ދަރިފުޅު ބައްޕައަށް: ކޮއްކިމެންގެ ހައްގުގައި ތިވަނީ ބޮޑު ގުރުބާނީއެއް
"ބައްޕަ ސިފައިންގެ މީހަކަށް ވީމަ ކޮއްކޮ މިއަދު ވަރަށް އުފާވޭ. ކޮއްކޮ ފަދަ އެތައް ކުޑަކުދިންގެ ހައްގުގައި ބައްޕިމެން ތިވަނީ ބޮޑު ގުރުބާނީއެއް"
މިއީ މޯލްޑިވްސް ނެޝަނަލް ޑިފެންސް ފޯސްގައި މަސައްކަތް ކުރާ ހިތްވަރުގަދަ ފަހުލަވަނާކަށް ސިފައިންގެ ދުވަހުގެ މުނާސަބަތުގައި އޭނާގެ ދަރިފުޅު ލިޔުނު މެސެޖުން ދެ ޖުމްލައެވެ. އެއީ ކިތަންމެ އާދައިގެ އަދި ކުޑަ ދެ ޖުމްލަ ނަމަވެސް، އެ ކިޔާލާފައި ހިތަށް ފުން އަސަރެއް ކޮށްފިއެވެ.
ސިފައިންގެ ދުވަހުގެ ތަހްނިޔާ ކިޔުމަށްޓަކައި ދިވެހި ސިފައިންގެ މީހަކަށް އޭނާގެ ލޯބިވާ ދަރިފުޅު ލިޔުނު ކުރު ނަމަވެސް އަސަރުން ފުރިގެންވާ އެ މެސެޖު ކިޔާލާފައި އަޅުގަނޑުގެ ލޮލުންވެސް ކަރުނަ ނިރާލިއެވެ. ކުއްލިއަކަށް ބައްޕައާއި ދުރުން އުޅެން ޖެހުމުން ކިހާ ފަޅުކަން އިހްސާސް ވާނެ ހެއްޔެވެ؟
"ލޯބިވާ ބައްޕީ. އަޅުގަނޑު ބައްޕި އާ ދުރުގައި ހުއްޓަސް ބައްޕި މަތިން ވަރަށް މިސްވޭ. ބައްޕި ކިޔައިދޭ މަޖާ ވާހަކަތަކާއި ކުރާ ސަމާސާ މަތިން ވަރަށް ހަދާންވޭ. ލޯބިވާ ބައްޕީ! ބައްޕި ސިފައިންގެ މީހަކަށް ވީމަ ކޮއްކޮ މިއަދު ވަރަށް އުފާވޭ. ކޮއްކޮ ފަދަ އެތަށް ކުޑަކުދިންގެ ހައްގުގައި ބައްޕިމެން ތިވަނީ ވަރަށް ބޮޑުގުރުބާނީއެއް. ލޯބިވާ ބައްޕީ! މަންމި ބުނުއްވާ ބައްޕިހުރީ ވަރަށް ސޭފުކޮށޭ. އެކަމަކުވެސް ބައްޕިއަށް ކަމެއް ވެއްޖެއާ ކޮއްކޮ ވަރަށް ދެރަވާނެ. ބައްޕީ! ބައްޕި ނެތީމަ ވަރަށް ދެރަވޭ. ބައްޕީ! ކޮއްކޮ ބޭނުން ބައްޕިގައިގަ ބައްދާލަން. ވަރަށް ބޮޑުކޮށް. ބައްޕީ! ކޮއްކޮ ކުރިން ޕާކަށް ދާހެން ޕާކަށް ދާންވެސް ވަރަށް ބޭނުން. އެކަމަކު ބައްޕިމެންނަށްޓަކައި ކޮއްކޮމެން މިތިބީ ގޭގާ ބަސްއަހައިގެން. ބައްޕި އަތްދޮންނަށްޗޭ. މާސްކު އަޅައްޗޭ. އަވަހަށް އަންނައްޗޭ.ކޮއްކޮގެ ދުޢާއަކީ އަބަދުވެސް ބައްޕީ ހެޔޮހާލުގައި ލެހެއްޓެވުން. ބައްޕި ދެކެ ކޮއްކޮ ވަރަށް ވަރަށް ލޯބިވޭ.. ސިފައިންގެ އަހަރީ ދުވަހުގެ ތަހުނިޔާ ލޯބިވާ ބައްޕީ އަށް އަރިސްކުރަން." އެކުއްޖާ ބައްޕައަށް ލިޔުނު މެސެޖްގައި ބުނެފައިވެއެވެ.
ކިހާ ހިތާމަވެރި ހެއްޔެވެ. މިހާރު ހަލުވިކަމާއިއެކު ފެތުރެމުންދާ ކޯވިޑް 19 އާއި ދެކޮޅަށް ހަނގުރާމަ ކުރުމަށްޓަކައި ދިވެހި ސިފައިން އެތިބީ އާއިލާތަކާއި ދުރުގައެވެ. އެ ހިތްވަރުގަދަ ބަތަލުންނަށް އާއިލާއަށްވުރެ އިސްވީ ގައުމެވެ. ދަރިންނާއި އަނބިމީހާއާއި އާއިލާއާއި ދުރުގައި އެ އުޅެނީ އަޅުގަނޑުމެންނަށް ހިދުމަތް ކުރާށެވެ. އެ ހިތްވަރުގަދަ ދިވެހި ދަރިންނަށް އެހީތެރިވާން ބޭނުންވާނަމަ ގޭގައި މަޑުކޮށްލާށެވެ.
