ޑްރޯން ހަމަލާތަކާ ގުޅިގެން ރަޝިޔާގެ ޕެޓްރޯލް އުފެއްދުން 25 އިންސައްތަ ދަށްވެ، އިންޑިއާއިން ޕެޓްރޯލް އެތެރެކުރަން ފަށަނީ
ޔޫކްރެއިނުން ރަޝިޔާގެ ތެޔޮ ސާފުކުރާ ކާރުޚާނާތަކަށް ދެމުންދާ ޑްރޯން ހަމަލާތަކުގެ ސަބަބުން، ރަޝިޔާއަށް ކުރިމަތިވެފައިވާ ތެލުގެ ދަތިކަމަށް ހައްލެއް ހޯދުމުގެ ގޮތުން، އިންޑިއާއިން ގިނަ އަދަދަކަށް ޕެޓްރޯލް އެތެރެކުރުމަށް ރަޝިޔާއިން ދަނީ ތައްޔާރުވަމުންނެވެ. މިގޮތުން ކަނޑުމަގުން ޕެޓްރޯލް އެތެރެކުރުމުގެ މަސައްކަތް މިހާރުވެސް ރަޝިޔާއިން ވަނީ ފަށާފައެވެ.
'އާރްބީސީ' އިން ރިޕޯޓުކޮށްފައިވާ ގޮތުގައި، ރަޝިޔާގެ ޓެކްސް ގާނޫނަށް ގެންނަން ހުށަހަޅާފައިވާ އިސްލާހުތަކުގެ ތެރޭގައި، ބޭރުން ޕެޓްރޯލް އެތެރެކުރާ ތެޔޮ ކުންފުނިތަކަށް ދައުލަތުގެ ބަޖެޓުން ސަބްސިޑީ ދިނުން ހިމެނެއެވެ. މިއީ އާންމުންނަށް ތެޔޮ ވިއްކާ އަގު ކޮންޓްރޯލްކުރުމަށް މީގެ އަށް އަހަރު ކުރިން ތަޢާރަފުކުރި އުސޫލެއް އިތުރަށް ފުޅާކުރުމުގެ ފިޔަވަޅެކެވެ. ހުށަހަޅާފައިވާ އުސޫލުގެ ދަށުން، މި ސަބްސިޑީ ކަނޑައަޅާނީ އިންޑިއާ މާކެޓުގައި ޕެޓްރޯލްގެ އަގު ހުރި މިންވަރާއި، އިންޑިއާގެ ބަނދަރުތަކުން ރަޝިޔާއަށް ތެޔޮ ގެނައުމަށް ހިނގާނެ ދަތުރުފަތުރުގެ ޚަރަދަށް ބިނާކޮށެވެ. ރަޝިޔާގެ ސްޓޭޓް ޑޫމާގެ ބަޖެޓް އަދި ޓެކްސް ކޮމިޓީން މި ބިލަށް ތާއީދުކޮށްފައިވާއިރު، އަންނަ ބުދަ ދުވަހު މި ބިލުގެ ދެވަނަ އަދި ތިންވަނަ ކިޔުން ފާސްވުން އެކަށީގެންވާ ކަމަށް އާރްބީސީއަށް މައުލޫމާތު ދިން ފަރާތަކުން ބުނެފައިވެއެވެ.
