08:30 ގެ ފަހުން ބޭރުގައި އުޅޭ މީހުނަށް ފިޔަވަޅު އަޅަނީ
މިރޭ 08:30 ގެ ފަހުން ހުއްދަނެތި ބޭރުގައި އުޅޭ މީހުނަށް ފިޔަވަޅު އަޅާނެކަމަށް ފުލުހުން ބުނެފިއެވެ.
ދާދި ދެންމެ ކުރި ޓްވީޓެއްގައި ފުލުހުންވަނީ އެފަރާތްތަކާމެދު ފިޔަވަޅު އަޅާނެކަން ހާމަކޮށް ހުރިހާ ރައްޔިތުން ވެސް ގެއަށް ވަނުމަށް އިލްތިމާސްކޮށްފައެވެ.
އަދިި ކޮވިޑް19 ފެތުރުން ހުއްޓުވުމަށްޓަކައި ރައްޔިތުންގެ ފުރިހަމަ އެއްބާރުލުން ބޭނުންވާކަމަށް ވެސް ފުލުހުން ވަނީ ބުނެފައެވެ.
ކޮމިއުނިޓީ ސްޕެރެޑް ނުވަތަ މުޖުތަމައު ތެރޭގައި ވައިރަސް ފެތުރެން ފެށުމާއެކު މާލެ ސަރަހައްދުައި ވަނީ ރެޑް އެލާޓް ނެރެ 14 ދުވަހަށް ލޮކްޑައުން ކޮށްފައެވެ. ލޮކްޑައުން ގެ ހާލަތުގައި ހުއްދަ ލިބިގެން ނޫނީ ގެއިން ނިކުތުން ވެސް ވަނީ މަނާކޮށްފައެވެ. އަދި ބޭރަށް ނިކުމެ އުޅޭ ފަރާތްތަކާއި މެދު ފިޔަވަޅު އަޅައި ކަރަންޓީނު ކުރާނެ ކަމަށް ވެސް މީގެ ކުރިން ފުލުހުން ބުނެފައިވެއެވެ.
ނަމަވެސް ގޭގެއަށް ޑެލިވެރީ ކުރުމުގައި ހުރި ދަތިތަކާއެކު ގިނަ ބަޔަކު ވަނީ ކާބޯތަކެތި ގަތުމަށް ނިކުމެފައެވެ. ނަމަވެސް މި ދަތިތަކަށް ހައްލެއް ގެނައުމަށް ޑެލިވެރީ ގަޑިތައް 24 ގަޑިއިރަށް އިތުރު ކޮށް ސިފައިން ވެސް އަންނަނީ ޑެލިވެރީގައި ހަރަކާތްތެރި ވަމުންނެވެ.
މާލެއިން މިހާތަނަށް ޖުމްލަ 8 ދިވެއްސަކު ވަނީ ވައިރަހަށް ފައްސިވެފައެވެ.
