ވިހަން ،މަދު ހަފްތާތަކަށް ވެފައި އިން ދެކުދިންގެ މަންމަގެ އާދޭސް: މިއުޅެނީ އެކަނި، ނާދެވިފައި ހުރި ފިރިމީހާ ގެނެސްދީ!
ރާއްޖެއަށް ކުރިމަތިވެގެން މިއުޅޭ ކޮވިޑް19ގެ މި އުނދަގޫ ޙާލަތުގައި އަހަރެމެންގެ ދިރިއުޅުމަށް މިވަނީ ބޮޑެތި ބަދަލުތަކެއް ގެނުވާފައެވެ. ފުރަބަންދާއެކު އެތަކެއް އާއިލާތަކެއް މިވަނީ ބައިބައިވެފައެވެ. އާއިލާއާ ވަކިވެ މާލޭގައި އެތަކެއް ދިވެހިންނެއް ވަނީ ގިލަންވެރިކަމުގައެވެ.
މާލޭގައި ދެ ދަރިންނާއެކު އުޅެމުންދާ ހައްވާ ރަމީޒާ ވެސް މިވަނީ އޭނާގެ ފިރިމީހާއާ ވަކިވެ މާބަނޑު ދުވަސްވަރު ހިތާމައިގެ ރަޖާ އަޅަން ޖެހިފައެވެ.
ފޭސްބުކްގައި ރަމީޒާ ކުރި ޕޯސްޓެއްގައި ބުނެފައި ވަނީ އޭނާ އަކީ މާލޭގައި ދިރިއުޅޭ 30 ވަނަ ހަފްތާ ގުނަމުންދާ މާބަނޑު އަންހެނެއް ކަމަށެވެ.
"އަޅުގަނޑުގެ ފިރިމީހާ ވަނީ އޭނާ މަސައްކަތް ކުރާ ރިސޯޓުގައި ތާށިވެފައި. މިހާރު 40 ދުވަސް ވެދާނެ. 14 ދުވަހުގެ ކަރަންޓީން ވެސް ފުރިހަމަ ކޮށްފި" ރަމީޒާ ބުންޏެވެ.
ރަމީޒާ ބުނީ އެޗްޕިއޭއިން ފިރިމީހާއަށް ރިސޯޓުން ފޭބުމުގެ ހުއްދަ ދިނީ މި މަހުގެ 16 ވަނަ ދުވަހު ކަމަށާއި ނަމަވެސް މާލެ ލޮކްޑައުން ކުރުމާ ގުޅިގެން އޭނާ އަށް މާލެ އާދެވޭނެ ގޮތެއް ނެތް ކަމަށެވެ
"އަޅުގަނޑު އެކަނި މިއުޅެނީ ދެ ދަރިން ގޮވައިގެން މާލޭގައި ، މި އުނދަގޫ ވަގުތުގައި ވެސް މި މަސް ނިމޭ އިރަށް އެބަޖެހޭ ގެ ބަދަލުކުރަން ވެސް. ފުލުހުންނަށް މި މައްސަލަ ހުށަހެޅިތާ 3 ދުވަސް ވެއްޖެ. ޖަވާބެއް ނުލިބޭ." ރަމީޒާ ބުންޏެވެ.
