އަމްރިތާ ބަލިވެއިންކަން އޭނާއަށް ކުރިން ހާމަކޮށްލީ ފޭންކްލަބަކުން
ބޮލީވުޑްގެ ގިނަ ތަރިން ބަލިވެއިން ކަމުގެ ޚަބަރު ، އެމީހުން ދަނީ ފޭނުންނާ ހިއްސާ ކުރަމުންނެވެ.
މަޝްހޫރު އެކްޓްރެސުން ކަމަށްވާ ކަރީނާ ކަޕޫރް ޚާން އާއި އަނުޝްކާ ޝަރްމާ ވެސް ބަލިވެއިން ޚަބަރު މީސްމީޑިއާ މެދުވެރިކޮށް ހާމަ ކޮށްފައިވާއިރު، "ޗަކް ދޭ އިންޑިއާ" ގެ އެކްޓްރެސް ސަގާރިކާ ގަޓްގޭ ވެސް ވަނީ އޭނާ އިނީ ބަލިވެކަން އިއުލާނު ކޮށްފައެވެ.
އެއަށްފަހު މިއަދު އާއްމުވި އަނެއް ޚަބަރަކީ ފިލްމު "ޢިޝްޤް ވިޝްޤް" އިން ބޮލީވުޑަށް ތަޢާރަފްވި، އަދި ފަރާ ޚާން ގެ "މޭ ހޫނާ" އާއި "ވިވާ" ފަދަ ފިލްމުތަކުން ހޫނު ތަރުހީބެއް ހޯދި އެކްޓްރެސް އަމްރިތާ ރާއޯ ވެސް ބަލިވެއިން ކަމުގެ ޚަބަރެވެ.
އެހެން އެކްޓްރެސުންނާއި ޚިލާފަށް އަމްރިތާ ރާއޯ ބަލިވެ އިންކަން އެންމެ ފުރަތަމަ ވެސް ހާމަ ކޮށްފައި ވަނީ އޭނައާއި އޭނަގެ ފިރިމީހާ އާރްޖޭ އަންމޯލް އެއް ނޫނެވެ.
އެދެމަފިރިންގެ މީސްމީޑިއާ އެކައުންޓްތަކުގައި މިޚަބަރު ޙިއްސާ ކުރުމުގެ ކުރިން، މިކަން މީސްމީޑިއާއަށް ހާމަ ކޮށްލާފައިވަނީ އަމްރިތާގެ ފޭން ކްލަބަކުންނެވެ.
އަމްރިތާ އާއި އޭނަގެ ފިރިމީހާ އެއްކޮށް ތިބި ފޮޓޯއެއް އާއްމު ކޮށްފައިވާއިރު، އަމްރިތާ އިނީ ބަލިވެކަން ވަރަށް ރީތިކޮށް އެފޮޓޯއިން ހާމަވާން ހުރެއެވެ.
ރިޕޯޓުތަކުން ބުނެފައިވާ ގޮތުގައި އަމްރިތާގެ މި ފޮޓޯ ނަގާފައިވަނީ ކްލިނިކެއްގެ ބޭރުންނެވެ. އެދެމަފިރިން ރަސްމީކޮށް މިވާހަކަ އިއުލާނު ނުކުރި ނަމަވެސް، އެކަން ސިއްރު ކުރަން ވެސް ނުވަތަ ކެމެރާތަކަށް ނާރަން ވެސް އެއްވެސް މަސައްކަތެއް ނުކުރާކަން ފާހަގަ ކޮށްފައިވެއެވެ.
އަމްރިތާ ބަލިވެ އިނީ ކޮވިޑާއި ގުޅިގެން ލޮކްޑައުން ކުރުމުގެ ކުރިން ކަމުގައި ބުނެފައިވެއެވެ.
Ads by STO
