ޝައްކުކުރެވޭ މީހަކު ހުރެގެން އުލިގަން ކަރަންޓީން ކޮށްފި
ކޮވިޑް-19އަށް ޝައްކުކުރެވޭ މީހަކު ހުރެގެން ހއ. އުލިގަން ކަރަންޓީން ކޮށްފިއެވެ.
އުލިގަން ކަރަންޓީން ކުރަން ހެލްތު ޕްރޮޓެކްޝަން އެޖެންސީ (ޢެޗްޕީއޭ) އިން އުލިގަމު ކައުންސިލަށް އަންގާފައިވާ ކަމަށް އެ ރަށުގެ ކައުންސިލްގެ ރައީސް އަޙްމަދު މުއާޒް މުޙައްމަދު ވަނީ ބައެއް ނޫސްތަކަށް ކަށަވަރުކޮށްދެއްވާފައެވެ.
އެނގިފައިވާ ގޮތުގައި އުލިގަން ކަރަންޓީނު ކޮށްފައިވަނީ ނުރައްކާތެރި ކޮވިޑް-19 އަށް ޝައްކުކުރެވޭ އަލާމާތްތަކެއް އެރަށުގައި ހުރި މީހެއްގެ ފަރާތުން ފެނުމާއި ގުޅިގެން ޞިއްޙީގޮތުން އިތުރަށް ބަލަންޖެހޭ ކަންކަން ބެލުމަށްޓަކައެވެ.
ކައުންސިލްގެ ރައީސް ވިދާޅުވީ، އެޗްޕީއޭއިން ފާހަގަކުރާ ފަރާތް ހުރީ ހޯމް އައިސޮލޭޝަންގައި ކަމަށާއި، އެކަމާއި ގުޅިގެން ބަލަންޖެހޭ ކަންކަން ކޮވިޑް-19 ރަށު ޓާސްކްފޯސްއާއި ކައުންސިލް އަދި ހެލްތު ސެންޓަރު ގުޅިގެން ބަލަމުން އަންނަ ކަމަށެވެ.
ހއ. އުލިގަން ކަރަންޓީނު ކޮށްފައިވާއިރު، އެޗްޕީއޭއިން އިތުރު ގޮތަކަށް އަމަލުކުރަން އަންގަންދެން އެރަށަށް މީހުން އަރާ ފޭބުންވެސް ވަނީ މަނާކޮށްފައެވެ.
