މިއަދު ފައްސިވި ދެ މީހަކު އަލާމާތްތައް ހުރެގެން ފްލޫ ކްލިނިކަށް ދައްކާފައިވޭ
މިއަދު ކޮވިޑް-19 އަށް ފައްސިވި ދެ މީހަކު އަލާމާތްތައް ހުރެގެން ފްލޫ ކްލިނިކަށް ދައްކާފައިވާ ކަމަށް ސަރުކާރުން ބުނެފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އެޖެންސީގެ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ އެންމެ ފަހުން ފައްސިވި ދެ މީހުންނަކީ ކުރިން ފައްސިވި އެއްވެސް ފަރާތަކާ ކޮންޓެކްޓުވި ބައެއް ނޫން ކަމަށް މިހާތަނަށް ހެދި ކޮންޓެކްޓު ޓްރޭސިން މަސައްކަތުން އެނގިފައިވާ ކަމަށެވެ.
"އަނެއް ދެ ކޭސް އަކީ މިހާތަނަށް ފެނުނު ކޭސްއަކާއި، މިވަގުތާ ހަމައަށް އައިރު އިތުރު ގުޅުމެއް ހުރި ކަމަށް، އަޅުގަނޑުމެންނަށް ފާހަގަކުރެވިފައި ނުވާ ދެ ކޭސް" ޑރ.ނަޒްލާ ވިދާޅުވިއެވެ.
އަދި އެ ދެ މީހުން ޓެސްޓު ކުރުމަށް ނިންމީ ބަލީގެ އަލާމާތްތައް ހުރުމުން ފްލޫ ކްލިނިކަށް ގޮސް ދެއްކުމުން ކަމަށް ޑރ. ނަޒްލާ ވިދާޅުވިއެވެ. އަދި މި ދެ މީހުންގެ ގަޔަށް ބަލި އެރީ ކިހިނެއްތޯ ބެލުމުގެ މަސައްކަތް ކުރިއަށްދާ ކަމަށްވެސް ޑރ.ނަޒްލާ ވިދާޅުވިއެވެ.
އެ ދެ މީހުންގެ ގަޔަށް ބަލި އެރިގޮތް ދެނެގަތުމަށް މަސައްކަތް ފަށާފައިވާއިރު، މާލެއިން އެންމެ ފުރަތަމަ ފައްސިވި އަންހެން މީހާގެ ގަޔަށް ބަލި އެރިގޮތް ވެސް އަދި މިހާތަނަށް ދެނެގަނެވިފައެއް ނުވެއެވެ.
ރާއްޖެއިން މިހާތަނަށް 28 މީހަކު ކޮވިޑަށް ފައްސިވި ވެފައިވާއިރު، 16 މީހަކު ވަނީ ބަލިން ރަނގަޅުވެފައެވެ.
