މާދަމާއިން ފެށިގެން ހެނދުނު 9 އިން ދަންވަރު 12 އަށް ފިހާރަތައް ހުޅުވޭނެ

މާދަމާ އިން ފެށިގެން ރާއްޖޭގެ ހުރިހާ ރަށްރަށުގައި ފިހާރަތައް ހުޅުވާފައި ބެހެއްޓޭނީ ހެނދުނު 9:00 އިން މެންދަމު 12:00 އަށް ކަމަށް އިކޮނޮމިކް މިނިސްޓްރީ އިން ބުނެފި އެވެ.

Ads by MWSC

އެމިނިސްޓްރީން ބުނީ، ސިއްހީ ކުއްލި ނުރައްކަލުުގެ ހާލަތުގައި ގޭން ބޭރަށް ނިކުތުން މަނާކޮށްފައިވީ ނަމަވެސް، ޒަރޫރީ ބޭނުންތަކަށް ވަކި ވަގުތެއްގައި ގެއިން ބޭރަށް ނިކުތުމުގެ ހުއްދަ ފުލުހުން މިހާރު ދެމުން އަންނާތީ، އެހެން ކަމުން، ޒަރޫރީ ބޭނުންތަކަށް މުދާ ވިއްކާ ފިހާރަތަކަށް މީހުން ގޮސް، ހިދުމަތް ހޯދުމަށް ޓަކައި އެޕްރީލް 22، މާދަމާއިން ފެށިގެން، ރާއްޖޭގައި މީހުން ދިރިއުޅޭ ރަށްރަށުގައި ފިހާރަތައް ހުޅުވާފައި ބެހެއްޓޭނީ، ހެނދުނު 9:00 އިން ދަންވަރު 12:00 އާ ދެމެދު ކަމަށް މިނިސްޓްރީގެ އިއުލާނުގައިވެ އެވެ.

އެ މިނިސްޓްރީން ބުނެފައިވަނީ، ކަސްޓަމަރު ފިހާރައަށް އައުމުގެ ކުރިން ފިހާރަތަކުން އޯޑަރު ނެގޭނެ އިންތިޒާމް ހަމަޖެއްސުމާއި އޮންލައިން ޕޭމަންޓާއި ޓްރާންސްފާގެ ހިދުމަތް ފިހާރަތަކުން ގާއިމް ކުރުމަށް ވެސް މިނިސްޓްރީއިން ވަނީ އިރުޝާދު ދީފަ އެވެ.

ފިހާރަތަކުން އަޅަން ޖެހޭ އިތުރު ފިޔަވަޅުތައް:

• ބަލީގެ އަލާމާތެއް ހުރި އެއްވެސް މުވައްޒަފަކު ވަޒީފާއަށް ނެރެގެންނުވާނެ.

• ފިހާރައިގައި މަސައްކަތްކުރާ ކޮންމެ މުވައްޒަފަކުވެސް ހިދުމަތްދޭ ގަޑީގައި ހުންނަންވާނީ މާސްކު އަޅައި އަންގިލައްވައިގެން. އަދި އަމިއްލަ ސާފުތާހިރުކަމަށް ސަމާލުކަންދޭންވާނެ.

• ފިހާރައަށް ކަސްޓަމަރުން ދިޔުމުގެ ކުރިން، ފޯނުން ގުޅައިގެން އޯޑަރު ދެވޭނެ ނިޒާމެއް ގާއިމްކުރެވޭނަމަ، އެނިޒާމް ގާއިމްކޮށްގެން ހިދުމަތް ދިނުމަށް އިހުތިޔާރުކުރުން.

• ކަސްޓަމަރު އަންނަ ގަޑިއަށް މުދާ ތައްޔާރަށް ބެހެއްޓުން.

• ހިދުމަތް ހޯދާ ކަސްޓަމަރަށް ފުލުހުން ދޫކޮށްފައިވާ ހުއްދައިގެ ތަފްސީލު ލިޔުމުން ނުވަތަ އިލެކްޓްރޯނިކް ވަސީލަތެއްގައި އެފިހާރައަކުން ރެކޯޑްކޮށް، ބެލެހެއްޓުން.

