ހަގީގީ ހާދިސާ: ޙަޔާތުގެ އެދަތި ދުވަސްތައް ވެސް ކަޑައްތުކުރެވުނީ އީމާންތެރިކަން ވަރުގަދަކޮށް ކެތްތެރިވުމުން
ކޮންމެ މީހެއްގެ ދިރިއުޅުމުގައި ވެސް އެކި ކަންތައްތަކާއި ކުރިމަތިވާނެއެވެ. އަޑިގަނޑަކަށްފަހު އުސްގަނޑެއް އަންނާނޭ ބުނާއިރު، ބައެއްފަހަރު އެއަޑިގަނޑުން އަރައިގަތުމަށް ގިނަ ދުވަސްތަކަކާއި ވަރަށް ބޮޑު ހިތްވަރެއް ވެސް ބޭނުން ވެދާނެއެވެ.
މިއީ ވެސް އެފަދަ ބޮޑު އަޑިގަނޑަކާ ކުރިމަތިލާން ޖެހުނު ދިވެހި އަޚެއްގެ ވާހަކައެކެވެ. މަޑު މައިތިރި، ސާދާ މިޒާޖެއްގެ މިމީހާއަކީ ދިރިއުޅުމުގައި ދިމާވާ ކޮންމެ ކަމެއްގައި ވެސް މާތް ﷲ ހަނދުމަކޮށް، އީމާންކަން ވަރުގަދަކޮށް، ކެތްތެރިކަމުގެ ރީތި މިސާލެއް ދެއްކި މީހެކެވެ.
އޭނާގެ މިވާހަކަ "ދެން" އާއި ހިއްސާ ކުރީ ވެސް ދިރިއުޅުމުގައި އޭނާއަށް ދިމާވި ގިނަ ކަންތައްތަކުގެ ތެރެއިން އެއްކަމަކުން އެހެން މީހުންނަށް ވެސް އިބުރަތެއް ޙާސިލު ކޮށްދިނުމުގެ ނިޔަތުގައެވެ.
"އަހަންނަކީ އަތޮޅުތެރޭގެ ރަށަކަށް ނިސްބަތްވާ މީހެކެވެ. ރަށުގެ ހިތްގައިމު މާހައުލު ދޫކޮށްލާފައި، އެހެން މީހުންނެކޭ އެއްފަދައިން އަހަންނަށް ވެސް އަނބި ދަރީން ގޮވައިގެން މާލެ އަންނަން ޖެހުނީ އާމްދަނީ ހޯދަން ރަށުގައި ކުރެވޭނެ ރަނގަޅު މަސައްކަތެއް ނެތުމުންނާއި ރަނގަަޅު ސިއްޙީ ނިޒާމެއްވެސް ނެތުމެވެ. އަހަރެންގެ ދެ ދަރީންގެ ތެރެއިން އެއް ދަރިއަކީ ގާތްގާތުގައި ބަލިވާ ކުއްޖަކަށް ވާތީ އެ ކުއްޖާއަށް ވެސް ފަރުވާ ހޯދުމަށެވެ.
މާލެ އައިސް އަހަރެމެން ފުރަތަމަ ތިބީ ދުރުތާ ތިމާގެ ބައެއްގެ ގާތުގައެވެ. ވަޒީފާއެއް ލިބެންދެން އެގޭގައި ހިލޭ ސާބަހަށް ތިބެވިދާނެ ކަމަށާއި އޭގެ ފަހުން ކުއްޔެއް ކަނޑައަޅާނީ ކަމަށް އެމީހުން ބުންޏެވެ.
އަހަންނަށް ވަޒީފާއެއް ލިބުނެވެ. މުސާރައަށް 6000 ރުފިޔާ ލިބޭތީ ގޭގެ ކުއްޔެއް ކަަމަށް އެމީހުން ހަމަޖެއްސީ 3000 ރުފިޔާއެވެ. ބިލުތަކަށް ފައިސާ ނުދިނަސް ހެޔޮ ކަމަށް ބުންޏެވެ. އެހެންކަމުން ބާކީވާ ފައިސާއިން އަހަރެމެންނަށް ދަތިކަމާއެކު ވެސް ހަމަޖެހިގެން އުޅެވުނެވެ.
ދިރިއުޅުން އެއިރު ދިޔައީ ވަރަށް ވެސް އުފަލުގައެވެ. ނަމަވެސް އެއުފާވެރިކަމަށްވީ އެންމެ ހަތް މަހެވެ. ގޭގައި ތިބި ތިމާގެ މީހުންގެ ކުލަވަރާއި ދައްކަމުންދިޔަ ވާހަކައިގެ ރާގުތައް ބަދަލުވާން ފެށިއެވެ.
