ހަގީގީ ހާދިސާ: ހަކުރުބައްޔަށް ފަރުވާ ހޯދަމުންދާ މަންމައަށް ބޭސް ގަންނަން އެހީތެރިކަމަށް އެދުނު ޒުވާނާ
މާލޭގެ މަގުމަތީގައި ގިނަ ވަގުތު އުޅޭ މީހަކަށް މި ކިޔާދޭން އުޅޭ ވާހަކަ އަކީ އައު ވާހަކަ އަކަށް ނުވާނެއެވެ. މިފަދަ ކަންކަމަކީ މަދުން ކުރިމަތިވާ ކަމަކަށް ވެސް ނުވާނެއެވެ. އަދި ވަރަށް ގިނައިން މިފަދަ ހާލަތްތަކާއި ކުރިމަތިލާން ޖެހިފައިވެސް ހުރެދާނެއެވެ. ނަމަވެސް މިފަދަ ކަންތައްތަކަކީ މިއަދު އަޅުގަނޑުމެންގެ މި ކުޑަކުޑަ މުޖުތަމައުގެ ތެރޭގައި ވަރަށް ގިނަ ވެފައިވާ ކަމަކަށްވާތީ މި ވާހަކަ ނުދައްކާ ފަރުޖެހޭކަށް ވެސް ނެތެވެ.
މީގެ އިރުކޮޅެއްގެ ކުރިން ފޭސްބުކަށް ވަދެ "ސްކްރޯލް" ކޮށްލުމުން ފެނުނީ އެކުވެރިއަކު ކޮށްފައިވާ ޕޯސްޓެކެވެ. ގިނަ ބަޔަކު ދަންނަ ފޮޓޯގްރާފަރު އަބީދު ފޭސްބުކުގައި ހިއްސާ ކޮށްފައިވާ ވާހަކަ އަކަށެވެ. ޕޯސްޓު ފެށުމުގެ ގޮތުން ސުުރުހީ އަކަށް ޖަހާފައިވަނީ "މަންމައަށް ޑައިބެޓިކް ބޭސް ގަންނަން އެހީތެރިކަމަށް އެދުނު ޒުވާނާ" މިހެންނެވެ. ކޮންމެއަކަސް ނުހަނު ޝައުގުވެރިކަމާއެކު އެވާހަކަ ކިޔާ ނިންމާލައިފީމެވެ. އަދި މިވާހަކަ އަބީދު ކިޔައިދިން ގޮތަށް ތިޔަ ކިޔުންތެރިންނަށް ހިއްސާކޮށްލަން ހިތަށް އެރިއެވެ.
މަންމައަށް ޑައިބެޓިކް ބޭސް ގަންނަން އެހީތެރިކަމަށް އެދުނު ޒުވާނާ!
"އޮފީސް ނިންމާފައި ދިވެހިރާއްޖޭގެ އަޑު ފުރަގަހުން ހިނގާފައި ގެއަށް އައި މަގުމަތީ ސާދާ ހިނިތުންވުމެއް ގައި ހުރި ޒުވާނަކު ސަލާމް ގޮވާލި އެވެ. ސަލާމް ބަލައިގަތުމަށްފަހު މަޑުކޮށްލީމެވެ. ހީކުރި އެއީ ދަންނަ އެކުވެރި އެއް ކަމަށެވެ. މާސްކު އަޅާފައި ހުރީމަ ހީވާނީ އެހެންތާއެވެ. ސައިކަލް މަތީގައި އިން އެ ޒުވާނާ ފޯނާ ކުޅެމުން އަސަރާއެކު ބުނެލި އެވެ.
"މިހެން ދުވަހަކު ވެސް މީހެއްގެ ގާތުގައި ކަމަކު ނޭދެން، މިއަދު މިއުޅެނީ މަންމަގެ ޑައިބެޓިކް ބޭސް ހުސްވެގެން އެގަންނަން މާލެ އައިސް، އުޅެނީ ހުޅުމާލޭ، ކޭސް ކާޑު މައްސަލަ އެއް ދިމާވެގެން ފައިސާ ނުދެއްކިގެން އެހީއަށް މި އެދުނީ " ވަގުތުން އަހަރެން ބުނީމެވެ. ކިހާ ވަރަކަށްތޯ ތިޔަ ބޭހެއް ލިބެނީ؟ ޖަވާބު ގައި 80 ރުފިޔާ ކަމުގައި ބުންޏެވެ .
އަހަރެންގެ ވޮލެޓު ގައި އެވަރަށް ފައިސާ ނެތުމުން ހިގާ ފާމަސީ އަކަށް ގޮސް އެ ބޭސް ގަންނަން ދިޔުމަށް އެދުނީމެވެ. ޖަވާބު ގައި އެ ޒުވާނާ ބުންޏެވެ، މިތަނުން އެއްވެސް ފާމަސީ އަކުން ޑައިބެޓިކް ބޭސް ނުލިބޭކަމަށާއި ލިބެނީ ހަމައެކަނި އޭޑީކޭ ފާމަސީން ކަމަށް އޭނާ ބުންޏެވެ. އަދި އޭޓީއެމާ ގާތް ކޮށްލާފައި ރުފިޔާ ދިނުމުން އޭޑީކޭ ހޮސްޕިޓަލަށް ގޮސް ގަނެފާނެ ކަމަށް އޭނާ ބުންޏެވެ.އެހެން ބުނުމުން އިތުރަށް އަހަރެންގެ ވޮލެޓު ނަގާ ބަލާލިއިރު 30 ރުފިޔާ އޮތެވެ.