• ފިހާރަތަކުން ގަންނަ ތަކެއްޗަށް ފައިސާ ދެއްކުމުގައި އޮންލައިން އިންތިޒާމްތައް ހަމަޖެއްސުން. އަދި އެކައުންޓައް ފައިސާ ޖަމާކުރެވޭނެ އިންތިޒާމް (ބޭންކް ޓްރާންސްފާ) ހަމަޖެހިފައިވާނަމަ، އެކައުންޓްގެ ތަފްސީލު ފަސޭހައިން ފެންނާނެހެން ފިހާރަތަކުގައި ޑިސްޕްލޭކޮށްފައި ބެހެއްޓުން.

• ފިހާރަތަކުން ހިދުމަތް ދިނުމުގައި ގިނަ ކަސްޓަމަރުން އެއްފަހަރާ ފިހާރައިގެ ތެރެއަށް ވެއްދުމުގެ ބަދަލުގައި މަދުމަދުން ކަސްޓަމަރުން ވެއްދުމަށް އިހުތިޔާރުކުރުން.

• އެއްފަހަރާ އެކުގައި ފިހާރައަށް ވަންނަ، ކަސްޓަމަރުންނަށް މަދުވެގެން އެއް މީޓަރުގެ ގައިދުރުކުރުން ބެހެއްޓޭނެ ފަދަޔަކުން ކަސްޓަމަރުން ވެއްދުމަށް އިންތިޒާމްތައް ހަމަޖެއްސުން.

• ކޮންމެ ދުވަހެއްގެވެސް ވިޔަފާރި ވަގުތު ނިމުމުން، ފިހާރައިގެ ތަޅުންގަނޑާއި ކަސްޓަމަރުންގެ އަތްޖެހޭ ސާފޭސް ރަނގަޅަށް ޑިޓޯލް ނުވަތަ ސައިބޯނި ފެނުން ޑިސްއިންފެކްޓްކުރަންވާނެ.

ފިހާރަތަކުން ތަކެތި ގަންނަ ފަރާތްތަކުން އަމަލު ކުރަންވީ ގޮތުގެ އިރުޝާދުތައް ވެސް މިނިސްޓްރީ އިން ވަނީ އާންމުކޮށްފަ އެވެ. އެގޮތުން ފިހާރައިން ބޭރުގައި ކިއު ހަދަން ޖެހިއްޖެ ނަމަ އެކަކު އަނެކަކު ދޭތެރޭ އެއް މީޓަރު ދުރުގައި ކިއު ހެދުމާއި ފިހާރަ ތެރޭގައި ހުންނަ ތަކެތީގައި އަތްލާ ނުހެދުން އަދި ފިހާރައިގެން ނިކުމެ ވީހާ އަވަހަކަށް އަތް ދޮވުން ސެނިޓައިޒް ކުރުމަށް ސަމާލުކަން ދިނުމަށް ވެސް މިނިސްޓްރީއިން ވަނީ އިލްތިމާސްކޮށްފަ އެވެ. މީގެ އިތުރުން ދީފައި ހުރި އެހެން އިރުޝާދުތަކަކީ؛

• ތަކެތި ގަތުމުގައި ބާސްކެޓް ނުވަތަ ޓްރޮލީ ބޭނުންކުރާނަމަ، އެތަކެތި ހުރީ ޑިސްއިންފެކްޓް ކޮށްފައިތޯ ކަށަވަރުކުރުން.

• ފިހާރައަށް ދާން ނުކުންނަންވާނީ ސައިބޯނި ލައިގެން އޮތްދޮވެގެންނެވެ. އަދި އިހުތިޔާރުކުރަނީ ސެނިޓައިޒްކުރަންނަމަ، އަމިއްލަ ސެނިޓައިޒާ ހިޔާރުކުރުން.

• ފިހާރަތެރޭގައި ހުންނަ ތަންތަނުގައި ނުވަތަ ސާފޭސްތަކުގައި އަތްނުލުމަށް ސަމާލުކަންދިނުން.

• ގަންނަން ބޭނުންވާ މުދަލުގައި އެކަނި އަތްލުމަށް ސަމާލުކަންދިނުން.

• ފިހާރަތެރޭގައި މީހުންނާ މުއާމަލާތްކުރުމަށް މަޑުނުކުރުން.

• ފިހާރަތަކުން ގަންނަ މުދަލަށް ފައިސާ ދެއްކުމުގައި އޮންލައިންކޮށް ފައިސާ ދެއްކޭނެ އިންތިޒާމްތައް ހިޔާރުކުރުން.