މިއަދު ފައްސިވި މީހުންގެ ތެރޭގައި 60 އަހަރުން މަތީގެ މީހެއް ހިމެނޭ: ޑރ. ނަޒްލާ
މިއަދު ފައްސިވި މީހުންގެ ތެރޭގައި 60 އަހަރުން މަތީގެ މީހެއް ހިމެނޭ ކަމަށް އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގް ވިދާޅުވެއްޖެއެވެ.
މިހާރު ކުރިޔަށްދާ ނޫސްވެރިންގެ ބައްްދަލުވުމެގައި ޑރ.ނަޒްލާ ވިދާޅުވީ، މިއަދު ޕޮޒިޓިވް މީހުންގެ ތެރޭގައި 60 އަހަރުން މަތީގެ މީހަކު ހިމެނޭ ކަމާއި ނަމަވެސް މިހާތަނަށް ޕޮޒިޓިވްވި އެއްވެސް މީހެއްގެ ހާލު ސީރިއަސްއެއް ނޫން ކަމަށެވެ.
މިއަދު މިހާތަނަށް 8 މީހަކު މާލެއިން ޕޮޒިޓިވްވެފައިވާއިރު، މީގެ ތެރޭގައި 6 ދިވެހި މީހުންނާއި 2 ބަގްލަދޭޝް މީހުން ހިމެނެއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ މަބްރޫކް ވިދާޅުވީ، މިހާތަނަށް 4،000 އަށްވުރެ ގިނަ ސާންޕަލް ނަގާފައިވާ ކަމަށާއި 3،834 ސާމްޕަލްއެއް ނެގަޓިވްވެފައިވާ ކަމަށެވެ.
"މިހާތަނަށް 4000 އަށް ވުރެ ގިނަ ސާމްޕަލް ވަނީ ނެގިފައި. އޭގެތެރެއިން 3،834 ސާމްޕަލްއެއް ނެގަޓިވް. ނަތީޖާ ނުލިބެނީ 245 ސާމްޕަލެއް. މިހާތަނަށް 16 މީހަކަށް ޝިފާ ލިބިފައި ވަނީ. މިހާރު ފަރުވާ ދެނީ 42 މީހުންނަށް. 903 މީހުން ފާޙަގަ ކުރެވިފައި ވަނީ ކޮންޓެކްޓް ޓްރޭސިން ހެދިއިރު، އަދި 152 ތަނެއް އޮތީ މޮނިޓަރިން ހާލަތަށް ގެނެސްފައި. ވިލިވަރުން ތިން މީހަކު ދޫކޮށްލެވިފައި ވަނީ." މަބްރޫކް ވިދާޅުވިއެވެ.