އަދި އަހަރެން ބުނީމެވެ. ޔަޤީނުންވެސް މިތަނުން ކޮންމެވެސް އެއް ފާމަސީ އަކުން ތިޔަ ބޭސް ލިބޭނެއެވެ. މިތަނުގައި ވެސް އޭޑީކޭ ފާމަސީއެއް ހުންނާނެއެވެ.ނުލިބިއްޖެއްޔާ އައިޖީއެމްއެޗް އެތެރޭގެ އިން ފާމަސީން ވެސް ލިބޭނެއެވެ.
އޭނައަށް 30 ރުފިޔާ ފެނުމާއި އެކު ބުންޏެވެ. 30 ރުފިޔާ " އޯކޭވާނެ ބުރޯ،"
އިތުރަށް އަހަރެން އޭނާގެ މޫނަށް ބަލާފައި ހިނގާށޭ އޭޑީކޭ ފާމަސީ އަށް ގަންނަން ބުނީމަ " އޯކޭ ބުރޯ " ކިޔާފައި ސައިކަލް މުށްގަނޑު ފެލާފައި އެދިޔައީ އެވެ. "
މިއީ ހަމަ އެވާހަކަ އަބީދު ކިޔާދީފައިވާ ގޮތެވެ. ހަކުރު ބައްޔަށް ފަރުވާ ހޯދަމުން ދާ މަންމައަކަށް ހަކުރު ބައްޔަށް ބޭސް ގަންނަން އެހީއަށް އެދި "ސަލާން" ޖެހި ޒުވާނާގެ ވާހަކަ އަބީދު ހިއްސާ ކޮށްފައިވާ ގޮތެވެ. އަދި އެޒުވާނާ ދިއުމުން އައިޖީއެމްއެޗް ކައިރީގެ ފިހާރަތައް އޭނާ އަމިއްލައަށް ބަލައި، އެ ފިހާރަތަކުގައި ޑައިބެޓިކްސް ބޭސް ހުރިތޯ ޔަގީން ކުރިކަމަށް އޭނާ ބުންޏެވެ. އަދި ލިޔުން ނިންމާލަމުން އިތުބާރު ކުރާނީ ކާކަށްތޯ އޭނާ ސުވާލު އުފެއްދިއެވެ.
ތެދެެކެވެ. މިޒަމާނުގައި އަޅުގަނޑުމެން އިތުބާރު ކުރާނީ ވަކި ކާކަށް ހެއްޔެވެ. އެހީތެރިކަމުގެ އަތެއް ފޯރުކޮށް މިދެވެނީ ފާހިޝް އަމަލަކަށް ކަމެއް ނުވަތަ ރަނގަޅު ބޭނުމަކަށް ކަމެއް އެނގޭނީ ކިހިނަކުން ހެއްޔެވެ. ގައިގައި ބާރު ހުރި ނޫކަށި ފުރައިގެ ޒުވާނުންވެސް މަގުތަކުގައި އެކަކު ކައިރިން އަނެކަކު ކައިރިން ސަލާމް ޖަހަން އެބަ އުޅޭ ވިއްޔާއެވެ. މިއީ ގައުމެއްގެ ހައިސިއްޔަތުން އަޅުގަނޑުމެން ކަންބޮޑުވާން ޖެހޭ މައްސަލައެއް ކަން ގައިމެވެ.
ދުއާއަކީ އެފަދަ ޒުވާނުންނަށް ހެޔޮ ވިސްނުން ދެއްވާ ހަރުދަނާ ޒުވާނުންތަކެއް އުޅޭ ގައުމަކަށް މި ގައުމު ވެގެން ދިއުމެވެ.
އަބީދްއަަސްވެސް އެނގެން ވާނެ ޑައިބެޓިކް ހަކުރު ބޭހަކީ އާސަންދައިން ލިބޭ އެއްޗެއް…ބޭސް ސިޓީ ހިފައިގެން ދިޔައިމަ ހިލޭ ލިބޭ ބޭހެއް މުޅި މާލޭގައި ސަލާންޖަހަން ހުންނާކަށް ނުޖެހޭ…
ހިނގާފައި ގެއަށް އައި މަގުމަތީ ސާދާ ހިނިތުންވުމެއް ގައި ހުރި ޒުވާނަކު ސަލާމް ގޮވާލި އެވެ. ސަލާމް ބަލައިގަތުމަށްފަހު މަޑުކޮށްލީމެވެ. ހީކުރި އެއީ ދަންނަ އެކުވެރި އެއް ކަމަށެވެ. މާސްކު އަޅާފައި ހުރީމަ ހީވާނީ އެހެންތާއެވެ.