އެމްބިޔުލެންސް ޑްރައިވަރެއްގެ އިލްތިމާސް: އަހަރެމެންވެސް ރައްކާތެރިކަން ބޭނުންވޭ، ޙޮސްޕިޓަލަށް ދާން ގުޅުއްވާއިރު ސައްޙަ މައުލޫމާތު ދެއްވާ!
ކޮވިޑް19 އާއި ގުޅިގެން މުޅި މާލެ ފުރަބަންދުކޮށް އެންމެން ބިރުވެރިކަމެއްގައި ތިބޭ ދުވަސްވަރުގަައި ސިއްޙީ ޚިދުމަތްތެރިން ދަނީ ވަރަށް ބޮޑު ޤުރުބާނީއެއް ވަމުންނެވެ. އެގޮތުން ޑަކްޓަރުންނާއި ، ނަރުހުން އަދި ލެބް ޓެކްނީޝަނުންގެ ނަންތައް ފާހަގަކޮށް ގިނަ ބަޔަކު ދަނީ ޝުޢޫރުފާޅުކުރަމުންނެވެ.
ސިއްޙީ ދާއިރާގައި މަސައްކަތް ކުރާ އެންމެންނަކީވެސް ޤައުމީ ޚިދުމަތްތެރިންނެވެ. ބަލިމީހަކު ބަލާ އެންމެ ފުރަތަމަ ދަނީ އެމްބިއުލާންސް ޑްރައިވަރުންނެވެ.
ފުރަބަންދުގެ މި ޙާލަތުގައިވެސް ބަލިމީހުން އުފުލުމުގައި ހަރަކާތްތެރިވަނީ އެމްބިއުލާންސް ޑްރައިވަރުންނެވެ. ހޮސްޕިޓަލަށް ޑަކްޓަރަށް ދައްކަން ނުވަތަ އިމަޖެންސީވެގެން ދާން ބޭނުންނަމަ، އެކަން ކުރެވޭނެގޮތް ހަސްފަތާލުން ވަނީ އިންތިޒާމުކޮށްފައެވެ.
މި އިންތިޒާމްގެ ދަށުން އެމްބިޔުލެންސް ޑްރައިވަރާއި އެހީތެރިންނަށް ރައްކާތެރިކަމުގެ ވަސީލަތްތައް ބޭނުން ކުރަން އިރުޝާދު ދެއްވާފައިވަނީ ހޮސްޕިޓަލަށް ގެންދާ ބަލި މީހާގެ ހާލަތަށް ރިއާޔަތްކުރާ ގޮތަށެވެ. އެގޮތުން އާންމުކޮށް މާސްކް ބޭނުން ކުރާއިރު ރައްކާތެރިކަމުގެ ސޫޓް ބޭނުން ކުރެވެނީ ހަމައެކަނި ކޮވިޑް19 އަށް ޝައްކު ކުރެވޭ މީހުން ގެންދާއިރު އެކަންޏެވެ.
"ދެން" އާއި ވާހަކަ ދެއްކި އެމްބިއުލެންސް ޑްރައިވަރަކު ބުނީ ހޮސްޕިޓަލަށް ދާން ގުޅާ މީހުން ބައެއް ފަހަރު ޞައްޙަ މައުލޫމާތު ނުދޭ ކަމަށާއި މިއީ އެމީހުންގެ ވަރަށް ބޮޑު ކަންބޮޑު ވުމެއް ކަމަށެވެ.
"އަހަރެމެންނަށް ސޫޓް ލާން އޮންނަނީ ހަމައެކަނި ކޮވިޑަށް ޝައްކު ކުރެވޭ މީހުން ގެންނައިރު އެކަނި ، އެކަމަކު އާންމު ބަލިތަކުގައި ގުޅާ މީހުން ވެސް ، އައިސް ކޮވިޑަށް އެބަ ޓެސްޓްކުރޭ ، ދެން ކޮބާ އަހަރެމެންގެ ރައްކާތެރިކަން" ކަންބޮޑުވެފައި ހުރި ޑްރައިވަރު ބުންޏެވެ.
އޭނާ ބުނީ ހޮސްޕިޓަލަށް ދާން ގުޅުއްވާ މީހުން ކޮވިޑްގެ އަލާމަތް ހުއްޓަސް އެކަންކަންވެސް ފޮރުވާ އޮޅުވާލާކަމަށެވެ. އެހެން ކަމުން ބަލިމީހާ ބަލާދާން އޮންނަ އުސޫލުގެ ދަށުން އެންމެ ރައްކާތެރި ރަނގަޅުގޮތުގައި ތައްޔާރު ނުވެވޭ ކަމަށެވެ.އަދި ސައްހަ މަައުލޫމާތު ދިނުން އެދޭ ކަމަށާއި ހޮސްޕިޓަލުން ވެސް އެމީހުންގެ ރައްކާތެރިކަމަށް އިތުރަށް ވިސްނުން އެދޭ ކަމަށް އޭނާ ބުންޏެވެ.
ބަލިވެގެން ހަސްފަތާލަށް ގެންނަ މީހާ ދޭ މައުލޫމާތުގެ ސަބަބުން އަނެކާ ނުރައްކަލަކަށް ދުއްވާނުލުމަށް އޭނާ ވަނި އެދިފައެވެ. އަދި ބަލި މީހުންނަަަށް އަވަސް ފަރުވާ ދިނުމަށް ކުރަމުންދާ ޚިދުމަތް ހުއްޓާނުލާނެކަމަށާއި ޚިދުމަތުގައި ދެމި ހުންނާނެކަމުގެ ޔަގީންކަން ވެސް އޭނާ ވަނީ ދީފަައެވެ.
