އިތުރު 6 ވެންޓިލޭޓަރު ގެނެސްފި، ޖުމްލަ 97 ވެންޓިލޭޓަރު އެބަހުރި: މަބްރޫކް
މިއަދު ރާއްޖެއަށް 6 ވެންޓިލޭޓަރު ގެނެސްފައިވާ ކަމަށާއި މިހާރު ޖުމްލަ 97 ވެންޓިލޭޓަރު އެބަހުރި ކަމަށް ކޮވިޑް-19ގެ ތަރުޖަމާނު މުހައްމަދު މަބުރޫކް އަޒީޒް ވިދާޅުވެއްޖެ އެވެ.
މިއަދުއޮތް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މަބްރޫކު ވިދާޅުވީ މިވަގުތު ރާއްޖޭގައި 97 ވެންޓިލޭޓަރު އަދި 77 އައިސީޔޫ އެނދު ރާއްޖޭގައި އެބަހުރި ކަމަށެވެ.
މީގެ އިތުރުންވެސް 135 އައިސީޔޫ ވެންޓިލޭޓަރާއި 14 ޓްރާންޕޯޓަބަލް ވެންޓިލޭޓަރު ހޯދުމުގެ މަސައްކަތް ކުރަމުން އަންނަ ކަން ވެސް މަބްރޫކު ފާހަގަކުރެއްވިއެވެ. އަދި މީގެ ތެރެއިން 6 ވެންޓިލޭޓަރު ރާއްޖެ ގެނެސްފައިވާ ކަން ފާހަގަ ކުރައްވަމުން މަބްރޫކު ވިދާޅުވީ މިމަސް ތެރޭގައި އިތުރު ވެންޓިލޭޓަރު ލިބޭނެ ކަމުގެ މައުލޫމާތު ލިބިފައިވާ ކަމަށެވެ.
މީގެ އިތުރުންވެސް ޗައިނާ ސަރުކާރުން ހަދިޔާ ކުރާ 10،000 ޓެސްޓު ކިޓާއި، ޖެކް މާ ހަދިޔާ ކުރާ 10،000 ޓެސްޓު ކިޓު ވެސް މި ހަފްތާ ތެރޭގައި ލިބިގެންދާނެ ކަމަށް ވެސް މަބްރޫކު ވިދާޅުވިއެވެ.
މާލެއިން އެކަނިވެސް މިއަދު 16 މީހެއްގެ ގައިންވަނީ ވައިރަސް ފެނިފައެވެ. މާލެއިން ވައިރަހަށް ފައްސި ވި މީހުންގެ ޖުމްލަ އަދަދު 31 އެކަކަށް އަރާފައިވާއިރު ރާއްޖެއިން ބައްޔަށް ފައްސިވި މީހުންގެ އަދަދު ވަނީ 51 އަކަށް އަރާފައެވެ.
