ޑެލިވަރީއަށް ދިޔަ ބަންގްލަދޭޝް ދެމީހުންގެ ސުވާލު: "ބަންގްލަދޭޝް އިން އައި ދިވެހިންގެ ހާލު ރަނގަޅުތަ؟"
ރާއްޖޭގައި އެތައް ހާސް ބިދޭސީންނެއް އުޅޭއިރު، އެމީހުން ލައްވާ ނުކުރުވާކަށް ކަމެއް ނޯވެއެވެ. އެމީހުން ވަމުންދާ އެހީތެރިކަމުގެ އަގު، އިންސާނިއްޔަތާ ޚިލާފު ދަށު ދަރަޖައިގެ އަމަލުތަކުން ދެމުން ދިއުމަކީ ގައުމީ މައްސަލައެއްގެ ގޮތުގައި ގިނަ ބަޔަކު ދަނީ ފާހަގަކުރަމުންނެވެ.
މިދުވަސްވަރު، އެންމެ ގިނައިން ބިދޭސީންލައްވާ ކުރުވާ އެއްކަމަކީ ޑެލިވަރީގެ މަސައްކަތެވެ. މާލޭގައި ކޮވިޑް-19 ފެތުރެން ފެށުމާއެކު މާލެ ވަނީ ލޮކްޑައުން ކޮށްފައެވެ. އަދި ޑެލިވަރީގެ ހިދުމަތަށް ބާރުބޮޑުވެފައިވާ މި ދަނޑިވަޅުގައި ބަންގްލަދޭޝްއަށް ނިސްބަތްވާ ގިނަ ރައްޔިތުންނެއް ދަނީ އެ މަސައްކަތުގައި ބައިވެރިވަމުންނެވެ.
ލޮކްޑައުންއާ ގުޅިގެން ގިނަ ބިދޭސީންތަކެއް ހާލުގައި ޖެހިފައިވާއިރު، އެފަދަ މީހުންނާ ދިމާވާ ދިވެހިން އަންނަނީ އެ ވާހަކަތައް މީސް މީޑިއާގައި ހިއްސާ ކުރަމުންނެވެ.
އެގޮތުން ދިވެއްސަކު ފޭސްބުކްގައި ކުރި ޕޯސްޓެއްގައި ބުނީ އޭނާގެ ގެއަށް ކާތަކެތި ޑެލިވާކުރަން އައި ބަންގްލަދޭޝް ދެ މީހުންނަށް ޝުކުރު އަދާކުރުމުން އެ މީހުން ކުރި ހަމައެކަނި ސުވާލަކީ ބަންގްލަދޭޝް އިން ރާއްޖެއައި ދިވެހިންގެ ހާލަތު ރަނގަޅު ތޯ ކަމަށެވެ.
"ބަންގްލަދޭޝް އިން އައި ހުރިހާ ދިވެހިންގެ ހާލު ރަނގަޅުތަ؟" ބަންގްލަދޭޝް ދެމީހުން ބުނި ކަމަށް ދިވެހި މީހާ ލިޔެފައިވެއެވެ.
ބަންގުލަދޭޝް އަސްކަރިއްޔާގެ އެ ފްލައިޓް މިދިޔަ ހޯމަ ދުވަހުގެ ހަވީރު ވެލާނާ އިންޓަނޭޝަނަލް އެއާޕޯޓުގައި ވަނީ ޖައްސާފަ އެވެ. އެ ފްލައިޓުން ޖުމްލަ 81 މީހަކު ރާއްޖެ އައިސްފައިވާއިރު އޭގެ ތެރޭގައި ހިމެނެނީ ބަންގުލަދޭޝްގެ 10 މެޑިކަލް ޑޮކްޓަރުންނާއި އެ ގައުމުގައި ކިޔަވަން ތިބި 53 ދަރުވަރުންގެ އިތުރުން ނޭޕާލްގައި ކިޔަވަންތިބި 18 ދަރިވަރުންނެވެ.
ބަންގްލަދޭޝް މީހާ ސުވާލު ކުރީ އެ ފްލައިޓުގައި ރާއްޖެ ގެނައި 53 ދަރިވަރުންގެ ވާހަކައެވެ.
