ޑެލިވަރީ ކޮށްދޭން އަންނަ ބިދޭސީ މީހާއަށް ކާއެއްޗެއް ދިއްކޮށްލަދީ!
މާލޭ ލޮކްޑައުން ކުރުމާއެކު ޑެލިވަރީގެ ހިދުމަތްތައް ފޯރުކޮށްދޭން އަންނަ ބިދޭސީ މީހާއަށް ކާ އެއްޗެއް ދިއްކޮށްލަދޭން ބައެއް ފަރާތްތަކުން ގޮވާލަން ފަށައިފިއެވެ.
ފޭސްބުކްގައި ބައެއް މީހުން ހިއްސާ ކުރަމުންދާ ޕޯސްޓުގައި ބުނެފައި ވަނީ ގޭގައި ފޫހިވެގެން ތައްޔާރުކުރި އެއްޗެއް ހުރި ނަމަ ޑެލިވަރީއަށް އަންނަ ބިދޭސީ މީހާއަށް އެ އެއްޗެއް ދިއްކޮލަދިނުމަށް އެދޭ ކަމަށެވެ.
"ބައެއް ބިދޭސީންނަށް މި ދުވަސްވަރު ކާން ލިބެނީ ވަރަށް މަދު އެތިކޮޅެއް." އެ ޕޯސްޓުގައި ބުނެފައިވެއެވެ.
މާލެ ލޮކްޑައުންގެ ކުރުމާ ގުޅިގެން ގިނަ ބިދޭސީންތަކެއް ދަނީ މަގުތައް މައްޗަށް ނުކުންނަމުންނެވެ. އަދި ފިހާރަތައް ދޮށުގައި އެމީހުން ކިޔުތައް ދަމާލި އެވެ. ބަންދު ބޯޑު އަޅުވައިގެން ގިނަ ފިހާރަތަކުން ވިޔަފާރި ކުރެ އެވެ.
ކިޔު ދަމާލާފައި ބިދޭސީން ގިނަ ފިހާރަތައް ދޮށުގައި ތިބިއިރު އޭގެ ތެރޭގައި މިއަދު އަދި ކާނެ އެއްޗެއް ނެތިފައި ތިބި މީހުން ވަރަށް ގިނަ އެވެ. ކިޔުއެއް ހުއްޓަސް ފިހާރަތަކުން ބޮޑަށް އިސްކަން ދެނީ ދިވެހިންނެވެ. ބިދޭސީން ޖެހެނީ ފަހަތަށެވެ.
ބައެއް ފިހާރަތައް ދޮރުމަތީ ތިބެގެން ބިދޭސީން އާދޭސް ކުރާ މަންޒަރު ވެސް ފެނެ އެވެ. ނަމަވެސް ގިނަ ފަހަރަށް އެމީހުންނަށް އެއްވެސް ބަޔަކު ސަމާލު ކަމެއް ނުދެ އެވެ. އެތައް އިރަކު ކިޔުގައި ތިބުމަށްފަހު ވެސް ދާން ޖެހެނީ ހުސް އަތާ އެވެ. ނުރުހުމާއި ދަށްކޮށްލުމުގެ ބަސްތައް ވެސް ބައެއް ދިވެހިންގެ ފަރާތުން އެމީހުންނަށް ރައްދު ކުރެ އެވެ.
