ރަމަޟާން މަހުގައި ''އަބޫހުރައިރާ ޗެލެންޖް'' ، ޙަދީޘް އުނގެނެން ރަނގަޅު ފުރުސަތެއް!
މިއަހަރުގެ ރަމަޟާން މަސް ފެށެން ކަލަންޑަރު ކުރެވިފައިވާ ދުވަހަކީ އަންނަ ހުކުރު ދުވަހެވެ. ކޮވިޑް19ގެ ނުރައްކާތެރި މި ޙާލަތުގައި އަހަރެމެން ރަމަޟާންމަހާއި ކުރިމަތިލާއިރު ޙަޔާތުގެ ދުވަސްތަކާއި މެދު ފިކުރުކޮށް ނަޒަރު ހިންގާލުމަކީ މުހިންމު ކަމެކެވެ. ހަމައެހެންމެ ދިމާވާ މުސީބާތްތަކުން ފިލާވަޅު ލިބިގަނެ ، ﷲ ގެ މަގަށް ރުޖޫޢަވުމާއެކު އެ އިލާހުގެ ޞާލިޙް އަޅެއްގެ ގޮތުގައި ރަމަޟާންމަހާއި ކުރިމަތިލުމަކީ ބުއްދިވެރީން އިސްކުރާނެ ކަމެކެވެ. ހަމައެއާއެކު ރަމަޟާންމަހުގައި އެމަހުގެ ބަރަކަތާއި ސަވާބު ހޯދަން ގަދައަޅާ މަސައްކަތް ކުރާއިރު ޙަޔާތް ރޯޝަން ކުރާނެ ޢިލްމެއް ހޯދުމަކީ ކުރިމަގު އަލިކޮށްދޭނެ ކަމެކެވެ.
އެގޮތުން ޣަސީމް ޔުނިވަރސިޓީގައި ކިޔަވަމުންދާ ދިވެހި ދަރިވަރެއް ވަނީ ރަމަޟާން މަހަށް އެފަދަ ރަނުގެ ފުރުޞަތެއް ހުޅުވާލާފައެވެ. "އަބޫހުރައިރާ ޗެލެންޖް'' ގެ ނަމުގައި އޮންލައިންކޮށް ކުރިއަށް އޮތް ރޯދަމަހު ކުރިއަށް ގެންދިޔުމަށް ހަމަޖައްސާފައިވާ ޕްރޮގްރާމަކީ ކީރިތި ރަސޫލާ (ޞޢވ)ގެ ޙަދީޘްފުޅުތަކުގެ ތެރެއިން އަބޫހުރައިރާ ރިވާ ކުރައްވާފައިވާ 20 ޙަދީޘް ކިޔަވައިދިނުމުގެ ޕްރޮގްރާމެކެވެ.
މިޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ 20 ދުވަހުގެ މުއްދަތަށެވެ. ދުވާލަކު ޙަދީޘެއް ދަސްކޮށް ، ދަސްވި ޙަދީޘް ބެލެނިވެރިޔާއަށް ނުވަތަ އެކުވެރިޔާއަށް ކިޔައިދޭންޖެހޭއިރު ކުށަކާ ނުލައި ކިޔައި ދެވިއްޖެނަމަ އެކަން އަޑުއެހި މީހާ ނޯޓްކުރަންޖެހެއެވެ. މި ޕްރޮގްރާމްގައި ބައިވެރިވުމަށް ، ޕްރޮގްރާމް ކުރިއަށް ގެންދާ ޓެލްގްރާމް ގުރޫޕާއި ގުޅިވަޑައިގެން މަޢުލޫމާތު ހިއްސާކުރެއްވުމުން ފުދޭނެއެވެ. މި ގުރޫޕާއި ގުޅިވަޑައިގަތުމަށް ތިރީގައި އެވާ ލިންކަށް ފިއްތަވާލައްވާށެވެ.
https://t.me/AbuHurairaChallenge
މި ޕްރޮގްރާމް ކުރިއަށް ގެންދަވާ ، ފަރާތުން ''ދެން''އަށް މަޢުލޫމާތު ދެއްވި ގޮތުގައި މި ޕްރޮގްރާމްގެ މަޤްޞަދަކީ ރަސޫލުﷲ (ޞޢވ) ގެ ޙަދީޘް ފުޅުތައް ކުދިންގެ ހިތްތަކުގައި ހިތްތަކުގައި ހަރުލެއްވުމާއި ޙަދީޘްފުޅުތަކަށް ލޯބިޖައްސައިދީ ހިތު ދަސްކުރުމުގެ ރޫޙް އާލާ ކުރުމުގެ އިތުރުން ނަބިއްޔާ (ޞޢވ)ގެ މަތިވެރި އިރުޝާދުތަކުން އަޚްލާޤީ ފިލާވަޅުތައް ލިބިގަނެ އެއަށް ޢަމަލު ކުރުމަށް ހިތްވަރު ދިނުމާއި މާތް ނަބިއްޔާ ދެކެ ވާ ލޯބި އިތުރުކުރުމެވެ. މި ޕްރޮގްރާމްގައި ބައިވެރިވުމަށް ވަކި ޢުމުރެއް ނެތެވެ.
Ads by STO