ގޭގައި ވަރަށް ގިނަ މައްސަލަތައް ޖެހެން ފެށިއެވެ. ގޭގެ ވެރިފަރާތުން ކަރަންޓު ބިލާއި ފެން ބިލު ބޮޑުކުރާކަމުގެ ތުހުމަތުތަކެވެ. ދައްތަ އާއި އެކަނި ބަދިގޭ ކަންކަން ކުރަން ހަވާލު ކޮށްފައި، އަހަރެންގެ އަންހެނުން ގޭތެރޭގެ އެއްވެސް ކަމަކާއި ކައިރި ނުވާކަމުގެ ވެސް ދޮގު ތުހުމަތުތަކެވެ. މީހެއްގެ ފަރާތުން އަހަންނަށް އެނގުނީ، އެހުރިހާ ވާހަކައެއް އެމީހުން ދެއްކީ އެގެއަށް އެހެންބަޔަކު ގެންނަން ވެގެން ކަމެވެ.
ބައެއްގެ ނުރުހުމުގައި އެތަނެއްގައި ނުހުންނަން ވެގެން އަހަރުމެން އެހެން ތަނެއް ފެނޭތޯ ބެލީމެވެ. ކޮންމެ ތަނެއްވެސް އެހާމެ އަގު ބޮޑެވެ. ކިރިޔާވެސް ފެނުނީ އެއްކޮޓަރި 5800 ރުފިޔާ އަށް ދޭ ތަނެކެވެ. އެހެންކަމުން މަސް ނިމުމުން އެތަނަށް ބަދަލުވީމެވެ. ދެން ވާނެ ގޮތަކާއިމެދު މާތް ރަސްކަލާނގެއާއި ވަކީލު ކޮށްލާފައެވެ.
ހުރިގެއަށް ކުލި ދައްކާފައި ބާކީ އޮތް ލާރިކޮޅު ހިފައިގެން އުޅޭ ތަން ބަދަލު ކުރީމެވެ. ކޮންމެވެސް ހެޔޮގޮތެއް މިންވަރު ކުރައްވާނެ ކަމުގެ އުއްމީދުގައެވެ. އަނބިދަރީންނަށް ކާންދީފައި އަހަރެން ނުކައި ހުރީ ކިތައް ދުވަހު ކަމެއް ވެސް ނޭނގެއެވެ. އޮފީސް މީހުންނާ އެކީ ބޯލާ ކޮފީއާ ސައިން އަހަރެން ގިނަ ދުވަސްތައް ހިފަހައްޓާ ހެޔޮ ގޮތަކަށް އެދިގެން ހުރީމެވެ.
އަހަރުމެން އަތުގައި ފައިސާ ނެތުމުން އުޅެން ޖެހުނީ ވަރަށް ވެސް ދަތި ހާލުގައެވެ. އެދުވަސްތަކުގައި އަހަރެން ޝަކުވާ ނުކުރި ކަމުގައި ވިޔަސް ފިކުރު ބޮޑުވާން ފެށިއެވެ. ހިތަށް އެރީ ވީހާލެއްގައިވާން އެމަސް ނިމުމުން ރަށަށް އަލުން ބަދަލު ވާށެވެ.
އަހަރެންގެ އަނބިމީހާ އަހަންނަށް ހިތްވަރު ދިނެވެ.އޭނާ ބުނީ ޢަޤީދާ އާއި އީމާންތެރިކަން ވަރުގަދަ ކުރުމަށެވެ. އަދި މާތް ﷲ އަށް ދުޢާ ކުރުމުގައި ދެމިހުރުމަށެވެ. އެހެންކަމުން އެދަތިހާލު ޖެހިފައިވީ ނަމަވެސް، އެއަހަރުވީ އަހަރެންގެ އީމާންތެރިކަން ވަރަށް ވަރުގަދަވެ ދީނީ ކަންކަމަށް ވަރަށް ބޮޑު އަޙައްމިއްޔަތުކަމެއް ދެވުނު އަހަރެއް ކަމަަށެވެ.
އެކަލާނގެ ކުޅަދުންވަންތަކަމާއި އޯގާތެރިކަން ދެކިބަލާށެވެ. އެމަސް ނިމުނުތަނާ އަހަންނަަށް ވަޒީފާގައި ކުރިއެރުން ލިބުނެވެ. އެތަނުގެ ސުޕަރވައިޒަރު ކަމަށްހަދާ، މުސާރަ ވެސް ފުދޭވަރަކަށް ބޮޑުވިއެވެ. ކުޑަ ތަނެއް ކުއްޔަށް ހިފައިގެން އަމިއްލައަށް ހުރިހާ ޚަރަދެއް ކޮށްގެން އުޅެވޭ ވަރުވިއެވެ.
ހުރިހާ ކަމެއް އެންމެ މޮޅަށް ބައްލަވާ އިލާހަކީ الله ތަޢާލާއެވެ. އެކަލާނގެއަށް ވަކީލުކޮށް ކެތްތެރިވެ ، އެއިލާހުގެ މަގުގައި ސާބިތުވެއްޖެ މީހަކަށް ފަސޭހަ މަގެއް ދައްކަވާނެކަން ގައިމެވެ.
