ކޮވިޑް19 ޖެހިގެން މަރުވާ މީހުން ކަށުކަމާކެމީގެ ކަންކަން ކުރާނެގޮތް އިސްލާމިކް މިނިސްޓްރީ އިން ކިޔާދީފި
ކޮވިޑް19 ޖެހިގެން މަރުވާ މީހުން ކަށު ކަމާކެމީގެ ކަަންކަން ކުރިއަށް ގެންދާނެ ގޮތް ރާއްޖޭގައި ތިއްބެވި ޑޮކްޓަރުންގެ ލަފާގެ މަތިން އެމްއެންޑީއެފް ގެ ފަރާތުން ކަނޑައަޅާފައިވާ ފަރާތްތަކަށް، އިލްމުވެރިން ކިޔާދެއްވައިފިއެވެ. ކަށުކަމާކެމީގެ މަސައްކަތް ހަވާލުކޮށްފައިވަނީ އެމްއެންޑީއެފް އާ ކަމުގައި މައުލޫމާތު ލިބެއެވެ.
މިނިސްޓްރީ އޮފް އިސްލާމިކް އެފެއާޒް އިން މިކަން އެ މިނިސްޓްރީގެ ރަސްމީ ފޭސްބުކު ޕޭޖުގައި ވަނީ ހާމަކޮށްފައެވެ.
ނަމަވެސް މިކަމާއި ގުޅިގެން އިތުރު މައުލޫމާތެއް އެފަރާތުން ދީފައެއް ނުވެއެވެ.
މިއަދު އެކަނިވެސް ރާއްޖެއިން 17 މީހެއްގެ ގައިންވަނީ ވައިރަސް ފެނިފައެވެ. މާލެއިން ވައިރަހަށް ފައްސި ވި މީހުންގެ ޖުމްލަ އަދަދު 31 އެކަކަށް އަރާފައިވާއިރު ރާއްޖެއިން ބައްޔަށް ފައްސިވި މީހުންގެ ޖުމްލަ އަދަދު ވަނީ 52 އަކަށް އަރާފައެވެ.
ކޮވިޑް19 ކޮންޓްރޯލް ކުރުމުގެ ގޮތުން ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން މާލެ ލޮކްޑައުން ކޮށް ރާއްޖޭގެ ރަށްތަކަށް އަރާފޭބުން ވަނީ މަނާކޮށްފައެެވެ. މީގެ އިތުރުންވެސް މީހުން އެއްވެ އުޅުން މަނާކޮށް ރާއްޖޭގެ މިސްކިތްތަކުގައި ޖަމާއަތުގައި ނަމާދުކުރުން ވެސް ވަނީ މަނާކޮށްފައެވެ.
ރާއްޖޭގައި ކޮވިޑް19 ގެ ނުރައްކާ ބޮޑުވަމުން އަންނައިރު ކަމާބެހޭ ފަރާތްތަކުން ދަނީ ވައިރަހުގެ ޕީކް ނުވަތަ އެންމެ ބޮޑަށް ހާލަތު ގޯސްވާނެ އިރަށް ދުރާލާ ތައްޔާރުވަމުންނެވެ.
