ޖޭޕީ އާއި އެމްއާރްއެމުން ވެސް އެމްޑީޕީއާއެކު ކޯލިޝަން ހަދާނެކަމުގެ އުއްމީދު އެބައޮތް: ރައީސް ޞާލިޙް

މި އަހަރުގެ ރިޔާސީ އިންތިހާބަށް އެމްޑީޕީއާ އެކު ޖުމްހޫރީ ޕާޓީ އާއި އެމްއާރްއެމުން ވެސް ކޯލިޝަން ހަދާނެކަމުގެ އުއްމީދު އެބަ އޮތް ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ޞާލިޙް ވިދާޅުވެއްޖެއެވެ.

ރައީސް މިފަދައިން ވިދާޅުވީ ތ. ހިރިލަންދޫ ސްކޫލްގެ 71 ވަނަ އަހަރީ ދުވަސް ފާހަގަކުރަން އެ ރަށަށް ވަޑައިގެން ރޭ އެ ރަށުގެ އެމްޑީޕީ ސަޕޯޓަރުންނާ އެކު ބޭއްވި ބައްދަލުވުމެއްގައި ދެއްކެވި ވާހަކަފުޅުގައެެވެ.

ރައީސް ޞާލިޙް ވިދާޅުވީ ކޯލިޝަނަކާ ނުލައި އިންތިހާބުގައި އެއް ބުރުން ކާމިޔާބު ނުކުރެވޭނެ ކަމަށެވެ. އަދި އެމްއާރުއެމާއި ޖޭޕީން ވެސް އެމްޑީޕީއާ އެކު ކޯލިޝަން ހަދާނެކަމުގެ އުންމީދު އެބައޮތް ކަމަށް ރައީސް ވިދާޅުވިއެވެ.

މީގެ އިތުރުން ކޯލިޝަންގައި މިވަގުތު ތިބި ހުރިހާ ޕާޓީތައް، އަދާލަތަށާއި، ޖުމްހޫރީ ޕާޓީއަށާއި އަދި އެމްއާރްއެމްއަށް ކޯލިޝަން ހެދުމަށް ދައުވަތު ދީފައިވާ ކަމަށާއި އެކަމުގެ ރަނގަޅު ނަތީޖާ ވަރަށް އަވަހަށް ފެނިގެންދާނެ ކަމަށް ރައީސް ޞާލިޙް ވިދާޅުވިއެެވެ.