އެންމެ ފަހުން ފައްސިވި 2 ދެ މީހުންނާ އެހެން އެއްވެސް ކޭސްއަކާ ގުޅުމެއް ނެތް
މާލެއިން ކޮވިޑް-19 އަށް ފައްސިވި ހަތް ވަނަ އަދި އަށް ވަނަ މީހާއާ އެހެން އެއްވެސް ކޭސްއަކާ ގުޅުމެއް ނެތް ކަމަށް ސަރުކާރުން ބުނެފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ މިއަދު ފައްސިވި އެއް ފަރާތަކީ ކޭސް 23 އާއި ގުޅުންހުރި މީހެއް ކަމަށާއި ނަމަވެސް ދެން މާލެއިން އެންމެފަހުން ފައްސިވި ދެ މީހުންނަކީ ކުރީގެ ކޭސްތަކާއި ގުޅުންހުރި ކޭސްތަކެއް ނޫން ކަމަށެވެ.
"އަނެއް ދެ ކޭސް އަކީ މިހާތަނަށް ފެނުނު ކޭސްއަކާއި، މިވަގުތާ ހަމައަށް އައިރު އިތުރު ގުޅުމެއް ހުރި ކަމަށް، އަޅުގަނޑުމެންނަށް ފާހަގަކުރެވިފައި ނުވާ ދެ ކޭސް" ޑރ.ނަޒްލާ ވިދާޅުވިއެވެ.
އަދި އެންމެފަހުން ބައްޔަށް ފައްސިވި މީހުންނަށް ބަލި ޖެހުނުގޮތް މިހާރު ބަލަމުންދާ ކަމަށް ޑރ.ނަޒްލާ ވިދާޅުވިއެވެ. އެހެންކަމުން މިކަމުގައި ހުރިހާ ރައްޔިތުން ޚާއްސަ ސަމާލުކަމެއް ދެއްވައި މިވަގުތު ގޭގައި ތިއްބެވުމަކީ ވަރަށް މުހިންމު ކަމެއްކަމަށް ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ މާލެއިން ކޮވިޑް-19އަށް ކުރިން ފައްސިވި މީހުންނާ ސީދާ ދިމާނުވާ މީހަކު މި ބައްޔަށް ފައްސިވުމަކީ މި ބަލި މުޖުތަމަޢުގެ ތެރޭގައި ފެތުރެންފަށާފައިވާ ބަލީގެ ނުރައްކާ ބޮޑުވަމުންދާކަން ހާމަވާ ކަމެއްކަމަށެވެ. އެހެންކަމުން ކަމާ ގުޅުންހުރި ފަރާތްތަކުން ދެމުންދާ މަޢުލޫމާތާއި އިރުޝާދުތަކަށް ތަބާވެ އަމަލު ކުރުމަކީ މުހިންމު ކަމެއްކަމަށެވެ.
