މަޝްރޫއެކެވެ.