އަހަންނަކީ 2020 ގެ މަންމައެއް: އަމްރިތާ ރާއޯ
ބޮލީވުޑްގެ އެކްޓްރެސް އަމްރިތާ ރާއޯއަށް ފިރިހެން ކުއްޖަކު ލިބިއްޖެއެވެ.
ރިޕޯޓުތަކުން ބުނާގޮތުގައި އަމްރިތާ ވިހެއީ ނޮވެމްބަރު މަހުގެ 1 ވަނަ ދުވަހު މުމްބައިގައެވެ. އަދި މިއަދު އެދެމަފިރިން ވަނީ އެކުއްޖާއަށް ކިޔާ ނަން އިއުލާނު ކޮށްފައެވެ.
މީސްމީޑިއާ މެދުވެރިކޮށް އަމްރިތާ އާއި އޭނަގެ ފިރިމީހާ އާރްޖޭ އަންމޯލް ބުނެފައި ވަނީ އެމީހުންގެ ދަރިފުޅުގެ ނަމަކީ "ވީރް" ކަމަށެވެ.
ވިހެއުމަށްފަހު އަމްރިތާ ވަނީ ޓައިމްސް އޮފް އިންޑިއާ އަށް އިންޓަވިއުއެއް ދީފައެވެ. އޭނާ ބުނީ މިފަދަ ދަތި އަހަރެއްގައި "އާ ދިރިއުޅުމެއް" އުފަން ކުރެވުނީތީ ވަރަށް ބޮޑަށް އުފާވާ ކަމަށެވެ.
"ދަރިފުޅުގެ މޫނަށް ބަލާލާ ކޮންމެ ފަހަރަކު އަހަންނަށް ބުނެދޭން ވެސް ނޭނގޭ އުފާވެރި އިހުސާސްތަކެއް ކުރުވާ. އަހަންނަކީ 2020 ގެ މަންމައެއް" ވަރަށް އުފަލާއެކު އަމްރިތާ ބުނިކަމަށް ވެއެވެ.
"މޭ ހޫ ނާ" ، "ވިވާ" އަދި "އިޝްޤް ވިޝްޤް" ފަދަ ފިލްމުތަކުން ނުހަނު މަގުބޫލުކަމެއް ހޯދި އަމްރިތާ އަނެއްކާވެސް އެކްޓިންގެ ދާއިރާއާއި ގުޅުމަށް އޭނާގެ ވަރަށް ގިނަ ފޭނުން ވަނީ އެދިފައެވެ. އެއެދުމަށް އަމްރީތާ ބުނެފައިވަނީ ފަހަރެއްގައި އަންނަ އަހަރު ވެބް ސީރީޒަކުން އޭނާ ފެނިދާނެ ކަމަށާއި، ބައެއް ސްކްރިޕްޓުތައް ވެސް ލިބިފައިވާ ކަމަށެވެ.
