ބަންގްލަދޭޝްގެ ބޮޑުވަޒީރު ހަސީނާއަށް ގުޅުއްވާ، ރައީސް ޝުކުރުއަދާކުރައްވައިފި
ބަންގްލެދޭޝްގައި ތިބި ދިވެހިން ރާއްޖެ ގެނައުމަށް ވެދިން އެހީއަށާއި އެ ގައުމުން ދިން އެހީއަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޝުކުރު އަދާކުރައްވައިފިއެވެ.
ބަންގްލަދޭޝް އިން ދިން އެހީއަށް ޝުކުރު އަދާކުރެއްވުމަށް ރައީސް ސޯލިހު މިއަދު ވަނީ ބަންގްލަދޭޝްގެ ބޮޑުވަޒީރު ޝައިހް ހަސީނާ އަށް ފޯނުން ގުޅުއްވާ އެ ގައުމުން ދިން އެހީއަށް ޝުކުރު އަދާކުރައްވައިފައެވެ.
ދެބޭފުޅުންގެ ވާހަކަފުޅުގައި ކޮރޯނާގެ ބަލިމަޑުކަމާ ދެކޮޅަށް ދެ ގައުމުން ގުޅިގެން ކުރެވޭނެ މަސައްކަތްތަކާއި އެއްގައުމުން އަނެއްގައުމަށް ދެވޭނެ އެހީތެރިކަމާ ގުޅެގޮތުން ވަނީ މަޝްވަރާ ކުރައްވައިފައެވެ.
Pleasure to speak on the phone with PM of #Bangladesh, H.E.Sheikh Haseena a short while ago. During our call, I conveyed our gratitude to the government and people of Bangladesh for evacuating Maldivian students and for the generous assistance in our efforts against COVID19.
— Ibrahim Mohamed Solih (@ibusolih) April 22, 2020
ބަންގްލަދޭޝް އިން ވަނީ ކޮވިޑް19 އާއި ގުޅޭ ކަންކަމުގައި އެހީވުމަށް އެގައުމުގެ އަސްކަރިއްޔާގެ 10 މެޑިކަލް އޮފިސަރުންވެސް ރާއްޖެ ފޮނުވައިފައެވެ. މީގެ އިތުރުން އެގައުމުގައްޔާއި ނޭޕާލުގައި ތިބި 71 ދިވެހި ދަރިވަރަކު ބަންގްލަދޭޝްގެ އަސްކަރިއްޔާގެ މަތިންދާބޯޓެއްގައި އިއްޔެ ވަނީ ރާއްޖެ ގެނެސްދީފައެވެ.
މީގެ އިތުރުން ބަންގްލަދޭޝް އިން ވަނީ 100 މެޓްރިކްޓަނުގެ ބޭހާއި ކާބޯތަކެތި ރާއްޖެއަށް ހަދިޔާކޮށްފައެވެ. މީގެ ތެރޭގައި 20،000 ޕީޕީއީ ސެޓާއި 960 އައި ޕްރޮޓެކްޝަން ގޮގްލްސް އަދި 5000 ޕީސް ހޭންޑް ސެނިޓައިޒާ ހިމެނެއެވެ.
