ސުނާމީ ބިނާއިން ފެށިގެން އެމްޕީއެލްއާ ދެމެދު ހުރި އުޅަނދުތައް ނަގަން އަންގައިފި

މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ތިންވަނަ ފިޔަވަހީގެ ޢަމަލީ މަސައްކަތް ފެށުމަށްޓަކައި، ސުނާމީ ބިނާ ސަރަޙައްދުން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް)އާ ހަމައަށް ހުރި އެންމެހާ އުޅަނދުތައް ނަގަން އަންގައިފިއެވެ.

ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ނެރުއްވި ބަޔާނެއްގައި ވިދާޅުވެފައި ވަނީ، މި ހިނގާ އޮކްޓޯބަރު 3ވަނަ ދުވަހުގެ ރޭ 11:00ގެ ކުރިން އުޅަންދުތައް ނެގުމަށާއި ކަނޑައެޅިފައިވާ ސުންގަޑީގެ ފަހުން އެ ސަރަޙައްދުގެ މަގުމަތީގައި ޕާކުކޮށްފައި ހުންނަ އުޅަނދުތަކާއި ފަޅުތެރޭގައި އަޅާފައިވާ އުޅަނދުފަހަރުތައް، އަންނަ ހޮނިހިރު ދުވަހުގެ ކުރިން ސަރުކާރުގެ ކަމާބެހޭ ފަރާތްތަކުން ނަގާނެ ކަމަށެވެ. މިއީ މަގު ހެދުމުގެ މަސައްކަތަށް ބޭނުންވާ މެޝިނަރީޒްތައް ގެނެސް، އަމަލީ މަސައްކަތް ހަލުވިކަމާ އެކު ކުރިއަށް ގެންދިއުމަށްޓަކައި އެޅުނު މުހިންމު ފިޔަވަޅެކެވެ.

މާލޭގެ ވަށާ ބޭރުމަގު، ނުވަތަ ރިންގް ރޯޑު ޒަމާނީ ފެންވަރަކަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ވަރަށް ޚާއްޞަ އަމާޒެކެވެ. ބޮޑުތަކުރުފާނު މަގުގެ ބޮޑު ބައެއްގެ މަސައްކަތް ފިޔަވަހިތަކަކަށް ބަހާލައިގެން ކުރިއަށްގެން ގޮސް މިހާރު އާންމުންނަށް ހުޅުވާލެވިފައިވާއިރު، މި މަޝްރޫޢުގައި ނުނިމި އޮތީ ހަމައެކަނި ނޯތު ހާބަރުން ފެށިގެން ސުނާމީ ބިނާ މައިޒާނާ ދެމެދުގައިވާ ސަރަޙައްދެވެ.

މި ބިޔަ މަޝްރޫޢުގެ ފަހު ފިޔަވަހި އެއްކޮށް ނިމުމުން މާލޭގެ ޓްރެފިކް ތޮއްޖެހުމުގެ މައްސަލައަށް ވަރަށް ބޮޑު ލުޔެއް ލިބިގެންދާނެ ކަމަށް ސަރުކާރުން ލަފާކުރައްވައެވެ. ޚާއްޞަކޮށް ބޭރުމަގުގައި ހުންނަ ސަރުކާރުގެ އޮފީސްތަކާއި، ވިޔަފާރި މަރުކަޒުތަކާއި ބާޒާރުމައްޗަށް ދިއުމަށް އާންމު ރައްޔިތުންނަށް ގިނަގުނަ ފަސޭހަތަކެއް ލިބިގެންދާނެއެވެ. މީގެ ކުރިން ތޮއްޖެހިފައި އޮތް ބޭރުމަގުގެ ބޮޑުބައެއް ހަދައި ނިމުމުން ވެސް ޓްރެފިކަށް ބޮޑު ލުޔެއް ލިބިފައިވާކަން ފާހަގަކުރެވެއެވެ.

މީގެ އިތުރުން، އަމީނީ މަގުގައި ކުރިން ތާރުއަޅައިގެން ހަދާފައިވާ ބައެއް ސަރަޙައްދުތައް ހަލާކުވެފައިވާތީ، އެ ތަންތަން މަރާމާތުކޮށް އަލުން ތާރުއެޅުމުގެ މަސައްކަތް ވެސް ސަރުކާރުން މިހާރު ދަނީ ކުރައްވަމުންނެވެ.