މަދިރިން ފެތުރޭ ބަލިތައް މަދުވެއްޖެ: އެޗްޕީއޭ
މަދިރީގެ ޒަރީޢާއިން ފެތުރޭ ބަލިތައް މިދުވަސްވަރު މަދުކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސް ހިސާބުތަކުން ދައްކައިފިއެވެ.
އެގޮތުން މަދިރީގެ ޒަރީޢާއިން އެންމެ އާއްމުގޮތެއްގައި ޖެހޭ ނުރައްކާތެރި ބައްޔެއް ކަމުގައިވާ ޑެންގޫ ޖެހިގެން މިއަހަރުގެ އޮގަސްޓު މަހު 20 މީހަކު ރިޕޯޓު ކޮށްފައިވާއިރު، ސެޕްޓެމްބަރު މަހު ރިޕޯޓު ކޮށްފައިވަނީ 12 މީހެކެވެ.
އެޗްޕީއޭ އިން ބުނެފައި ވަނީ އެހެން އަހަރުތަކާއި އަޅާބަލާއިރު، މިއަހަރުގެ މިދުވަސްވަރު ޑެންގޫ ޖެހުނު މީހުންގެ އަދަދު މިވަނީ ވަަރަށް ބޮޑުތަނުން މަދުވެފައި ކަމަށެވެ.
"މި ދުވަސްވަރު މަދިރީގެ ޒަރިއްޔާއިން ފެތުރޭ ބަލިތައް މަދު ކަމުގައި ވީ ނަމަވެސް ޑެންގޫ އާއި ޗިކުންގުންޔާ ފަދަ ބަލިތައް ކޮންޓްރޯލް ކުރުމަށާއި ބަލިން ރައްކާތެރިވުމަށް ސަމާލުކަން ދިނުމަކީ މުހިއްމު ކަމެއް" އެޗްޕީއޭ އިން މިއަދު ނެރުނު ބަޔާނުގައި ބުނެފައިވެއެވެ.
ޑެންގޫ ފަދަ ނުރައްކާތެރި ބަލިތަކުން ރައްކާތެރިވުމަށް، މަދިރި އުފެދި އާލާވާ ތަންތަން ނައްތާލުން ހިމެނެއެވެ. އެގޮތުން އުކާލާފައި ހުންނަ ދަޅު، ފުޅި ފަދަ ތަކެތި ނައްތާލުމާއި، ފެން ހެދިފައި ހުންނަ ތަކެތި ރަނގަޅަށް ދޮވެ ސާފު ކޮށްފައި ބެހެއްޓުން ހިމެނެއެވެ.
