މިއަދު ފައްސިވި 13 ބަންގްލަދޭޝް މީހުން މަސައްކަތް ކުރަނީ ލިލީ އެންޓްޕްރައިސްގައި
މިއަދު ފައްސިވި 13 ބަންގްލަދޭޝް މީހުން މަސައްކަތް ކުރަނީ ލިލީ އެންޓްޕްރައިސްގައި ކަމަށް ސަރުކާރުން ބުނެފިއެވެ.
މިއަދު އޮތް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ނޭޝަނަލް އެމަޖެންސީ އޮޕްރޭޝަން ސެންޓަރުގެ ތަރުޖަމާނު މުޙައްމަދު މަބްރޫބް ޢަޒީޒް ވިދާޅުވީ ކޮވިޑް19 އަށް ޕޮސިޓިވްވެގެން މިއަދު އިއުލާނު ކުރި 13 ބަންގްލަދޭޝް މީހުންނަކީ ލިލީ ކުންފުނީގައި މަސައްކަތް ކުރާ މީހުން ކަމުގައެވެ.
މީގެ ތެރޭގައި ހިމެނެނީ ކޭސް ނަންބަރު 37 ، 38 ، 39 ، 40 ، 41 ، 42 ، 43، 44، 45، 46، 47، 48 އަދި ކޭސް 49 އެކެވެ.
މި މީހުންނަކީ ލިލީ ގެ ފިހާރަތަކުގެ އިތުރުން ޑެލިވެރީގެ ހިދުމަތް ދިނުމުގައި ވެސް ހަރަކާތްތެރިވެފައިވާ މީހުން ކަން މަބްރޫކު ފާހަގަކުރެއްވިއެވެ. މީގެ އިތުރުން އެ 13 މީހުނަކީ ވެސް އެއް އިމާރާތެއްގެ ދެ ފަންގިފިލާގައި ދިރިއުޅެމުން އަންނަ މީހުން ކަން މަބްރޫކު ފާހަގަ ކުރެއްވިއެވެ.
މި ކޭސް ތަކާއި ގުޅިގެން ކޮންޓެކްޓް ޓްރޭސިން ގެ މަސައްކަތް ވަރަށް ބާރަށް ކުރިއަށް ދަމުންދާ ކަމުގައި ވެސް މިއަދު އޮތް ނޫސްވެރިންގެ ބައްދަލުވުމުގައި ވަނީ ފާހަގަކޮށްފައެވެ.
އަދި މިކަން ކަމާއި ގުޅިގެން މިހާތަނަށް 18 ތަނެއް ވަނީ ލޮކްޑައުން ކުރެވިފައެވެ.
މާލެއިން އެކަނިވެސް މިއަދު 16 މީހެއްގެ ގައިންވަނީ ވައިރަސް ފެނިފައެވެ. އޭގެ ތެރޭގައި ލިލީ ގެ 13 މުވައްޒަފުންގެ އިތުރުން 28 އަހަރުގެ ދިވެހި ފިރިހެނަކާއި އަމީންހިޔާ އަށް ބަދަލުކޮށްފައިވާ 27 އަހަރުގެ ބަންގްލަދޭޝް ފިރިހެނެއް ހިމެނެއެވެ. މީގެ އިތުރުންވެސް އިންޑިއާގެ ދެ ރައްޔިތަކު ވެސް ވަނީ މިއަދު ވައިރަހަށް ފައްސިވެފައެވެ.
މާލެއިން ވައިރަހަށް ފައްސި ވި މީހުންގެ އަދަދު 31 އެކަކަށް އަރާފައިވާއިރު ރާއްޖެއިން ބައްޔަށް ފައްސިވި މީހުންގެ އަދަދު ވަނީ 51 އަކަށް އަރާފައެވެ.
