ފިރިމީހާގެ ހިތް އަތުލެވޭނީ އެ ހިތުން "ވައްކަން ކޮށްގެން"!

ކައިވެނީގެ ގުޅުމަކީ ދެމީހެއްގެ ޙަޔާތް އެއް ޙަޔާތަކަށް ބަދަލުކޮށްލާ ގުޅުމެކެވެ. ދެމީހުންގެ އުފާތަކާއި ހިތާމަތައް އެކީގައި ހިއްސާކުރާ ބަދަހި ގުޅުމެކެވެ.

Ads by MWSC

އެކަކު އަނެކަކަށް ލޯތްބާއި އަޅާލުންދީ ޒަވާޖީ ޙަޔާތަކީ ދުޅަހެޔޮ ޙަޔާތަކަށް ހެދުމަކީ ދެމަފިރިންގެ ވެސް މަސްޢޫލިއްޔަތެކެވެ. ނަމަވެސް ބައެއް ކައިވެނިތަކަކީ ފިރީންގެ ލޯތްބާއި އަޅާލުމުން އަނބީން މަހުރޫމްވެފައިވާ ކައިވެނިތަކެކެވެ. ޚާއްޞަކޮށް ދަރީން ލިބުމަށް ފަހު ކުރީން އުޅުނު އުފާވެރި ދިރިއުޅުމުން އަނބީން މަހްރޫމް ވާތަން ފެނެއެވެ.

މިއީ އެ ފަދަ އުޚުތުންނަށް ހުށަހަޅައިދޭ ނަސޭޙަތުގެ ބަސްކޮޅެކެވެ. ކެތްތެރިވެ، ފިރިމީހާއާ މަޝްވަރާ ކުރާށެވެ. އުފާވެރި ޙަޔާތެއް ހޯދުމަށް ދެމަފިރީން އެކުގައި މަސައްކަތް ކުރާށެވެ. ﷲގެ މަދަދަށް އެދި ދުޢާ ދަންނަވާ ޙާލު ފިރިމީހާގެ ހިތުން "ވައްކަން" ކުރާށެވެ.

އެއީ ކިހިނެއްކަން ބުނެދޭނަމެވެ.

ތިބާ ރިވެތި ވެގެންވީ ހާލުގައި މެނުވީ ފިރިމީހާއަށް ނުފެންނާށެވެ. ތިބާ ގައިން ދުވާ ވަހަކީ މީރު ވަސް ނޫން އެހެން ވަހެއް ކަމުގައި ނުހަދާށެވެ. ފިރިމީހާއަށް ތިބާ ފެންނަ ހިނދުގައި ތިބާގެ މޫނު މަތީން ފެންނަނީ ހިނިތުންވުން ނޫން އެހެން މަންޒަރެއް ކަމުގައި ނުހަދާށެވެ. ތިބާގެ ފަރާތުން ފިރިމީހާއަށް ލިބެނީ ބަސްއަހާ ކިޔަމަންތެރި ދަރީންކަން ޔަގީން ކުރުމަށް އެ ގޮތުގައި ތަރުބިއްޔަތު ކުރާށެވެ. ތިބާގެ އަޑުން ފިރިމީހާއަށް އިވެނީ އޯގާތެރި ބަސްތައް ކަމުގައި ހަދާށެވެ. ﷲގެ ރަޙުމަތް ފުޅުން ފިރިމީހާގެ ހިތް ތިބާއަށް ޓަކައި މަޑުވެ އެ ހިތުގައި ލޯބި އާލާވެގެން ހިނގައިދާނެއެވެ. ފިރިމީހާގެ ހިތް ތިބާއަށް މިލްކު ވެގެން ހިނގައިދާނެއެވެ.

އުފާވެރި ހިތްހަމަ ޖެހޭ ޙަޔާތަކީ ﷲ އިންސާނަކަށް ދެއްވާނެ އެންމެ ބޮޑު އެއް ނިޢުމަތެވެ. ވީއިރު އެ ނިޢުމަތް ހޯދުމަށް ، ކާމިޔާބީގެ މަގުގައި ހިނގަން ދަސްކުރަން ޖެހެއެވެ. އެއީ ﷲ އެންގެވި އިންތަކާއި މިންތަކުގައި ދިރިއުޅުން ހޭދަ ކުރުމާއި ދިމާވާ މައްސަލަތަކުގެ ހައްލު ހޯދުމަށް ހިކުމަތާއެކު ޢަމަލު ކުރުމެވެ. ފިރިމީހާގެ ހިތް މިލްކު ކުރުމަށް އަނބިމީހާއަށް ކުރެވިދާނެ އެންމެ މުހިންމު ކަމަކީ ކެތްތެރިވުމާއެކު ސާބިތުވެ ހުރުމެވެ. ﷲއަށް ދަންނަވައި ފިރިމީހާގެ ހިތުން "ވައްކަން" ކުރުމެވެ.