ޔޫކްރެއިން ހަނގުރާމަ ފެށުނު ފަހުން އިންޑިއާ ވެފައިވަނީ ރަޝިޔާގެ ސާފުނުކުރާ ތެޔޮ އެންމެ ގިނައިން ގަންނަ ގައުމަށެވެ. 2025 ވަނަ އަހަރު ދުވާލަކު 1.5 މިލިއަނާއި 2 މިލިއަން ފީފާއާ ދެމެދުގެ އަދަދަކަށް (ގާތްގަނޑަކަށް 238.48 މިލިއަން ލީޓަރުން ފެށިގެން 318.35 މިލިއަން ލީޓަރާ ދެމެދުގެ އަދަދަކަށް) އިންޑިއާއިން ތެޔޮ ގަނެފައިވާއިރު، 2026 ވަނަ އަހަރުގެ ޖޫން މަހު މި އަދަދު ވަނީ ދުވާލަކު 2.66 މިލިއަން ފީފާ (ގާތްގަނޑަކަށް 423 މިލިއަން ލީޓަރު) އަށް އަރައި ރެކޯޑު މިންވަރަކަށް އިތުރުވެފައެވެ. މީގެ ތެރެއިން ބައެއް ތެޔޮ އިންޑިއާގެ ކާރުޚާނާތަކުގައި ސާފުކުރުމަށްފަހު، ޕެޓްރޯލް ފަދަ އުފެއްދުންތަކުގެ ގޮތުގައި އަލުން އެހެން ގައުމުތަކަށް އެކްސްޕޯޓުކުރެއެވެ. ރޮއިޓާސް އިން ވުޑް މެކެންޒީއާ ހަވާލާދީ ރިޕޯޓުކޮށްފައިވާ ގޮތުގައި، 2025 ވަނަ އަހަރު އިންޑިއާއިން ދުވާލަކު 400،000 ފީފާ (ގާތްގަނޑަކަށް 6.36 މިލިއަން ލީޓަރު) ގެ ޕެޓްރޯލް އެކްސްޕޯޓުކޮށްފައިވާއިރު، މީގެ ތެރެއިން ގިނަ ތެޔޮ ގަނެފައިވަނީ އޭޝިއާގެ ގައުމުތަކުންނެވެ. އިންޑިއާގެ ޕެޓްރޯލްގައި ގާތްގަނޑަކަށް 20 އިންސައްތަ އެތެނޯލް އެކުލެވޭއިރު، މިއީ ރަޝިޔާއިން ހުއްދަކުރާ މިންވަރުގެ ދެގުނައެވެ. ޔޫކްރެއިންގެ ހަމަލާތަކާ ގުޅިގެން ރަޝިޔާއިން ވަނީ އެ ގައުމުގެ މިންގަނޑު 10 އިންސައްތައަށް މިދިޔަ އަހަރު މަތިކޮށްފައެވެ.
ރަޝިޔާގެ ތެޔޮ ސާފުކުރާ މަރުކަޒުތަކަށް ދޭ ހަމަލާތައް 2026 ވަނަ އަހަރު ވަނީ ވަރަށް ބޮޑަށް އިތުރުވެފައެވެ. ރިޕޯޓުތައް ބުނާގޮތުން މެއި މަހު 16 ތަނަކަށް އަދި ޖޫން މަހު މަދުވެގެން އިތުރު 6 ތަނަކަށް ހަމަލާދީފައިވެއެވެ. މިކަމުގެ ސަބަބުން ރަޝިޔާގައި ތެޔޮ ސާފުކުރާ މިންވަރު ފާއިތުވި ވިހި އަހަރުތެރޭ ނުދާހާ ދަށަށް ގޮސް، ޕެޓްރޯލް އުފެއްދުން ވަނީ ގާތްގަނޑަކަށް 25 އިންސައްތަ މަދުވެފައެވެ. މިހާރު އޮޕަރޭޓްކުރަމުންދާ ކާރުޚާނާތަކުން ދުވާލަކު އުފައްދަނީ ގާތްގަނޑަކަށް 85،000 ޓަނުގެ ޕެޓްރޯލެވެ. ނަމަވެސް ހޫނު މޫސުމުގައި ދުވާލަކު 111،000 ޓަނު (111 މިލިއަން ކިލޯ) ގެ ޕެޓްރޯލް ބޭނުންވެއެވެ. އެހެންކަމުން ކޮންމެ ދުވަހަކުވެސް 25،000 ޓަނުގެ (25 މިލިއަން ކިލޯގެ) ޕެޓްރޯލް ޑިމާންޑާ އެއްވަރަށް ނުއުފެއްދި މަދުވެއެވެ.
