މާދަމާގެ މަޖިލިސް ޖަލްސާއަށް މިނިސްޓަރ ޒަހާ ހާޒިރު ކުރަނީ
މާދަމާ އޮންނަ ރައްޔިތުންގެ މަޖިލިސް ޖަލްސާއަށް ފިޝަރީޒް މިނިސްޓަރ ޒަހާ ވަހީދު ހާޒިރު ކުރުމަށް އެޖެންޑާ ކޮށްފިއެވެ.
މާދަމާގެ ޖަލްސާއަށް ފިޝަރީޒް މިނިސްޓަރ ހާޒިރު ކުރުމަށް ހުށަހެޅުއްވީ ކާށިދޫ ދާއިރާގެ މެންބަރު އަބްދުﷲ ޖާބިރު އެވެ.
އެނގިފައިވާ ގޮތުގައި ޖާބިރު މިނިސްޓަރާއި ކުރައްވަން ބޭނުންފުޅުވާ ސުވާލަކީ، ފްރީ ޓްރޭޑް އެގްރިމެންޓްގެ ދަށުން، ދިވެހި މަސްވެރިންނަށް ލިބެންޖެހޭ މަންފާތައް ހިފަހައްޓައި، މަސްވެރިކަމުގެ ދޮރުތައް ބަންދުކޮށް، މި ސަރުކާރުން މަސްވެރިންނަށް ވެފައިވާ ވައުދުތައް ނުފުއްދައި މަސްވެރިން މަގުމަތިކޮށް ނިކަމެތި ކުރަމުންދާއިރު، މިނިސްޓަރު އަތް އުރައި ލައްވައިގެން އިންނަވައި ދިވެހި މަސްވެރިންނަށް އިތުރުފުޅު ހައްދަވައި، ވައުދުތައް ނުފުއްދަވަނީ ކީއްވެތޯއެވެ.
މިނިސްޓަރ ޒަހާ މާދަމާގެ ޖަލްސާއަށް ހާޒިރު ކުރުމަަށް ނިންމާފައިވާއިރު، މީގެ ކުރިންވެސް އެތައް ފަހަރަކު އެކަމަނާ ވަނީ މަޖިލިހަށް ހާޒިރު ކުރައްވާފައެވެ.
އޭގެ އިތުރުން ވެސް ފިޝަރީޒް މިނިސްޓަރުގެ މަގާމުގެ މަސްއޫލިއްޔަތު ފުރިހަމައަށް އަދާނުކުރާ މައްސަލައެއް ވެސް މަޖިލީހުން ބަލާފައިވެ އެވެ.
