އައިޖީއެމްއެޗުގައި މައްޔިތުންގެ މޫނު ދެއްކުން ވަގުތީ ގޮތުން މެދު ކަނޑާލައިފި
ސަރުކާރުގެ މައި ހޮސްޕިޓަލް، އައިޖީއެމްއެޗް އިން މައްޔިތުންގެ މޫނު ދެއްކުން ވަގުތީގޮތުން ހުއްޓާލައިފިއެވެ.
ރޭ އައިޖީއެމްއެޗުން ނެރުނު ބަޔާނެއްގައި ބުނީ، ބަލީގެ ޢަލާމާތްތައް ނުފެނި ގިނަ ޢަދަދެއްގެ ބަޔަކު ތިބޭނެކަމަށް ކަމާބެހޭ ތަޖުރިބާކާރުން ބުނަމުންދާއިރު، މިފަދަ ހާލަތެއްގައި ހޮސްޕިޓަލު ތެރެއަށް މި ބަލި ވަދެ، ޑޮކްޓަރެއް، ނަރުހެއް ނުވަތަ އެނޫންވެސް މުވައްޒަފަކަށް މި ބަލި ޖެހިއްޖެނަމަ އެއީ މުޅި މުޖުތަމަޢުއަށް ނުރައްކާތެރިކަން އެތައް ގުނައަކަށް އިތުރުވެގެން ދާނެ ކަމެއް ކަމަށެވެ.
އެގޮތުން މި ވަގުތު މާލޭގައި ކޮމިއުނިޓީ ސްޕްރެޑް އޮތް ހާލަތަށް ބަލާއިރު ހޮސްޕިޓަލުތަކުގައި މޫނު ދެއްކުމަކީ ރައްކާތެރި ކަމެއް ނޫންކަން ބަޔާންކޮށް ބަޔާނުގައި އިތުރަށް ބުނީ، އައިޖީއެމްއެޗްގައި މީހަކު ނިޔާވުމުން މައްޔިތާގެ މޫނު ދެކިލުމަށް ނުވަތަ އެނޫންވެސް ގޮތަކުން މައްޔިތާ ދެކިލުމަށް އެދޭ ފަރާތްތަކުން، މާލޭ ސިޓީ ކައުންސިލުންނާއި މިނިސްޓްރީ އޮފް އިސްލާމިކް އެފެއާޒުން ސަހަރާގައި އެ އިންތިޒާމުތައް ހަމަޖައްސަވާ ގޮތަކަށް ޢަމަލުކުރުމަށް އެދޭ ކަމަށެވެ.
ކޯވިޑް-19 އަށް ރާއްޖެއިން އަދި މިހާތަނަށް އެންމެ ގިނަ ބަޔަކު މިބައްޔަށް ފައްސިވެފައި ވަނީ އިއްޔެއެވެ.
އެގޮތުން އިއްޔެ މެންދުރެއްހާއިރު މާލެއިން ބަންގްލަދޭޝްގެ 14 ރައްޔިތަކު މިބައްޔަށް ފައްސިވެފައިވާއިރު އޭގެ ތެރެއިން 13 މީހުންނަކީ ލިލީ އެންޓަޕްރައިސަސްގަ މަސައްކަތް ކުރާ ބަންގްލަދޭޝް ރައްޔިތުން ތަކެކެވެ.