ރޮއިޓާސް އިން ބުނާ ގޮތުގައި މިހާރު މަދުވާ މިންވަރަކީ ގައުމުގެ އެތެރޭގެ ބޭނުންތަކުގެ ގާތްގަނޑަކަށް 20 އިންސައްތައެވެ. މި ދަތިކަމުގެ ސަބަބުން ހޯލްސޭލްކޮށް ޕެޓްރޯލް ލީޓަރެއްގެ އަގު ވަނީ 100 ރޫބަލް (ގާތްގަނޑަކަށް 1.34 އެމެރިކާ ޑޮލަރު) އަށް ވުރެ މައްޗަށް ގޮސްފައެވެ. މިކަން ހައްލުކުރުމަށް ރަޝިޔާއިން ބެލަރޫސްއިން ޕެޓްރޯލް އެތެރެކުރި ނަމަވެސް، އެއީ ފުދޭ މިންވަރެއް ނޫނެވެ. ބެލަރޫސްއިން މިހާރު މަހަކު ފޯރުކޮށްދެނީ ގާތްގަނޑަކަށް 100،000 އާއި 150،000 ޓަނާ (100-150 މިލިއަން ކިލޯއާ) ދެމެދުގެ އަދަދެކެވެ. އެއީ ދުވާލަކަށް ބަލާނަމަ 3،000 އާއި 5،000 ޓަނާ (ގާތްގަނޑަކަށް 3-5 މިލިއަން ކިލޯއާ) ދެމެދުގެ އަދަދަކަށް ވުމުން، މިއީ ބޭނުންވާ ވަރަށްވުރެ މާ މަދު މިންވަރެކެވެ.
ތެލުގެ ދަތިކަން އޭވިއޭޝަން ދާއިރާއަށްވެސް ވަނީ ފޯރާފައެވެ. އޭވިއޭޝަން ތެޔޮ ލިބުން ދަތިވުމުން، ރަޝިޔާގެ ލުއި މަތިންދާބޯޓު އޮޕަރޭޓަރުން ވަނީ އޭގެ ބަދަލުގައި ކާރުތަކަށް އަޅާ ޕެޓްރޯލް ބޭނުންކުރަން ފަށާފައެވެ. ސަރުކާރުން ތެޔޮ އެކްސްޕޯޓުކުރުން މަނާކޮށްފައި އޮތް ނަމަވެސް، އޭވިއޭޝަން ތެލުގެ ހޯލްސޭލް އަގުތައް ވަނީ އިންތިހާއަށް އުފުލިފައެވެ. މީގެ އިތުރުން މޮސްކޯ، ސެންޓް ޕީޓާސްބާގް އަދި ޓަޓާސްތާންގައި ތެޔޮ ވިއްކާ ބޮޑެތި ކުންފުނިތަކުން، ކޮންމެ ކަސްޓަމަރަކަށް ތެޔޮ ވިއްކާ މިންވަރު ލިމިޓުކުރަން ވަނީ ފަށާފައެވެ.
"ހާލަތު އަދި މުޅިން ގޯހެއް ނުވޭ، އެކަމަކު މިސްރާބު ހުރީ އެ ދިމާލަށް. މަހެއްހާ ދުވަހުގެ ތެރޭގައި މައްސަލަ ވަރަށް ބޮޑުވާނެ،" އޭވިއޭޝަން ވޯކް އެސޯސިއޭޝަންގެ އެގްޒެކެޓިވް ޑިރެކްޓަރު ވާޑިމް ސިގަނާޝް ވިދާޅުވިއެވެ.
ތަޖުރިބާކާރުން އިންޒާރުދޭ ގޮތުގައި، އޭއެން-2 އޮޕަރޭޓަރުންގެ ޖަމިއްޔާއިން ހުށަހަޅާފައިވާ ގޮތަށް އަގު ކޮންޓްރޯލްކުރުމަކީ ތެލުގެ ދަތިކަމަށް ލުޔެއް ލިބުމުގެ ބަދަލުގައި މައްސަލަ އިތުރަށް ގޯސްވާނެ ކަމެކެވެ. މިހާރުވެސް މި ތެލުގެ ދަތިކަން ރަޝިޔާގެ މަދުވެގެން 25 ސަރަހައްދަކަށް ވަނީ ފެތުރިފައެވެ.
