ގޭގެއަށް "ތާޒާ" ފެން ގެންގޮސް ދިނުން ހުއްޓާލައިފި
ގޭގެއަށް 'ތާޒާ' ފެން ގެންގޮސްދިނުމުގެ ހިދުމަތްހުއްޓާލުމަށް އައިލެންޑް ބެވަރޭޖަސް ކުންފުނިން ނިންމައިފި އެވެ.
އެކުންފުނިން ނެރުނު ބަޔާނެއްގައިވާ ގޮތުން ގޭގެޔަށް ފެން ގެންގޮސްދިނުން ހުއްޓާލަން ނިންމާފައިވަނީ ކޮވިޑް-19 އާ ގުޅިގެން މިހާރު މި އޮތް ހާލަތާއެކު ގޭގެ އަށް ފެން ގޮސް ދިނުމަށް މި ވަގުތު ދިމާވެފައިވާ ބޮޑެތި ގޮންޖެހުންތަކުގެ ސަބަބުން ކަމަށެވެ.
ކޮވިޑް19 އާއި ގުޅިގެން ކޮށްފައިވާ ލޮކްޑައުންގެ ސަބަބުން ތާޒާ ފެނުގެ ޑިމާންޑު ބޮޑުވެ އެކުންފުނިން ވަނީ ފުލުހުން މެދުވެރިކޮށް ވެސް ޑެލިވެރީ ކުރިއަށް ގެންގޮސްފައެވެ.
އަދި އެކަމުގައި އެކުންފުނީގެ އެމްޑީ ވެސް އަމަލީ ގޮތުން ބައިވެރިވި ކަން ފާހަގަކޮށްލަން ޖެހެއެވެ.
ވަކި ވަކި ގޭގެއަށް ފެން ގެންގޮސްދިނުން ހުއްޓާލިނަމަވެސް މާލެ ސަރަހައްދާއި ރާއްޖޭގެ އެހެނިހެން ސަރަހައްދު ތަކަށް ދަތި ނުވެ ތާޒާ ފެން، ލިބޭނެ އިންތިޒާމު ހަމަޖެއްސުމުގެ ގޮތުން، މާލެ ސަރަހައްދުގެ ފިހާރަތަކާއި ރަށްރަށުން އަންނަ ދޯނި ފަހަރަށް ފެން ފޯރުކޮށް ދޭނެ ކަމަށް ވެސް އެކުންފުނިން މައުލޫމާތު ދެއެވެ.
ކޮވިޑް19 އާއި ގުޅިގެން މާލޭގައި ވަނީ 14 ދުވަހުގެ ލޮކްޑައުން އެއް އިއުލާނުކޮށްފައެވެ. އެއާއެކު ހުއްދަ ލިބިގެން ނޫނީ ބޭރަށް ނިކުތުން ވެސް ވަނީ މަނާކޮށްފައެވެ. މިކަމުގެ ސަބަބުން ގޭގެއަށް ކާބޯތަކެއްޗާއި ޒަރުރީ އެހެން ބޭނުން ތަކަށް ބޭނުން ވާ އެއްޗެހި ފޯރުކޮށްދެނީ ޑެލިވެރީ މެދުވެރިކޮށެވެ.
