ކުޅުދުއްފުށީގައި ލޮކްޑައުންއާ ހިލާފުވާ ފަރާތްތަކުން 5000 ރުފިޔާ އާ ހަމައަށް ޖޫރިމަނާކުރަނީ
ކުޅުދުއްފުށީގައި މިހާރު އިއުލާން ކޮށްފައިވާ ލޮކްޑައުންއާ ހިލާފުވާ ފަރާތްތަކުން 500-5000 ރުފިޔާ ދެމެދު އަދަދަކުން ޖޫރިމަނާކުރަން ނިންމާ އެކަން އާންމުކޮށްފި އެވެ.
އިއްޔެ މެންދުރު 12:00އިން ފެށިގެން 3 ދުވަހަށް ކުޅުދުއްފުށި ސިޓީ ލޮކްޑައުން ކޮށްފައި ވަނީ ކޮވިޑް19 އަށް ފައްސިވި މީހަކު ދަތުރުކުރި ބޯޓެއް އެ ސިޓީގައި މަޑުކޮށް، އެ މީހާއާ ގިނަ އަދަދެއްގެ ބަޔަކާ ކޮންޓެކްޓުވެފައި ވާތީ، ރައްކާތެރިކަމުގެ ފިޔަވަޅެއްގެ ގޮތުންނެވެ.
ކުޅުދުއްފުށި ސިޓީ ކައުންސިލުން ކޮށްފައިވާ އިއުލާނުގައި ބުނެފައިވަނީ އެ ސިޓީ ލޮކްޑައުންކޮށް ކާފިއު އިޢުލާން ކުރެވިފައި ވަނީ ހެލްތު ޕްރޮޓެކްޝަން އެޖެންސީގެ 2020/39 ނަންބަރު އެންގުމުގެ ނުކުތާ ނަންބަރު 1 (އެކެއް) ގައި ލޯކަލް ކައުންސިލްގެ އިޙްތިޞާޞް ހިނގާ ސަރަހައްދުތަކުގައި ކޮވިޑް-19 ފެތުރުމުގެ ފުރުސަތު އޮތް މިންވަރަށާއި ހާލަތަށް ރިއާޔަތްކޮށް އެއްވެ އުޅުން ހުއްޓުވުމަށާއި އިޖުތިމާއި ގައިދުރުކަން ގާއިމު ކުރުމަށް ފިޔަވަޅު އެޅުމަށް ޑިރެކްޓަރު ޖެނެރަލް އޮފް ޕަބްލިކް ހެލްތު އެ ކައުންސިލަށް ދެއްވާފައިވާ ބާރުގެ ދަށުންކަމަށެވެ.
އެގޮތުން ކާފިއު އިއުލާންކޮށްފައިވާ މުއްދަތުގައި ހުއްދަ ނެތި ބޭރަށް ނުކުމެ އުޅުމަކީ މަނާކަމެއް ކަމަށާއި މި އެންގުމާއި ހިލާފުވާ ފަރާތްތަކާ މެދު ކައުންސިލުން ކުރާ އަމުރަށް ނުކިޔަމަންތެރިވާ ފަރާތްތަކާ މެދު އަދަބެއްގެ ގޮތުގައި މައްސަލައިގެ ކުޑަ ބޮޑުމިނަށް ބަލައި 500 (ފައްސަތޭކަ) ރުފިޔައާއި 5000 (ފަސްހާސް) ރުފިޔާއާ ދެމެދުގެ އަދަދުކަން ޖޫރިމަނާ ފިޔަވަޅު އެޅުމަށް ލިބިދޭ ބާރުގެ ދަށުން އަމަލު ކުރަމުގެ އިހްތިޔާރުގެ ކައުންސިލަށް ލިބިފައިވާކަމަށް އާންމުކޮށް އަންގައި ކަމަށެވެ.
މިދަނޑިވަޅުގައި ބަލި ކޮންޓްރޯލް ކުރުމަށް ހުރިހާ ރައްޔިތުން ވެސް އެއްބާރުލުން ދިނުމަށާއި ސަލާމަތީ ބާރުތަކުގެ އެންގުންތަކަށް ފުރިހަމައަށް ބޯލެބުމަށް ޓާސްކް ފޯސްއިން ދަނީ ތަކުރާރުކޮށް އިލްތިމާސް ކުރަމުންވެ. އަދި ބަލި ފަތުރުން ކޮންޓްރޯލް ކުރުމަށް ހުރިހާ ރައްޔިތުން ފަރުދީ ޒިންމާ ފުރިހަމައަށް އަދާކުރުމަށް ޓާސްކް ފޯސް އިން ދަނީ ނަސޭހަތްތެރިވަމުންނެވެ.
